Cau ala mat Nguyễn Xuân Nghiêm, mpồl Đà Nẵng đơs là, tơrgùm bal wơl 4 broă lơh jơnau kờñ dà lơgar gơ gơs dùl broă lơh bal là dùl bơta tam gơl dờng ngan ờ mìng bè khà broă lơh mờ là tam gơl broă rơndap lơh lam lơh gùng dà broă lơh bơtàu tơnguh tàm ală tiah kal ke. Bè hơ̆ den tàng, jơnau pal jat sùm hơ̆ là tơrgùm wơl gơ pal ngan ngồn; ờ gŏ di lơh gơmù bơta ai lài gơ wèt mờ ală kơnhoàl ù tiah, ală cau gam kal ke; mờ kung tam pà kâp pal gơ lòt bal mờ pràn jak, priă jền mờ cồng nha broă lơh pal geh kờp mờ cồng nha mùl màl: “Dilah neh git nền do là dùl broă lơh jơnau kờñ dà lơgar mìng dùl lơm den kờñ pal geh dùl jơnau kờñ lơh geh bal, dùl logic gùng dà broă lơh ring bal, dùl gùng dà đơng lam pơgồp bal priă jền mờ dùl broă lơh đơng lam broă ring bal. Añ ờ đơs là, tơrgùm wơl ờ gŏ di là sang tĕ ală jơnau kờñ, ală cau halà gùng dà broă lơh krơi is bơh tơl gah broă dê, sơ lơŭ wơl, ală gùng dà broă lơh krơi is kung gam pal geh sền gàr, ală broă lơh bơt bơtàu broă rơndap lơh, đơng lam pơgồp bal  priă jền, rơndap lơh lam lơh jat, jat sền mờ sền swì pal geh bơta ring bal. Is ồn, tơrgùm wơl pal lơh gơlik bơta pràn đơng lam pơgồp bal priă jền niam rlau, ờ di mìng là tơrgùm dùl priă bơcri”. 

Jat cau ala mat Nguyễn Thị Yến Nhi, mpồl càr Vĩnh Long, bồ tơngoh kơlôi sơnơng bơh broă lơh jơnau kờñ dà lơgar dê pal tam gơl pràn jat gùng dà Dà lơgar dong kờl nàng làng bol in bơtàu tơnguh is. Tài tơrmù rƀah kơ̆ kơljap jŏ jòng sùm pal geh kờp mờ cồng nha lơh geh (tơnơ̆ dong kờl, làng bol geh broă lơh halà ờ, priă jền lơh geh gơguh halà ờ, geh broă lơh sa kơnhăp kơ̆ mờ gơtùi ơm kơ̆ is halà ờ: “Kờñ pal ai lài ală rơndap broă ai geh broă lơh, tơnguh priă lơh geh, lơh bal lơh sa, lơh gơlik phan, tac phan, bơto broă lơh gơ jat bal mờ jơnau kờñ drà kă bro, tam gơl sồ, kă bro phan tàm điện tử, lơh gơlik phan tiơng pơn rơ krơi is, lòt nhơl mpồl bơtiàn, lòt nhơl sền broă lơh sa suơn sre, lòt nhơl niam chài. Añ sồr tàm jơnau sền swì broă lơh kờñ pal tam gơl dùl bă kuơmàng, ờ gŏ di ai khà ai priă bơcri lơh bơta đo was dờng ngan rlau jơh cồng nha lơh geh dê. Dùl rơndap broă lơh ai priă bơcri 100% mơya tơnơ̆ tŭ tơn jơh làng bol kung gam rƀah, broă lơh tơrlòng lài ờ geh gàr sùm den ờ gơtùi sền là cồng nha. Sơ lơŭ wơl, dùl rơndap broă lơh dong làng bol geh broă lơh sa, tơnguh priă lơh geh lik klàs rƀah kơ̆ kơljap jŏ jòng sùm mờ lơh broă is tơnơ̆ dong kờl den hơ̆ sồng là cồng nha mùl màl”.

Đơs sùm, cồng nha broă lơh dê kờñ pal kờp mờ bơta tam gơl: Bơh atbồ rah rài gơ gơs atbồ tơrgùm dùl; bơh atbồ ală bơta bơh chờm gơ gơs atbồ jat cồng nha lơh geh; bơh dà lơgar lơh nền uă broă mùl màl gơ gơs ƀòn lơgar rơcang lài, kong kơnòl mờ geh gròi sền mờ cồng nha lơh geh. Cau ala mat Bùi Văn Dũng, mpồl càr Thanh Hóa geh jơnau đơs:

“Añ ring bal mờ jơnau pal jat là ƀòn lơgar lơh nền, ƀòn lơgar lam lơh jat mờ kong kơnòl bè cồng nha lơh geh. Dà lơgar atbồ jơnau kờñ lơh geh, gùng dà broă lơh, jơnau sồr tơl khà mờ sền swì, jat sền. Mơya tam pà kâp pal ngan ngồn, jàu kơnòl pal gơ lòt bal mờ gơnoar lơh nền mờ bơta pràn đơng lam pơgồp bal priă jền. Kờñ pal tam gơl bơh dà lơgar gròi sền broă rơndap lơh gơ gơs dà lơgar gròi sền jơnau kờñ lơh geh, jơnau sồr tơl khà mờ cồng nha. Mờ añ dan Chính phủ pal jàu ai dùl anih lơh broă atbồ in đơng lam broă lơh tơrgùm bal wơl do”.

Cau ala mat Lý Thị Lan, mpồl càr Tuyên Quang sồr lơh loh rlau gơnoar rơcang lài ƀòn lơgar dê tàm sac rơ wah broă lam lơh. Ală bơta mờng chài lơh broă, jak chài măi mok mờ kâp sàh ờ hềt tơl pràn jak den kâp càr kờñ pal geh kơnòl pơlam, dong kờl. Bè broă rơndap lơh, ƀòn lơgar pal gàr ai tơl priă jền tàm pơndrờm tàm broă rơndap lơh bơcri priă dà lơgar dimơ tơngai, kờp dŭ lài dơ̆ ngui kes priă pah nam jat khà êt ngan rlau jơh, cau ala mat Lý Thị Lan đơs loh: “Gơwèt mờ ală càr tiah kơh bơnơm, tiah nhàr lơgar, gal làng bol jơi bơtiàn dùl êt nă cau ờ hềt gơtùi tàm pơnring is kes priă. Jat añ den broă rơndap lơh do kờñ pal geh kờp dŭ nền nòn rlau, ală ƀòn lơgar do sùm geh khà cau dờp kuơ uă ngan, jơnau kờñ bơcri priă uă den tàng priă jền Dà lơgar tam pà uă. Dilah git nền tàm pơndrờm jat khà priă bơcri Dà lơgar jàu den khà mờ ƀòn lơgar pal ai rơp gơguh, tàm tŭ bơta pràn tàm pơnring kes priă den ờ huan niam, digơlan gơlik geh bơta Dà lơgar neh ai priă jền mơya ƀòn lơgar ờ gơtùi ngui jơh tài ờ gơtùi gàr tơl priă bơcri tàm pơndrờm”.

Mblàng lơh loh tơngume cau ala mat pa đơs, ồng Ngô Văn Tuấn - Ƀộ trưởng Ƀộ Priă jền pà git: ​​​​​​​“Kung gam gàr bè ờs priă jền mờ 4 broă lơh neh geh Quốc hội lơh nền. Kes priă dà lơgar rơp dong kờl ală ƀòn lơgar ờ tàm pơnring is in, halà geh tàm pơnring mơya ờ geh tă pơgồp Dà lơgar in. Tam pà mờ dong kờl bơh Dà lơgar den jat jơnau pal jat, jat tàm bơta kal ke, jat tàm bơta yah ngài đah tu dŏ mờ jơnau kờñ ai tơlik, tàm hơ̆ ai lài sền swì bè tơngai hơ pơrgon ai priă bơcri, cồng nha atbồ, ngui priă bơcri. Mờ is ồn tàm Jơnau rơcang cih Jơnau lơh nền kung đơs ngan, dong kờl is ồn gơ wèt mờ làng bol jơi bơtiàn dùl êt nă cau tiah kơh bơnơm”.