Kwang atbồ Mpồl lơh broă kwang bàng, Phó Kwang atbồ Mpồl rơndap broă dà lơgar mò Nguyễn Thị Thanh pà git, 20 nam do, Mpồl lơh broă kwang bàng neh pơgồp bal jơh nùs mờ ală anih lơh broă geh gơ rềng, jơh nùs ai tơlik jơnau đơs Ủy ƀan Thường vụ Quôk hội in tam gơl gơs kơrnuat boh lam nùs nhơm bơh Đảng dê, tàm tam gơl, bơ tơl Sơnua boh lam nam 2013, kuơmàng là ală kơrnuat bè tĕ khà, Mpồl duh broă tĕ khà dà lơgar.

Bơh nam 2005 tus tŭ do, Mpồl lơh broă kwang bàng neh bơyai lơh 142 dơ̆ pơrjum bơto pơlam, gơ hòi gơ jà bơta tus bal bơh mờr 15 rbô dơ̆ kwang bàng Quôk hội, Thường trựk Hội đồng Ñân zân, kwang đơng lam bồ mờ cau lơh broă ờs mờng bơh Cơldŭ lơh broă Mpồl kwang bàng Quôk hội mờ Hội đồng Ñân zân ală càr, ƀòn dờng dê.

Bè broă lơh Hội đồng Ñân zân, Mpồl neh jơh nùs rơcang lài, di tŭ ai tơlik jơnau đơs ai Ủy ƀan Thường vụ in ai tơlik mờr 400 sră nggal pơlam lơh broă Hội đồng Ñân zân ală tiah, bơh hơ̆ rơhời tă bơsong uă kal ke, kòl yan tàm tŭ lơh broă, lơh gơlik bơta niam nàng Hội đồng Ñân zân in geh bơnàng jă, rơcang lài, jơh nùs, ngui niam rlau gơnoar broă bơh anih lơh broă geh gơnoar dà lơgar ala mat ai bồ tơngoh, bơta kơp kờñ, gơnoar lơh tờm bơh làng bol tàm ƀòn lơgar dê.

Ala mat kwang đơng lam bồ Quôk hội, đơs tàm Dơ̆ bơyai lơh tơngkah kir sơnrai, Phó Củ tịc Thường trựk Quôk hội ồng Trần Thanh Mẫn đơs nền, Đảng he neh git nền: “Kwang bàng là bơta lơh nền tus cồng nha bơh kac màng dê, gơ jat bal mờ bơta kis jŏ bơh Đảng, bơh dà lơgar mờ rài atbồ dê, là bơta tờm ngan tàm broă lơh bơt bơtàu Đảng”. Bè tơl khà bơh kwang bàng Quôk hội dê, Củ tịc Hồ Chí Minh neh đơs loh làng ngan là: “Quôk hội pal geh ală kwang bàng ngan ngồn dipal, ală kwang bàng jơh nùs jơh tồr drơng dà lơgar, drơng làng bol mờ drơng củ nghĩa xã hội in”.

Bè hơ̆ den tàng, tềng đap jơnau sồr pơn jat tai tam gơl pa broă lơh bơh Quôk hội dê, Phó Củ tịc Thường trựk Quôk hội ồng Trần Thanh Mẫn sồr Mpồl lơh broă kwang bàng 5 bơta tờm. Tàm hơ̆, tơrgùm kơlôi sơnơng ală bơta pa, rơcang lài ai tơlik jơnau đơs, gờñ git gŏ ală bơta pa, di tŭ ai tơlik jơnau đơs mờ Đảng đoàn Quôk hội, Ủy ƀan Thường vụ Quôk hội tàm broă pồ tơl mpồl kwang bàng bơh Quôk hội dê, pơn jat tai lam lơh gơnoar broă lơh tờm bơh kwang bàng Quôk hội dê tàm broă lơh bơh Quôk hội dê.

Ai tơlik jơnau đơs, jơnau sồr tam gơl pa mpồl kwang bàng duh broă, tơnguh cồng nha lơh broă bơh Hội đồng Zân tộk, ală Ủy ƀan bơh Quôk hội dê, ală anih lơh broă gơ wèt Ủy ƀan Thường vụ Quôk hội. Do là bơnàng jă nàng ai tơlik jơnau đơs mờ Ƀộ Cíñ trị, Ƀan Ƀí thư git nền broă lơh, broă lam lơh bơh Quôk hội dê mờ ai tơlik ală jơnau dan tàm Rơndap broă lơh gùng dà tĕ khà kwang bàng Quôk hội khoă 16, kwang bàng Hội đồng Ñân zân ală kâp tơngai lơh broă bơh nam 2026 tus nam 2031. Phó Củ tịc Thường trựk Quôk hội ồng Trần Thanh Mẫn đơs: “Gròi sền tus broă rơndap lài kwang bàng Quôk hội nàng ngan ngồn yal tơnggit ală cau geh pơn rơ jak bè nùs nhơm, geh pràn jak, tơl khà bơta niam jat jơnau sồr bơh Đảng mờ adat boh lam dê, tus bal lơh kwang bàng Quôk hội; tam gơl pa broă lơh bơto pơlam kwang bàng Quôk hội dùl bă jak chài, ngan ngồn, dong tơnguh bơta niam, cồng nha lơh broă bơh kwang bàng Quôk hội dê. Ai tơlik jơnau đơs dùl bă gơ in niam ală bơta gơ rềng tus broă lơh sir mpồl jat sền bơh cau tĕ khà mờ broă lam lơh, tơl khà sền sơ wì kwang bàng Quôk hội, gàr tơl ală bơta pal geh nàng kwang bàng Quôk hội lơh niam kơnòl broă he dê. Rơcang lài ai dơ̆ tĕ khà kwang bàng Quôk hội khoă 16 in, kwang bàng Hội đồng Ñân zân ală kâp tơngai lơh broă bơh nam 2026 tus nam 2031 jat nùs nhơm bơh gờñ, bơh ngài”.

Phó Củ tịc Thường trựk Quôk hội ồng Trần Thanh Mẫn sồr, Mpồl lơh broă kwang bàng pal kah ală jơnau sồr mùl màl bơh Củ tịc Quôk hội ồng Vương Đình Huệ dê, pal sùm jòi git, kơlôi sơnơng nền nòn ală jơnau sồr bơh Đảng, dà lơgar dê bè broă lơh rơndap kwang bàng nàng ai tơlik jơnau đơs gơ in nền nòn, gơ in di, mờ di tŭ. Bơdìh hơ̆ tai, Mpồl lơh broă kwang bàng pal rơcang lài rlau tai tàm broă lơh, tàm broă lùp jơnau đơs bơh ală mpồl bơt bơtàu Đảng, ală Ƀộ, gah broă lơh dà lơgar dê mờ pơgồp bal jơh nùs mờ ală anih lơh broă, mpồl lơh broă geh gơ rềng, ngan là Hội đồng Zân tộk, ală Ủy ƀan, ală anih lơh broă gơ wèt Ủy ƀan Thường vụ Quôk hội, Hội đồng Ñân zân ală càr, ƀòn dờng gơ wèt dà lơgar.