Đơs mut pơrjum, Củ tịc Mpồl duh broă Jơi bơtiàn bơh Quôk hội dê ồng Y Thanh Hà Niê Kđăm pà git, Quôk hội lam lơh jat sền dờng ngan rlau jơh mìng dùl tơngume “Cồng nha lam lơh jat ală Nghị quyết bơh Quôk hội dê bè broă rơndap lơh 5 nam, tơngai bơh nam 2021 tus nam 2025: Broă lơh jơnau kờñ dà lơgar  bơt bơtàu ƀòn lơgar pa; Broă lơh jơnau kờñ dà lơgar tơrmù rƀah kơ̆ kơljap; Broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn dùl êt nă cau mờ tiah kơh bơnơm”. Do là tơngume mìng dùl lơm bè jat sền cèng bơta tơrgùm bal mờ geh lam lơh nggùl tơngai lơh broă (tơngai bơh nam 2021 tus nam 2025).

Tus tŭ do, Mpồl jat sền neh lam lơh gàr di tơngai hơ pơrgon ai tơlik. Mpồl jat sền neh yal cồng nha jat sền mờ Củ tịc Quôk hội, ală Phó Củ tịc Quôk hội; yal Ủy ƀan Thường vụ Quôk hội in tàm pơrjum dơư 25 (geh lơh tàm nhai 8 pa do) mờ pơrjum dơ̆ 26 (geh lơh tàm nhai 9). Mpồl jat sền tŭ do gam đơng lam Mpồl dong broă mhar tơrgùm, cih dờp jơnau đơs bơh Ủy ƀan Thường vụ Quôk hội dê nàng cih jơnau yal tơrgùm jơh, yal dùl êt mờ Nghị quyết jat sền mìng dùl tơngume nàng yal Quôk hội in tàm pơrjum dơ̆ 6 geh lơh tàm nhai 10 tus do.

Củ tịc Mpồl duh broă Jơi bơtiàn đơs loh, ngai 12/9/2023, Cíñ phủ geh sră yal bè “Cồng nha lam lơh jat, bơta kal ke, kòl yan tàm broă lam lơh 3 Broă lơh jơnau kờñ dà lơgar tàm tơngai bơh nam 2021 tus nam 2023 mờ ai tơlik broă lơh, gùng dà broă lơh krơi is tă bơsong kal ke, kòl yan, tơnguh mhar tơngai lam lơh ală broă lơh tàm tơngai tus”, tàm hơ̆ đơs 2, 3 bơta kal ke, kòl yan tàm broă lam lơh 3 Broă lơh jơnau kờñ dà lơgar mờ ai tơlik  jơnau sồr, jơnau dan bè 2, 3 broă.

Cíñ phủ sồr ai gơnoar tơn jŏ tơngai lam lơh, ai priă bơcri tus jơh ngai 31/12/2024 gơ wèt mờ priă bơcri kes priă dà lơgar bơh ală Broă lơh jơnau kờñ dà lơgar ờ hềt geh ai priă bơcri jơh tàm nam 2023 do; tơn jŏ tŭ tơngai, ờ hềt yal Quôk hội sền sơ wì, lơh nền gùng dà broă lơh lam lơh tơrlòng lài tam pà kâp ai kâp kơnhoàl in tàm broă atbồ, lam lơh ală Broă lơh jơnau kờñ dà lơgar tàm pơrjum dơ̆ 6 bơh Quôk hội dê.

Củ tịc Mpồl duh broă Jơi bơtiàn bơh Quôk hội dê ồng Y Thanh Hà Niê Kđăm đơs là, ală tơngume pa đơs là kuơmàng ngan, gơ rềng tơn tus uă gah broă bơh rài kis mpồl bơtiàn dê, ngan là cau rƀah, làng bol jơi bơtiàn dùl êt nă cau, tiah kal ke, tiah uă kal ke bơh dà lơgar dê. Mờ nùs nhơm lòt bal, bơt bơtàu bal mờ Cíñ phủ, tàm dơ̆ pơrjum do, Củ tịc Mpồl duh broă Jơi bơtiàn bơh Quôk hội dê ồng Y Thanh Hà Niê Kđăm sồr ală kwang bàng bal mờ gơp cribơyai, jòi geh broă lơh nàng bơsong ală jơnau dan, jơnau đơs, bơh bơta geh ngan ai tơlik.

Đơs pơn dut pơrjum, Củ tịc Mpồl duh broă Jơi bơtiàn bơh Quôk hội dê ồng Y Thanh Hà Niê Kđăm pà git, tơnơ̆ dùl tŭ tơngai lơh broă sơrbac mhar, jơh nùs mờ geh kơnòl, mờ uă jơnau đơs tơrgùm bal, dơ̆ pơrjum neh lơh gơs tơngume ai tơlik.

Ala mat mpồl jat sền, Củ tịc Mpồl duh broă Jơi bơtiàn đơs loh, Mpồl jat sền cih dờp mờ jờng rơ nùs nhơm, kơnòl broă bơh kwang bàng tàm mpồl jat sền dê tàm dơ̆ pơrjum. Kuơmàng, ală jơnau đơs neh đơs di tơngume tờm, bơta tờm, lơh gơlik bơta ring bal bè jơnau git wă, kơnòl broă, ai tơnggŏ loh làng nùs nhơm bơh Quôk hội dê lòt bal mờ Cíñ phủ nàng tơnguh mhar tơngai bơsong ală kal ke, kòl yan tàm broă lam lơh ală Broă lơh jơnau kờñ dà lơgar.

Nàng di tŭ tă bơsong kal ke, kòl yan, tơnguh mhar tơngai lam lơh ală Broă lơh jơnau kờñ dà lơgar tàm tơngai tus, Củ tịc Mpồl duh broă Jơi bơtiàn ồng Y Thanh Hà Niê Kđăm sồr Ƀộ Kế hoạc mờ Đầu tư (anih duh broă sùm Mpồl đơng lam ală Broă lơh jơnau kờñ dà lơgar) pơgồp bal jơh nùs mờ Mpồl dong broă Mpồl jat sền mờ ală anih lơh broă geh gơ rềng nàng tơrgùm wil tơl ală jơnau đơs bơh Mpồl jat sền dê, lơh sir Jơnau yal jat sền. Jơnau yal dùl êt, jơnau rơcang cih Nghị quyết mờ sră nggal geh gơ rềng, yal Quôk hội in tàm pơrjum dơ̆ 6 jat di jơnau sồr. Mờ kung sồr Mpồl dong broă Mpồl jat sền rơcang lài ring bal mờ Ƀộ Kế hoạc mờ Đầu tư, bal mờ ală Ƀộ, gah broă lơh geh gơ rềng bè ală tơngume cribơyai tàm Dơ̆ pơrjum do nàng lơh sir jơnau rơcang cih Nghị quyết, pơyua dan jơnau đơs bơh Ủy ƀan Thường vụ Quôk hội dê.