Dồ ròt ală broă lơh, tiah drà geh lơh tàm uă nam mơya ờ geh cau ơm. Uă anih lơh broă jơngkah wơl, ală broă lơh bơcri priă dà lơgar, bơt bơtàu mờ priă bơcri bơh kes priă dà lơgar dê gơtìp sang tĕ gời… Bơta do ờ mìng lơh gơbàn hoàc huơr kes priă dà lơgar mờ gam lơh gơmù bơta pin dờn bơh làng bol dê tai gơ wèt mờ bơta đơng lam bơh Đảng, bơta atbồ bơh dà lơgar dê. Dùl tàm ală jơnau lơh broă lơh jat ngan ngồn tềm pềr, kơryan pơhì pơhà gam ờ niam là tài mpồl lơh broă ờ hềt geh tơl jat jơnau sồr.

Adat Lơh jat ngan ngồn tềm pềr, kơryan pơhì pơhà ờ hềt ngan ngồn geh lơh jat ngan ngồn tàm rài kis tài ală jơnau cih uă ngan kung gam cèng bơta pal jat, ờ hềt geh ală gùng dà bơrkuăt kơnòl mùl màl lơh gơbàn cồng nha lơh jat ngan ngồn ờ hềt uă, uă ngan gam gơ wèt tàm jơnau git wă kơnòl bơh cau atbồ anih lơh broă, mpồl lơh broă, mpồl cau mờ bơh tơl nă kwang bàng, cau lơh broă sa priă nhai dà lơgar, cau nă să is, hìu bơnhă dê. Ồng Hoàng Văn Cường, Kwang geh jơng tàm Anih duh broă Lơh sa mờ priă jền bơh Quôk hội geh jơnau đơs: “Mùl màl tŭ bol he lam lơh jat Adat Lơh jat ngan ngồn tềm pềr, kơryan pơhì pơhà gam cèng bơta mìng đơs lơm uă rlau, cèng bơta tàm sră pơ àr, cèng bơta yal jơnau gơ in di mờ broă rơndap lơh. Tàm ƀòn lơgar, tàm anih lơh broă, tàm mpồl lơh broă tơl tiah geh ală bơta lơi là pơhì pơhà, ală bơta lơi ờ niam den lơh broă nam tơnơ̆ neh tơrgùm tàm broă hơ̆ halà ờ den ờ hềt geh”.

Tềng đap bơta geh ngan do, Anih duh broă Lơh kơnòl broă sùm Quôk hội neh ring bal yal Quôk hội sền sơ wì, tam gơl tơl làm Adat lam lơh jat ngan ngồn tềm pềr, kơryan pơhì pơhà tàm pơrjum dơ̆ 10 tus do. Jơnau kờñ là pal lơh gơlik bơnàng jă adat boh lam tơl làm, kơ̆ kơljap ai lam lơh jat ngan ngồn tềm pềr tàm tơl gah, tơl broă, tơl nă kwang bàng, đảng viên mờ làng bol, lơh gơlik bơta tam gơl kuơmàng bè bơta niam tàm lam lơh jat ngan ngồn tềm pềr, kơryan pơhì pơhà.

Jat ồng Bùi Hoài Sơn, Mpồl cau ala mat Quôk hội ƀòn dờng Hà Nội đơs, nàng ală jơnau cih adat boh lam ờ mìng gơ ơm tàm sră pơ àr lơm gời den kờñ pal geh mpồl sền sơ wì, jat sền nền nòn: “Kờñ pal geh broă rơndap lơh pơgồp bal kơnòl, kung bè ală broă lơh sền sơ wì, jat sền nền nòn. Bơh hơ̆, pơgồp bal broă lơh pà khà jờng mờ broă lơh glài ală broă lơh tìs dồ bă dipal, loh cau, loh kơnòl. Jơh ală bơta hơ̆ kờñ pal geh lơh dồ bă nền nòn nàng lơh gơlik dùl tiah kis drơng wơl ai mờng kwèng tềm pềr, lơh gơs niam chài tềm pềr in, tàm hơ̆ ală jơnau ai tơlik lài bè mờng kwèng rài kis, kơnòl nùs nhơm halà ală bơta ndai geh lơh jat ngan ngồn”.

Jơnau rơcang cih Adat tềm pềr, kơryan pơhì pơhà tam gơl tus do geh kơp gơn rơp lơh gơlik dùl tơngume adat boh lam loh làng, geh cồng nha, tơnguh jơnau git wă mờ kơnòl bơh jơh gùt mpồl bơtiàn dê tàm broă lơh tềm pềr, kơryan pơhì pơhà, lam dà lơgar mut tàm rài bơtàu tơnguh kơ̆ kơljap jŏ jòng sùm.