Anih duh broă Lơh kơnòl broă sùm Quốc hội sền swì, ring bal 2 Jơnau lơh nền tàm pơrjum gơ rềng tus priă jền, kes priă mờ jơnau rơcang cih Broă rơndap lơh jat sền “Broă lam lơh jat gùng dà broă lơh, adat boh lam bè atbồ, ngui anih lơh broă tơnơ̆ tŭ lơh jat jơnau lơh nền rơndap tap sèng mpồl lơh broă, cau lơh broă sră pơ àr gơnoar atbồ mờ mpồl lơh broă sră pơ àr gơnoar atbồ”. Ồng Trần Thanh Mẫn - Chủ tịch Quốc hội đơs sùm: “Do là mìng dùl tơngume jat sền sơn rờp bơh Quốc hội khoă XVI dê; bè hơ̆ den tàng broă lơh rơcang pal geh lơh nền nòn, bơnĕ bơnàu mờ jak chài bơh broă bơh chờm tơn. Is ồn, broă lơh jat sền dơ̆ do pal pơgồp bal nền nòn mờ ală jơnau sồr lơh kuơmàng bơh Dà lơgar dê bè rơcang lài, kơryan pơhì pơhà mờ broă ờ niam, ngan là nùs nhơm Jơnau lơh nền tàm pơrjum sồ 4 bơh Đảng dà lơgar dê. Tŭ do, bơta atbồ, ngui anih lơh broă tơnơ̆ tŭ lơh jat jơnau lơh nền rơndap tap sèng mpồl lơh broă, cau lơh broă sră pơ àr gơnoar atbồ mờ mpồl lơh broă sră pơ àr gơnoar atbồ gam geh mpồl bơtiàn sền gròi ngan”.

Ai jơnau đơs bè broă lơh bơta kơp kờñ làng bol nhai 5, Duh broă sùm Anih duh broă Bơta kơp kờñ làng bol mờ Jat sền dan Anih duh broă Lơh kơnòl broă sùm Quốc hội sồr Chính phủ, Thủ tướng Chính phủ sồr ală Ƀộ, gah broă lơh dà lơgar mờ ală càr, ƀòn dờng sơlơ sền swì bơta niam xăng sinh học E10, lơh pràn broă lơh yal jơnau tơnggit, mblàng yal nàng kờñ lơh geh bơta ring bal tàm tŭ lam lơh; sơlơ tơnguh rlau tai broă sền swì mờ pơgồp bal nền nòn mờ Anih duh broă Làng bol ƀòn dờng Hà Nội tàm broă lam lơh ală rơndap broă lơh dờng tàm ƀòn dờng. Tàm hơ̆, kờñ pal geh gùng dà broă lơh mùl màl nàng lam lơh ală rơndap broă lơh drơng ơm kis pa, bơt bơtàu wơl in nàng kờñ gàr kơ̆ rài kis mờ broă lơh ai làng bol tàm tiah gơtìp gơ rềng tài bơh rơndap broă lơh in. Bè tơngume do, ồng Nguyễn Thanh Hải - Kong kơnòl Anih duh broă Jak chài măi mok mờ Tiah ơm kis đơs là, jơnau yal kờñ pal bơ tơl tai bơta blac pơrlồm gam gơlik geh rềp ndo, hơ̆ là broă pơn jồ, bơklơn ală cau là cau dờng sơnam, cau jơh sơnam rê rlô lơh broă kĭ ală sră pơrgon ơm rlô să nàng tơngkah lài làng bol, mờ kung sồr ală tiah geh gùng dà bơsong bơta do: “Jơh dùl rài kis khi dê prap tềm pềr geh kàr lơi, gơ lơh bè bơrngơl gơla tong jơh công ty blac pơrlồm do in. Bè hơ̆ den tàng tàm jơnau yal kung pal bơ tơl tơngume do, do là bơta pa ngan mờ geh sền gròi uă ngan. Kung sồr anih lơh broă geh gơnoar git nền tàm ù tiah bơh ală sàh, càr lơi dê, bol he geh jơnau yal yă halà ờ mờ bol he atbồ bè lơi, bơsong bơta lơi”.

Sền gròi tus broă bơto bơsram, ồng Nguyễn Đắc Vinh - Kong kơnòl Anih duh broă Niam chài, Bơto bơsram pà git, lài do gùng dà broă lơh dà lơgar dê mìng ờ sa priă bơsram ai 2, 3 gah bơsram broă lơh bè mpồl phàu crong, lơh pơgru: “Bàr pe gah broă lơh krơi is mờ làng bol ờ hềt git tus bè năng lượng hạt nhân gam kờñ ngan, mơya gùng dà broă lơh ờ hềt tơl bơta gơ hòi gơ jà den tàng cau ờ hềt bài mut, mơya gơ kuơmàng ngan, den tàng gùng dà broă lơh là dà lơgar pal dong kờl mờ mùl màl tàm do là ờ tă priă bơsram, do là bơta kờñ mblàng yal làm uă tàm làng bol nàng làng bol in git, geh tai ală bơta sac rơ wah ai gah broă lơh bơto bơtê in, geh bơta sac rơ wah dipal nàng bơ tơl cau lơh broă dà lơgar in”.

Đơs tàm dar pơrjum, ồng Trần Thanh Mẫn - Chủ tịch Quốc hội đơs niam Anih duh broă Bơta kơp kờñ làng bol mờ Jat sền neh geh uă bơta tam gơl pa tàm broă lơh jơnau yal; mờ kung sồr pah nhai, Anih duh broă pơgồp bal mờ Mặt trận dà lơgar, tiah git bơta kơp kờñ, jơnau đơs, jơnau dan bơh làng bol dê nàng tơnguh rlau tai bơta niam jơnau yal. Ồng Trần Thanh Mẫn - Chủ tịch Quốc hội tơngkah: “Broă lơh bơta kơp kờñ làng bol jrô ơnàng rlau, ờ gơtùi mìng ơm wơl tàm wă làng bol, bơsong sră yal, pơyua jơnau đơs, jơnau dan. Mờ añ sồr bơta kơp kờñ làng bol pal là gah mờ gơtùi git gờñ nùs nhơm làng bol, là mpồl yal gùng dà broă lơh, là bơta đo was bơta niam đơng lam broă dà lơgar. Añ sồr tàm tơngai tus bal sền gròi 5 bơta. Dùl là ờ gŏ di lời bơta kơp kờñ làng bol lòt tơnơ̆ bơta ờ suk làng bol dê. He pal iat, pal git bơta geh ngan mờ đơs lài. Bàr là hơ jơnau đơs, jơnau dan cau tĕ khà dê pal ngan ngồn rlau. Khà hơ uă den pal geh cih dờp, mơya bơta đo was dut ndơl ờ di là geh sră nggal hơ wơl, mờ là broă hơ̆ geh bơsong halà ờ, làng bol gŏ gơ di gùng di dà halà ờ”.

Chủ tịch Quốc hội kung sồr, jat sền bơta kơp kờñ làng bol pal rơ wah di bơta gơ kòl, pal sac rơ wah loh broă. Broă gơlik geh gam geh cơng tàng den pal bơsong jơh, ờ gŏ di pleh. Broă neh bơsong di adat boh lam, jơh gơnăp gơnoar, ờ geh bơta gơlik geh pa den pal kơ̆ dơn hòi jà, mờ kung gàr kơ̆ bơta duh rơngòt adat boh lam, ờ lời jŏ jòng lơh roh lơngăp lơngai, rơndap tap sèng; tơnguh bơta niam jơnau yal bơta kơp kờñ làng bol; pal đơs di jơnau digơlan gơlik geh; jơnau bơh tài gơlik geh, anih cau kong kơnòl,  dan bơsong mờ mpồl jat sền tơnơ̆ tŭ đơs; jơnau đơs, jơnau dan nhai lài pal geh sồr lơh, sền swì tàm nhai tơnơ̆.