Bơh bồ tơngai lơh broă tus tŭ do, Quôk hội neh yal 99 adat boh lam, 165 jơnau lơh nền tàm pơrjum, gơ glòm jơh ală gah lơh sa, mpồl bơtiàn, sền gàr dà lơgar, lơngăp lơngai, lơh broă mờ lơgar ndai, rơcang kơryan sa kuề sa kuà, pơhì pơhà, broă ờ niam; ơn bơnàng jă kơ̆ kơljap ai broă bơt bơtàu anih lơh broă cíñ trị tơrmù lơyah, pràn kơldang, geh cồng nha, rềp làng bol mờ drơng wơl làng bol, mpồl lơh sa kă bro in niam rlau. Củ tịc Quôk hội ồng Trần Thanh Mẫn đơs sùm: “Is ồn, Quôk hội neh ring bal Jơnau lơh nền tàm pơrjum tam gơl, bơtơl bàr pe bơta bơh Sơnua boh lam, tam gơl Adat Rơndap broă Quôk hội, Adat rơndap broă gơnoar atbồ ƀòn lơgar; Quôk hội, Anih duh broă Lơh kơnòl broă sùm Quôk hội neh yal jat gơnăp gơnoar ală jơnau lơh nền tàm pơrjum bè rơndap tap sèng mpồl lơh broă sră pơ àr gơnoar atbồ kâp càr, kâp sàh. Do là ală broă lơh nền dờng ngan, geh gơtha kah yau, niam ngan, gơ rềng tơn tus jơh gùt anih lơh broă cíñ trị, tus tơl nă làng bol, jơh gùt mpồl bơtiàn”.

Quôk hội kung tơrgùm tă bơsong ală bơta gơ kòl bè gùng dà, broă lơh nàng lơh gơlik bơta tam gơl pràn bơtàu tơnguh lơh sa mpồl bơtiàn tàm rài pa, kuơmàng là lam lơh jat 4 jơnau lơh nền tàm pơrjum kuơmàng; Jơnau lơh nền tàm pơrjum sồ 57 bè Jak chài măi mok, tam gơl pa bơceh lơh, tam gơl sồ dà lơgar; Jơnau lơh nền tàm pơrjum sồ 59 bè mut gơ rờm bal ală lơgar; Jơnau lơh nền tàm pơrjum sồ 66 bè bơt bơtàu mờ lơh jat adat boh lam; Jơnau lơh nền tàm pơrjum sồ 68 bè bơtàu tơnguh lơh sa nă să is: “Quôk hội neh tam gơl pa bồ tơngoh kơlôi sơnơng lơh adat boh lam jat gùng dà ờ mìng lơh jat jơnau sồr atbồ dà lơgar, mờ gam pơn jờng bơceh lơh, ngui jơh bơta pràn lơh sa, ngui tơl bơta priă jền nàng bơtàu tơnguh. Sang tĕ bơta kơlôi sơnơng “ờ gơtùi atbồ den ờ ai”, ală bơta ngan ngồn tam gơl sùm den jàu Cíñ phủ, kâp hơ đơm in cih nàng gàr bơta ngac ngar tàm broă đơng lam. Lơh pràn tam pà kâp, tam pà gơnoar mờ jơnau đơs “kâp hơ đơm lơh nền, kâp hơ đơm lơh, kâp hơ đơm kong kơnòl”, tam gơl wơl jơh sră pơ àr gơnoar atbồ, tơrmù priă tă lơh, lơh gơlik bơta ƀuơn uă ngan rlau jơh ai làng bol mờ mpồl lơh sa kă bro in, lam lơh tam pà kâp, gàr bơta dipal mờ pràn jak lam lơh jat”.

Quôk hội neh lam lơh wil tơl, ngac ngar mờ geh cồng nha broă lơh nền ală broă kuơmàng bè lơh sa, mpồl bơtiàn, sền gàr dà lơgar, lơngăp lơngai, lơh broă mờ lơgar ndai; gàr bơta tơrgùm jơh ală bơta, geh bơta tàm tơrbŏ bal nền nòn đah jơnau sồr kơnòl broă mờ priă jền lam lơh. Uă broă lơh nền cèng bơta tam gơl pràn, ờ hềt bơh lài, đơs nền gùng dà ai kòn bơnus lơh tờm, tơl jơnau lơh nền, broă lơh nền ndrờm tài làng bol lơm.

Uă broă lơh nền kuơmàng bè: Jơnau lơh nền tàm pơrjum bè gùng dà broă lơh krơi is bơtàu tơnguh hìu ơm mpồl bơtiàn; Jơnau lơh nền tàm pơrjum bè ờ tă priă bơsram, dong kờl priă bơsram gơ wèt mờ kơnòm mầm non, kơnòm bơsram bơh kâp 1 tus kâp pe, cau bơsram jơnau bơto bơsram pe kâp tàm ală hìu bơsram dà lơgar; Jơnau lơh nền bè bơto wơl mầm non ai kơnòm dềt ơdŭ bơh sơn rờp bơh 3 tus 5 sơnam in…

Quôk hội kung neh ngui niam gơnoar broă “Bơta pràn lơbơn” bơh cribơyai broă mờ lơgar ndai nghị viện dê, broă lơh lơh broă mờ lơgar ndai bơh Quôk hội dê neh tă pơgồp geh cồng nha tàm broă lam lơh gùng dà lơh broă mờ lơgar ndai lơngăp lơngai is, lơh tờm, ring lơngai, lơh bơyô, li la broă, li la lơgar lơh broă bal, tơnguh rùp să, gơnoar broă bơh lơgar Việt Nam dê tàm muh mat ală lơgar bơh Đảng mờ dà lơgar he dê. Nàng pơn jat tai đòm jat bơhiàn 80 nam bơh Quôk hội Việt Nam dê, Củ tịc Quôk hội ồng Trần Thanh Mẫn pà git: “Quôk hội pơn jat tai tam gơl pa tơl làm, tơnguh pràn jak lơh adat boh lam, jat sền mờ lơh nền ală broă kuơmàng dà lơgar dê; lơh jat bơta đơng lam bơh Đảng dê, Quôk hội rơp pơn jat tai lòt bal mờ Cíñ phủ, Mặt trận dà lơgar, ală anih lơh broă sền gàr adat boh lam mờ jơh gùt anih lơh broă cíñ trị nàng lam lơh jat geh cồng nha Sơnua boh lam mờ ală adat boh lam, jơnau lơh nền tàm pơrjum neh yal. Lơh ngan uă ngan rlau jơh nàng lam lơh jat niam Jơnau lơh nền tàm pơrjum sồ 66 ngai 30/4/2025 bơh Ƀộ Cíñ trị dê bè tam gơl pa broă lơh bơt bơtàu mờ lơh jat adat boh lam lơh jat jơnau sồr bơtàu tơnguh dà lơgar tàm rài pa”.

Củ tịc Quôk hội pà git, Quôk hội pơgồp bal bơyai lơh geh cồng nha Pơrjum dờng Đảng ală kâp, wèt tus Pơrjum dờng Đảng gùt lơgar dơ̆ 14, sồr bơyai lơh tĕ khà Quôk hội khoă XVI mờ Mpồl duh broă làng bol ală kâp, tơngai lơh broă bơh nam 2026 tus nam 2031.

Quôk hội rơp lơh gơs niam ală tơngume bơh tơngai lơh broă khoă XV, tơngume pơrjum dơ̆ 10 dê mờ uă ngan tơngume kuơmàng, tàm hơ̆, Cíñ phủ kờp dŭ rơp yal rlau 90 tơngume, geh 47 adat boh lam. Lam lơh tơn jơh tơngai lơh broă Quôk hội khoă XV. Bơt bơtàu gùng dà ai tơlik lài lơh adat boh lam tơngai lơh broă Quôk hội khoă XVI.

Củ tịc Quôk hội ồng Trần Thanh Mẫn đơs sùm, Quôk hội pơn jat tai đơs nền gơnoar broă là anih ala mat dờng ngan rlau jơh làng bol dê, anih lơh broă gơnăp gơnoar dà lơgar dờng ngan rlau jơh bơh lơgar Kộng hòa sàh hội củ nghĩa Việt Nam dê, lơh jat di tŭ ală kơnòl broă kuơmàng bơh dà lơgar dê tàm tŭ tơngai pa.