Tŭ bơta chài măi mok mờ tam gơl sồ ờ gam là jơnau krơi sơƀơi tai, mờ neh gơs phan lơh broă tờm ngan, uă cau ùr jơi bơtiàn ờ gal cau neh git bơta niam do. Mờ broă bơceh lơh, cau ùr ờ mìng lơh pas ai hìu nhă in mờ gam lơh geh uă bơta kwơ niam chài krơi is bơh jơi bơtiàn dê, pơgồp bal tàm broă lơh geh mùl màl jơh ală jơnau kờñ tàm Rơndăp breoă lơh 8 “Lơh jăt ring bal cau klao mờ cau ùr mờ bơsong ală bơta jal mhar ai cau ùr mờ kơnòm dềt in” gơwèt Broă lơh jơnau kờñ dà lơgar bơtàu tơnguh lơh sa mpồl bơtiàn tiah làng bol jơi bơtiàn ờ gal cau mờ tiah kơh bơnơm. Dùl tàm ală jơnau lơh geh gơjà bal hơ̆ là broă lơh bơh lŏ Khà Thị Hạnh dê, do là ùr ơruh kòn cau Thái tus bơh càr Lai Châu. Kis mờ dờng tàm tiah kơh bơnơm, lŏ Hạnh wă loh bơta kwơ bơh ală tờm chi sơnơm gùt dar lŏ dê. Git gŏ broă lơh sơnơm yau ờs mờng gam rơhời ờ hoan geh cau git tus, lŏ neh lơh ngan bơsram tus gùng tus dà tàm Hìu bơsram Y Dược Lê Hữu Trác.

Mờ jơnau neh geh bơsram nền nòn, lŏ Hạnh ờ mìng git nền ală bơta sơnơm yau mờ gam git tàm broă ngui bơta chài nàng lơh ală bơta phan geh chi che lơh sơnơm gơs đềt mềr mờ ƀuơn ngui rơlao. Ngui bơta pràn bơh TikTok, lŏ Khà Thị Hạnh neh lơh geh gah pờ  “Tây Bắc TV”. Ală video niam, mùl màl geh kŭp wơl broă jòi, pic, lơh chi che lơh sơnơm bal mờ ală jơnau tam pà bal ƀuơn wă bè broă ngui neh hòi jà gal cau sền, dong kờl broă lơh sơnơm bơh chi che tiah Tây Bắc dê tus rềp rơlao mờ ală cau. “Tŭ bơtàu tơnguh gah online Tây Bắc TV den lài ngan bol oh lơh geh dùl gah lài. tơnơ̆ mờ tơngai ờ jŏ, bol oh ai ai tơngŏ bơta pràn bơh să tờm dê mờ tăc geh uă ngan ală phan geh lơh bơh broă lơh sa suơn sre, chi lơh sơnơm. Oh gŏ là, di lah mìng dùl nă bol oh lơh den gam ală oh mi ndai tai bè lơi? Den tàng bol oh neh lơh tai uă gah pờ mờ bơto sồr ai uă ngan oh mi cau ùr tàm tiah ngài in kung bè tơngu me OCOP nàng git lơh bè lơi nàng ai phan geh lơh bơh să tờm dê tơmŭt tàm online”.

Lài ngan, lŏ Khà Thị Hạnh mìng kờñ tam pà jơnau git wă. Mơya ală jơnau đơs wơl niam bơh ală cau blơi, ală jơnau yal bè broă phan geh lơh bơh să tờm dê geh dong kờl ală cau in pràn kơl dang rơlao neh pơn jăt tai geh bơta pràn ai lŏ in. Lŏ Khà Thị Hạnh git là:

“Oh gŏ kòn bơnus tam gơl mờ mpồl bơtiàn tam gơl. Di lah mpồl lơh sa kă bro añ dê mờ ờ bài tam gơl jăt bal den hơ̆ là añ rơ̆p gơtìp lơyài. Rơlao tai Lai Châu là dùl ù tiah geh uă ngan phan geh lơh bơh broă lơh sa suơn sre krơi is, tàm hơ̆ uă ngan là chi lơh sơnơm geh kwơ màng ngan. Mơya di lah mìng kơ̆p tàm cau năc lòt nhơl tus den kal ke ngan, bơta bè tăc phan gơtìp lơyài uă ngan. Mờ oh gŏ cau blơi gam tàm online den cau blơi tàm tiah lơi den he pal tus tàm tiah hơ̆”.

Tiah làng bol jơi bơtiàn ờ gal cau mờ tiah bơnơm là tiah ơm kis bơh rơlao 14 tơlăk 600 rơbô nă cau, geh mờr 15% khà kờp làng bol gùt lơgar dê, mờ khà hìu rơƀah mờr 22%, uă rơlao git nđờ dơ̆ pơn drờm bal mờ gùt lơgar dê. Cau ùr Jơi bơtiàn ờ gal cau là mpồl cau gơtìp gơrềng uă ngan bơh bơta kal ke jơgloh rơƀah dê. Mờ tàm hơ̆ tai, bơta ờ ndrờm bal kung gam loh làng: khà cau làng bol jơi bơtiàn ờ gal cau ngui Internet mờ ngui măi tính gam ờ uă ngan pơn drờm mờ bơta bal dê, lơh gơtìp gơkòl tus mờ bơta niam geh bơh lơh sa sồ dê.

Mơya, tàm bơta lòng sùm geh bơta niam. Cau ùr Jơi bơtiàn ờ gal cau là ală cau git wă bơta jăk chài ù tiah kwơ màng, là cau tờm bơh phan geh lơh bơh broă lơh sa suơn sre krơi is, lơh gơs phan ngui niam. Do là bơta tờm krơi is, là “tiah biàng” di lah geh lơh di pal tàm lơh sa pa dê. Jơnau bơh lŏ Khà Thị Hạnh là cơng tàng niam bơnĕ ngan ai broă dùl nă cau ùr Jơi bơtiàn ờ gal cau gơtùi tơrbŏ bal broă lơh ờs mờng mờ lơh broă pa nàng cèng geh ală bơta kwơ màng ai mpồl bơtiàn in. Bơh broă lơh is gah pờ “Tây Bắc TV” mờ tăc phan geh cồng nha phan geh lơh bơh broă lơh sa suơn sre, chi lơh sơnơm, lŏ gam rơcang lơh tai uă gah pờ ndai, bơto sồr uă oh mi cau ùr tàm tiah ngài in mờ ală cau tờm OCOP tàm broă ai phan tơmŭt tàm online. Git nền ală bơta lòng mờ bơta niam do, Cíñ phủ neh lơh pràn. Rơndăp broă lơh 8 tàm Broă lơh jơnau kờñ dà lơgar dê là dùl cơng tàng pà gŏ loh làng ngan. Củ tịc Mpồl Tam klăc Caau ùr Việt Nam mò Nguyễn Thị Tuyết đơs ngan: “Jơnau kờñ bơh Rơndăp broă lơh 8 là tơngu uă jơnau git wă, tam gơl nùs nhơm kơlôi sơnơng, drơng gàr rài kis phan bơna, nùs nhơm, sền gàr, drơng gàr cau ùr mờ kơnòm dềt in, lơh jăt jơnau kờñ ring bal cau klao mờ cau ùr mờ tơnguh gơnoar cau ùr dê tàm broă bơtàu tơnguh lơh sa mpồl bơtiàn”.