Tàm ƀlàng hìu pơrjum thôn Đoàn, sàh tiah nhàr lơgar Ia Lốp, càr Dăk Lăk neh geh lơh niam wơl, wàs sàng goh niam bơnĕ. Jơnau cih “Gờm chờ dơ̆ tĕ khà cau ala mat Quôk hội khoă XVI mờ Mpồl duh broă Làng bol ală kâp, tơngai lơh broă bơh nam 2026 tus nam 2031” geh yồng tềng đap mpồng hìu pơrjum. Ồng Huỳnh Quang Phấn, Kwang atbồ thôn Đoàn, sàh Ia Lốp pà git: “Thôn Đoàn dơ̆ do rơp wă rò mờr 300 nă cau tĕ khà lòt tĕ khà Cau ala mat Quôk hội mờ Mpồl duh broă Làng bol ală kâp tàm ngai 15/3 tus do. Nàng drơng broă tĕ khà, thôn neh geh sàh dong kờl priă lơh niam wơl hìu pơrjum. Mpồl atbồ is thôn gam hòi jà làng bol ngai lơh broă, pơgồp bal mờ mpồl kwang àng, ling grăp ƀòn mờ mpồl ling sền gàr tiah nhàr lơgar tă pơgồp ngai lơh broă, lơh niam wơl hìu pơrjum, gàr anih yŭ rơyùm, drơng jơnau sồr bơh ngai tĕ khà dê”.

Ồng Bùi Sỹ Đông ơm tàm thôn Đoàn yal, kờp bơh tŭ lik lòt bơh càr Bến Tre tus tiah nhàr lơgar càr Dăk Lăk lơh sa, ơm kis mờr 30 nam lài, do là dơ̆ tĕ khà dơ̆ 5 ồng lòt đùh sră pồ cau ala mat Quôk hội mờ cau ala mat Mpồl duh broă làng bol ală kâp. Gơ wèt mờ ồng, broă geh tă pơgồp bơta pràn ai ngai chờ dờng in sùm là bơta pơn yờ să: “Dơ̆ tĕ khà cau ala mat Quôk hội, Mpồl duh broă Làng bol mờr tus, añ kơp kờñ ngan rơp pồ geh ală cau ala mat geh tơl nùs nhơm niam, geh tơl pràn jak, geh bồ tơngoh jak chài nàng tề lam, đơng lam làng bol bol hi, ala mat ai bơta kơp kờñ, jơnau đơs bơh cau tĕ khà dê tus mờ Đảng, dà lơgar nàng ală broă ờ suk, geh sền gròi tàm ƀòn lơgar geh bơsong dipal. Mờ kung sền gròi lơh ală gơl gùng lòt kung bè hìu sơnơm tàm tiah nhàr lơgar tơnơ̆ tŭ tơmut bal”.

Dơ̆ tĕ khà cau ala mat Quôk hội khoă XVI mờ cau ala mat Mpồl duh broă làng bol 2 kâp, tơngai lơh broă bơh nam 2026 tus nam 2031, tàm sàh tiah nhàr lơgar Ia Lốp, càr Dăk Lăk geh 4 rbô 600 nă cau tĕ khà lòt đùh sră. Ồng Nguyễn Duy Trung, Phó Ƀí thư Duh broă sùm Đảng ủy sàh Ia Lốp pà git, sàh neh tơng gơs 4 mpồl tĕ khà mờ 10 jơnum tĕ khà tàm ală thôn, ai priă rơcang phan bơna, sồr mpồl kwang àng, mpồl ling sền gàr tiah nhàr lơgar, ling grăp ƀòn gàr niam lơngăp lơngai rơndap tap sèng tàm tiah nhàr lơgar lài mờ tŭ, tàm tŭ mờ tơnơ̆ tĕ khà, wèt tus dơ̆ tĕ khà lơngăp lơngai, geh cồng nha: “Sàh neh bơt bơtàu ală broă lơh, tơngume mblàng yal bè broă lơh tĕ khà nàng pờ tàm loa pờ tơlik jơnau đơs sàh dê, mờ jơnau yal tơnggit geh pờ tơlik 2 dơ̆ tàm ngai, geh ƀùi drim mờ ƀùi mho. Tơng gơs  ală jơnum tĕ khà, rơcang ală bơta pal geh bè phan bơna niam ngan rlau jơh ai dơ̆ tĕ khà cau ala mat Quôk hội khoă XVI mờ Mpồl duh broă làng bol 2 kâp tơngai lơh broă bơh nam 2026 tus nam 2031 tàm ngai 15/3 tus do”.

Ia Lốp là dùl tàm 4 sàh tiah nhàr lơgar ù gờl hờ tiah đah mat tơngai mut càr Dăk Lăk dê, rềp mờ càr Moundulkiri, lơgar Campuchia. Tàm sàh geh Pôs ling sền gàr tiah nhàr lơgar 735 (Ea H’Leo), gơ wèt Mpồl đơng lam Mpồl ling sền gàr tiah nhàr lơgar càr Dăk Lăk lơh pôs. Trung tá ồng Trần Ngọc Kiên, Phó Kwang lam bồ Pôs đồng ling sền gàr tiah nhàr lơgar 735 pà git, bơdìh mờ kơnòl broă sền gàr kơ̆ gơnoar tờm, lơngăp lơngai tiah nhàr lơgar, kwang bàng, cau ling gơ wèt Pôs ling jơh nùs ngan tus bal sền gàr lơngăp lơngai, rơndap tap sèng lài mờ tŭ, tàm tŭ mờ tơnơ̆ Pơrjumd ờng Đảng dơ̆ XIV, kung bè dơ̆ tĕ khà Cau ala mat Quôk hội khoă XVI mờ cau ala mat Mpồl duh broă Làng bol ală kâp: “Pôs ling sền gàr tiah nhàr lơgar Ea H’Leo neh tă pơgồp jơnau đơs ai kâp ủy, gơnoar atbồ tàm ƀòn lơgar lòt sền, sac rơ wah mờ rơcang wil tơl phan bơna tàm ală anih tĕ khà, sồr mpồl cau pơgồp bal wàs kloh niam, bơka anih bơyai lơh, rơcang loa, yồng ƀăng rôn, biài cih jơnau đơs; mờ kung sồr mpồl sền gàr tus, gàr niam ờdo ờdă tàm ală anih tĕ khà. Bơdìh hơ̆ tai, pôs ling sơlơ lơh pràn mblàng yal nàng làng bol git loh kai, broă lơh bơh ală mpồl sò tơm dê nàng kờñ lơh aniai dơ̆ tĕ khà, bơh hơ̆ làng bol tơnguh bơta rơcang ngac, rơcang lài dră wơl geh cồng nha”.

Bơta lơh broă bal bơh jơh gùt anih lơh broă cíñ trị dê bal mờ bơta ring bal dồ nùs bơh làng bol dê, broă lơh rơcang ai dơ̆ tĕ khà tàm sàh tiah nhàr lơgar Ia Lốp in gam geh lam lơh jal mhar, di mờ jơnau sồr. Bơh lơh niam ală anih tĕ khà, lơh pràn mblàng yal tus gàr niam lơngăp lơngai, rơndap tap sèng, jơh ală ndrờm wèt tus nàng ngai 15/3 tus do ngan ngồn là ngai chờ bơh cau tĕ khà tiah nhàr lơgar dê, sac rơ wah ală cau ala mat geh tơl nùs nhơm niam, geh tơl pràn jak, ala mat ai bơta kơp kờñ bơh làng bol dê tàm ù tiah nhàr lơgar càr Dăk Lăk.