Nam 2023, mờ nùs nhơm geh kơnòl, bơta lơh ngan uă, Quôk hội neh lơh gơs khà broă uă ngan, do là dơ̆ sơn rờp tàm kah yau 78 nam lơh broă Quôk hội Việt Nam neh bơyai lơh khà dơ̆ pơrjum uă ngan rlau jơh tàm dùl nam mờ 5 dơ̆ pơrjum. Broă lơh jat sền geh sơlơ tơnguh tai mờ tam gơl pa, ngai sơlơ ngac ngar, di mờ bơta geh ngan. Quôk hội neh di tŭ geh ală jơnau lơh nền kuơmàng bơh dà lơgar dê. Tàm pơrjum, ala mat ală mpồl kwang bàng Quôk hội jờng rơ broă Quôk hội dơ̆ sơn rờp bơyai lơh pơrjum tơn jơh tơnơ̆ 1 nam lơh broă. Mò Lý Thị Lan, Phó Kwang atbồ Mpồl kwang bàng Quôk hội càr Hà Giang đơs là: “Bal mờ bơta tam gơl pa, tơnguh bơta niam lơh broă bơh anih lơh broă làng bol pồ dê, Mpồl kwang bàng Quôk hội tàm ală tiah chờ hờp ngan tài do là dơ̆ sơn rờp tàm tơngai lơh broă Quôk hội khoă XV, bơyai lơh pơrjum tơn jơh sền sơ wì cồng nha broă lơh nam bơh Mpồl kwang bàng Quôk hội dê. Añ kung đơs là, do là tŭ niam mờ pơn jat tai là bơta pa ai tơnggŏ bơta sền gròi bơh Quôk hội, Ủy ƀan Thường vụ Quôk hội dê gơ wèt mờ broă lơh bơh Mpồl kwang bàng Quôk hội dê nàng geh tŭ niam tă pơgồp, lơh sir rlau tai bè jơnau sồr, kơnòl broă tơnguh bơta niam lơh broă bơh Mpồl kwang bàng Quôk hội, kwang bàng Quôk hội tàm ală tiah dê”.

Ai jơnau đơs tă pơgồp tàm gùng dà lam lơh kơnòl broă nam 2024, Kwang gơnoar cih, Kwang atbồ Cơldŭ lơh broă Quôk hội ồng Bùi Văn Cường geh jơnau sồr Mpồl kwang bàng Quôk hội ală càr, ƀòn dờng: “Pơn jat tai pơgồp bal jơh nùs nàng tă pơgồp jơnau đơs dong Ủy ƀan Thường vụ Quôk hội sồr lơh, đơng lam broă lơh bơh Mpồl duh broă Jơi bơtiàn, ală Ủy ƀan bơh Quôk hội dê tàm broă lơh jat sền, pleh gơ tàm rơndap rơndồl mờ ală Mpồl kwang bàng jat sền tàm ală anih lơh broă, mpồl lơh broă. Gơ wèt mờ càr, ƀòn dờng geh khà Mpồl lơh broă sơrlèt rlau mờ khà geh ai, sồr Mpồl kwang bàng Quôk hội yal tus Kwang gơnoar cih Quôk hội in bè khà Mpồl kwang bàng, tơngume lơh broă, cau tàm mpồl, tŭ tơngai lơh broă ngan ngồn tàm càr, ƀòn dờng nàng yal Ủy ƀan Thường vụ Quôk hội di tŭ tam gơl gơ in dipal”.

Đơs pơn dut pơrjum, Củ tịc Quôk hội ồng Vương Đình Huệ đơs, nam 2023 là nam mờ khà broă Quôk hội uă ngan. Ală mpồl kwang bàng Quôk hội mờ ală kwang bàng Quôk hội kung neh jơh nùs ngui niam nùs nhơm lơh adat boh lam rơcang lài, jat sền geh cồng nha mờ lơh nền di tŭ, ngui uă ngan rlau jơh, nùs nhơm geh kơnòl tàm broă lơh lơh adat boh lam, lơh nền ală broă kuơmàng bơh dà lơgar dê mờ jat sền, tìp mat cau tĕ khà, broă wă làng bol, sền gròi, sồr lơh broă bơsong sră yal yă, yal khài bơh làng bol dê.

Tàm tơngai tus, Củ tịc Quôk hội ồng Vương Đình Huệ sồr, ală Mpồl kwang bàng Quôk hội, ală kwang bàng Quôk hội đòm jat ală cồng nha neh lơh geh, pơn jat tai sơlơ tơnguh tai khà broă, tơnguh rlau tai cồng nha lơh broă bơh Mpồl kwang bàng Quôk hội dê. Kuơmàng, pơn jat tai mblàng yal bè gơnoar broă, gơtha kuơmàng bơh Mpồl kwang bàng Quôk hội dê tàm broă lam lơh mờ lơh broă bơh Quôk hội Việt Nam dê đơs bal. Tàm hơ̆, kơnòl broă bơh 2, 3 mpồl kwang bàng Quôk hội dê là lam lơh nàng kwang bàng Quôk hội in wă làng bol: “Gơnăp gơnoar, kơnòl broă là lam lơh wă làng bol, pơgồp bal, gàr ală bơta pal geh nàng kwang bàng Quôk hội tìp mat cau tĕ khà. Do là kơnòl broă lài ngan mờ kuơmàng ngan rlau jơh, den tàng tŭ ờ hềt gơtùi tam gơl Nghị quyết bè tìp mat cau tĕ khà den tàm tơngume bè nghị quyết tŭ do, sồr ală oh mi pal pơn jat tai pơgồp bal jơh nùs mờ mặt trận dà lơgar, tềng đap bơta đơng lam bơh kâp ủy dê nàng pơn jat tai tam gơl pa broă lơh wă làng bol, tìp mat cau teư khà. Tàm adat boh lam tŭ do pa rơp cih Kwang bàng Quôk hội tìp mat cau tĕ khà jat tơngume bơh Mpồl kwang bàng Quôk hội dê, ờ hềt geh jơnau cih là Kwang bàng Quôk hội mờ tìp is mờ cau tĕ khà jat gơnoar broă bơh kwang bàng Quôk hội dê den ờ hềt geh jơnau cih pơlam mùl màl broă do. Digơlan tus do, kơlôi sơnơng lơh sir nghị quyết bè tìp mat cau tĕ khà pal bơ tơl wơl bơta do”.

Củ tịc Quôk hội ồng Vương Đình Huệ tơngkah, Mpồl kwang bàng Quôk hội tus bal pơgồp bal mờ Mpồl duh broă Jơi bơtiàn mờ ală Ủy ƀan bơh Quôk hội dê jat sền tàm ƀòn lơgar; sền gròi, sồr lơh broă bơsong yal yă, yal khài, jơnau dan bơh cau tĕ khà, làng bol dê, sồr ală anih lơh broă geh gơnoar yal jơnau tơnggit bè gah do, mờ kung pal yal bè broă lơh bơh kwang bàng Quôk hội dê tai.