Càr An Giang geh gùng tiah nhàr lơgar jòng mờr 100 kơi sồ, rềp nhàr bal mờ càr Takeo mờ Kandal, lơgar Campuchia dê. Uă nam do, bơta mŭt mờ lik gan tiah nhàr lơgar tìs mờ adat boh lam kung gam gơlik geh sùm gơ jat bal bơta pơhìn gơlik geh ală dơ̆ broă kal ke bè kă bro kòn bơnus, hoài jà, pơrlồm ală cau lơh broă rƀah tus lơgar đah ne tiah nhàr lơgar tăc ai ală mpồl cau, cau dùl nă să is in nàng rồn bơklơn cau lơh broă. Ngan là ală broă mŭt mờ lik gan tiah lơgar tìs mờ adat boh lam nàng kờñ kă bro, jun pơdiang phan kă bro tìs mờ adat boh lam lòt gan tiah nhàr lơgar.Nàng di tŭ sền gŏ, kơryan ală cau mŭt tàm lơgar tìs mờ adat boh lam lòt gan tiah nhàr lơgar, ngan là tàm tơngai lồi nam do, ală mpồl lơh broă geh gơnoar gam ngai mang pơnđơl pràn lơh ngan nàng kơryan. Bơdìh mờ mpồl ling sền gàr tiah nhàr lơgar gam geh bơta pơgồp bal niam ngan bơh ală mpồl bè kwang àng, hải quan lơh jat bal kơnòl broă.

Tŭ do, ală cau kă bro phan tìs mờ adat boh lam sơmờm kàl dà tih, trồ mang jơngo, tiah geh làng bol ơm kis 2 gah tiah nhàr lơgar kis rềp bal ... nàng tơrgùm phan bơna tìs mờ adat boh lam, jun pơndiang mờ khà uă ngan. Pa do, tàm tiah ƀòn Vĩnh Xuyên, sơnah ƀòn Núi Sam, ƀòn dờng Châu Đốc, Mpồl lơh broă gơwèt mpồl Kảñ sát lơh sa Kwang àng càr pơgồp bal mờ Kwang àng ƀòn dờng Châu Đốc neh sền gŏ mờ ting kŭp, kŭp geh 2 nă cau bal mờ phan bơna geh gơrềng, tàm hơ̆ geh: 400 kơdung jràu, 1 măy rơkị măy mờ 4 nơm rơndeh măy.

Thượng tá Nguyễn Đăng Khoa, Phó kwang atbồ Kản sát lơh sa Kwang àng càr An Giang pà gĭt: Mpồl tăc blơi kơñau adat boh lam jràu chu pa geh kŭp, cồng nha kŭp mìng geh 400 kơldung jràu lơm, mơya mờ tàm mpồl tăc blơi hơ̆ mờ tŭ hơ̆ khi jun pơdiang sră cih là rlau 1 rbô kơl dung jràu, phan bơna bè hơ̆ là ờ dùl ết ờ, mơya tài bơh ù tiah kal ke den mìng kŭp geh 400 kơl dung jràu lơm, gam wơl là ntoăt dô rê wơl đah ne. Tŭ do, sơmờm kàl dà tih, ală cau kă bro tìs mờ adat boh lam sùm tam gơl gùng lòt, ù tiah, broă lơh tiah lơh broă, den phan bơna kă bro tìs mờ adat boh lam geh gùng dà sơlơ uă mờ gơguh.

Đại tá Lý Kế Tùng, Phó Gah đơng lam Mpồl ling sền gàr tiah nhàr lơgar càr An Giang pà gĭt, bơh bồ nam 2022, neh sờr tă ƀà ală Anih atbồ, sền gàr tiah nhàr lơgar mờ rcang sơndră kòp Kovid-19. Ală anih sền gròi dùl ết tĕ, pơgap ngài đah ală anih atbồ ngài rlau, den cau kă bro phan tìs mờ adat boh lam kung sơmờm tiah do. Ală cau kă bro tìs mờ adat boh lam lơh broă ngai sơlơ rơlăc rơlèo rlau tai, ngui tơl broă lơh nàng jun pơndiang phan tìs mờ adat  boh lam; khi jun pơndiang mờ sền gŏ mpồl lơh broă sơndră mờ bol kă bro phan tìs mờ adat boh lam, ală cau do sang tĕ jơh phan bơna, rơndeh rơndồ, geh tŭ lơh gơ kram jơh plung jun pơdiang phan tàm dà den hơ̆ sồng ntoăt dô klàs să jan; nàng pleh gơtìp yă tŭ gơbàn kŭp, ală cau do ờ cèng pơndiang uă ir mờ jơnau sồr; geh tŭ ală cau kă bro tìs mờ adat boh lam mpồn phan geh kwơ bè biàng, phan bơka să jan  ơn prap tàm phan bơna kă bro bè ờs nàng lòt gan mpồl lơh broă geh gơnoar mờ gùng tiah nhàr lơgar... Ngan là, pa do, neh geh bàr pe dơ̆ jun pơndiang ma túy, ală cau do neh cèng bal phàu.

Đại tá Lý Kế Tùng pà gĭt tai: Tàm broă tam dră mờ ală cau lơh tìs kă bro phan tìs mờ adat boh lam geh uă ngan bơta kal ke; khà cau gơtìp pơn jồ tus bal kă bro phan tìs mờ kơrnoat boh lam gơguh; dơ̆ 2 là, ngan tài bơh lir priă jền lơh geh uă ngan den cau kung kơldang bồ lòt kă bro tìs mờ adat boh lam mờ kơl dăng nùs sền gàr phan bơna bơh cau ndai dê, pleh lơh hoàc huơr, pleh gơtìp cau atbồ bồ lơh glài, den tàng bol khi khin bơrañ ngan, tam dră wơl mờ mpồl lơh broă geh gơnoar. Bơdìh mờ broă rơlăc rơlèo tàm broă lơh dê, ală cau do gam sơmờm broă lơh tàm pơdar sră pơ àr; ală cau jun pơndiang phan geh pin là blơi phan bơh lơgar ndai tìs mờ adat boh lam, den pơndiang wơl phan kă bro tìs mờ adat boh lam bơh càr ndai rê tàm An Giang halà pơn diang phan tìs mờ adat boh lam lòt gan càr An Giang. Kwang àng, Hải quan... neh sền gŏ mờ kŭp uă dơ̆ broă pơn diang phan bơh ƀòn dờng Hồ Chí Minh mờ bơh Bình Dương rê tàm do.

Bơh bồ nam tus tŭ do, Ală mpồl ling lơh broă geh gơnoar tàm càr An Giang neh lòt sền, sền gŏ mờ kŭp rlau 140 dơ̆, bè broă lơh tăc blơi, kă bro, jun pơdiang phan kơryan ờ ai, phan kă bro mờ lơgar ndai tìs mờ adat boh lam, blơ̆ blăc kă bro mờ phan bơna ờ ngan tàm tơngai tus. Kờp jơh priă jền bơh phan bơna do dê  geh mờr 120 tơmàn đong. Kờp jơh khà priă lơh glài mờ priă bơh broă tăc phan bơna neh kŭp gơguh rlau 6 tơmàn đong pơndrờm mờ nam 2021. Mpồl lơh broă geh gơnoar neh yă 29 tàm 40 dơ̆ lơh tìs; yă 31 tàm 69 nă cau; kờp priă phan bơna gơtìp yă là rlau 30 tơmàn đong.

Nàng lơh jat niam broă lơh tam dră kơryan broă mŭt mờ lik gam nhàr lơgar tìs mờ adat boh lam, kơryan tăc bro kơñau phan mờ lơgar ndai, blơ̆ blăc kă bro mờ phan ờ ngan tàm tơngai tus, càr An Giang geh pơn jat tai gàr niam ală Mpồl lơh broă rcang sơndră kă bro phan tìs mờ adatboh lam tàm gơl gùng tiah nhàr lơgar. Ală mpồl Kwang àng, Hải quan, mpồl ling sền gàr tiah nhàr lơgar, Atbồ drà kă bro... pơn jat tai tơnguh broă lơh pơgồp bal tàm broă tam dră, kơryan kă bro phan tìs mờ adat boh lam, jun pơndiang tìs mờ adat boh lam phan bơna lòt gan tiah nhàr lơgar. Ngan là sền gròi tam gơl pa, tơnguh uă broă lơh mblàng yal, bơto bơtê, hòi jà làng bol tàm tiah nhàr lơgar bañ dong ală cau kă bro tìs mờ adat boh lam, tus bal yă cau lơh tìs, sơm bat tê bal mờ ală mpồl lơh broă geh gơnoar tàm broă lơh tam dră, kơryan kă bro phan tìs mờ adat boh lam, blơ̆ blăc kă bro mờ phan ờ ngan.