Tĕ khà – ngai chờ bơh bồ tơngoh, nùs nhơm làng bol dê, là bơta đo was niam ngan bơh làng bol lơh tờm dê, là bơnàng jă nàng bơt bơtàu dùl dà lơgar gơnoar adat boh lam kơ̆ kơljap, pràn kơldang, dùl mpồl bơtiàn ring bal, gơguh jak. Do là tŭ gơnoar lơh tờm làng bol dê geh ai tơnggŏ song ngan tơn rlau jơh, geh ai tơngg mờ broă lơh ngan ngồn tàm tơl pang sră pồ. Pơgru dờng – Tiến sìh Nguyễn Minh Đoan, pơgru kâp dờng hìu bơsram Đại họk Adat boh lam Hà Nội pà git, bơh tĕ khà, làng bol geh tus bal tơn tàm broă lơh nền ală broă kuơmàng bơh dà lơgar mờ ƀòn lơgar dê; geh tus bal atbồ dà lơgar mờ mpồl bơtiàn bơh ală anih lơh broă geh gơnăp gơnoar boh he pồ: “Do là làng bol ai tơnggŏ gơnoar he dê bơh broă sac rơ wah ală cau geh pràn jak, geh nùs nhơm niam halà he hòi là ală cau jak chài ngan, niam ngan bơh ală rơnàng krơi is tàm mpồl bơtiàn dê nàng tus bal tàm ală anih lơh broă geh gơnoar, anih lơh broă ala mat bơh làng bol dê. Mờ tŭ gơ ngan ngồn gơ rềng tus bơta kuơ, ờ di mìng là bơh dà lơgar dê mờ gam bơh tơl nă làng bol dê tai den tŭ hơ̆ làng bol rơp sền gŏ broă lòt tĕ khà ndrờm bè dùl ngai chờ, bal mờ hơ̆ làng bol kung gŏ broă tĕ khà hơ̆ là ngan ngồn”.

Dơ̆ tĕ khà cau ala mat Quôk hội khoă XVI mờ cau ala mat Mpồl duh broă làng bol ală kâp, tơngai lơh broă bơh nam 2026 tus nam 2031 geh bơyai lơh tàm tŭ tơngai bơtàu tơnguh cèng bơta bơnàng jă sơn rờp. Ờ hềt tŭ lơi Việt Nam he ơm tềng đap uă tŭ niam kuơmàng bè tŭ do: gơnoar broă mờ bơngă pin dờn ală lơgar geh tơnguh; bơta kơp kờñ bơtàu tơnguh pràn kơldang, bơtàu tơnguh gơ gơs bơta gơn kơnờm nùs nhơm pràn ngan; jak chài – măi mok, tam gơl sồ, lơh sa tơlir, lơh sa sồ lơh gơlik ală ù tiah bơtàu tơnguh pa, tam gơl pa đơng lam broă dà lơgar geh ai tơnggŏ loh làng ngan.

Tàm tŭ tơngai bè hơ̆, dơ̆ tĕ khà dơ̆ do ờ mìng geh gơtha kuơmàng ai tơngai lơh broă 5 nam in, mờ gam là bơta sac rơ wah ai gùng lòt bơh dà lơgar dê, ai bơta niam bơh rài đơng lam broă dà lơgar dê, ai bơta lam lơh ngan nồn kơp kơnờm bơtàu tơnguh tàm uă nam pơn jat tai in. Jat tiến sìh ồng Nguyễn Viết Chức – Phó Kong kơnòl Anih duh broă niam chài, bơto bơsram, ơruh pơnu, kơnòm pa tàu mờ kơnòm dềt Quôk hội dê lài do pà git, tŭ tơngai hơ̆ sồr tơl nă làng bol pal git loh rlau tai là, bơta kis jŏ dà lơgar mờ bơta bơtàu tơnguh dà lơgar dê gơ jat bal mờ kơnòl sac rơ wah he dê: “Bol he gam mut tàm dùl tŭ tơngai pal lam lơh jat bơta kơp kờñ bơh jơi bơtiàn dê, tus nam 2045 gơ gơs là dùl lơgar bơtàu tơnguh. Gơ ai tơlik ală jơnau sồr dờng ngan mờ sồr ală cau ala mat Quôk hội pal geh nùs nhơm, pràn jak is ồn rlau, jơh nùs drơng broă kung pal is ồn rlau sơl. Mờ làng bol sơlơ git kơnòl mờ gơnoar he dê tŭ lòt tĕ khà. Den tàng ngai chờ do là ngai chờ kuơmàng is ồn. Tơl nă cau tĕ khà pal ngui niam gơnoar broă he dê nàng sac rơ wah mờ gơtùi git là, do ờ mìng là gơnoar mờ gam là kơnòl gơ wèt mờ bơta bơtàu tơnguh bơh dà lơgar dê”.

Dơ̆ tĕ khà cau ala mat Quôk hội khoă XVI mờ cau ala mat Mpồl duh broă làng bol ală kâp tơngai bơh nam 2026 tus nam 2031 sơlơ geh kuơ dờng màng tŭ bơyai lơh tàm tŭ tơngai Pơrjum dờng cau ala mat gùt lơgar dơ̆ XIV bơh Đảng dê lơh geh cồng nha niam bơnĕ, git nền loh làng broă rơndap lơh, jơnau kờñ bơtàu tơnguh dà lơgar tàm tŭ tơngai pa mờ sac rơ wah geh mpồl kwang bàng kâp dờng geh nùs nhơm cíñ trị kơ̆ kơljap, nùs nhơm tàm rài kis sàng goh, bồ tơngoh kơlôi sơnơng tam gơl pa mờ kơp kờñ tă pơgồp. Ồng Nguyễn Văn Phúc, Phó Kong kơnòl Anih duh broă lơh sa bơh Quôk hội dê lài do đơs là, cồng nha bơh pơrjum dờng dê ờ mìng lơh gơlik bơnàng jă cíñ trị kơnhăp kơ̆, mờ gam gàr kơ̆ bơta pin dờn bơh làng bol dê tàm bơta đơng lam bơh Đảng dê – dùl bơta lơh nền tus lơh geh cồng nha bơh kac màng Việt Nam dê: “Pơrjum dờng Đảng dơ̆ XIV pa lơh geh cồng nha niam ngan neh pờ gơs dùl rài bơtàu tơnguh pa, rài brồ să bơh jơi bơtiàn Việt Nam dê. Làng bol, cau tĕ khà pin dờn jơh nùs tàm bơta đơng lam bơh Đảng mờ pin dờn ngan tàm Quôk hội là anih lơh broă ala mat dờng ngan rlau jơh làng bol dê, anih lơh broă geh gơnăp gơnoar dà lơgar dờng ngan rlau jơh. Cau tĕ khà rơp rơ wah di, pồ di ală cau ala mat dipal mut tàm broă lơh bơh Quôk hội dê nàng lơh niam, lơh geh cồng nha, geh bơta niam pe kơnòl broă kuơmàng ngan rlau jơh Quôk hội dê, bơh hơ̆ nàng pơgồp bơnah lam lơh ală kơnòl bơh Pơrjum dờng dơ̆ XIV bơh Đảng dê neh ai tơlik”.

Tŭ làng bol lòt tĕ khà tàm bơta pin dờn tàm gùng dà neh geh Pơrjum dờng Đảng git nền mờ tŭ mpồl lơh broă sră pơ àr gơnăp gơnoar dà lơgar geh tơng gơs bơh bơnàng jă hơ̆, hơ̆ là bơta pràn, lơh gơlik bơta gơn kơnờm dờng màng nàng dà lơgar cơnđuà kơ̆ brồ guh tàm tŭ tơngai bơtàu tơnguh pa.