Bơh nggùl nhai 3 lài do, tŭ lơgar Việt Nam geh tơrbŏ wơl ală gùng par dunia mờ pờ mpồng jơh ală broă nhơl chờ, càr Quảng Nam neh wă git nđờ rơbô nă cau năc tus bơh dunia. Tơnơ̆ mờ rơlao 2 nam gơrềng bơh kòp Kovid-19, mò Debbie Baker, cau năc tus bơh lơgar Mỹ hơ̆ sồng geh dơ̆ tus wơl lơgar Việt Nam.

Mò rơwah kơnhoàl tiah kơh bơnơm, tiah nhàr dà lơgar Đông Giang, càr Quảng Nam lơh tiah tus. Mò Debbie Baker yal, ală phan nhơl chờ tơlir, nhơl chờ lơh broă nàng git bơta mờng chài geh gơboh kờñ ngan tàm tŭ do. “Añ di nùs nhơm tŭ tus lơgar Việt Nam, añ bơgoh mờ lơgar Việt Nam bal mờ kòn bơnus tàm do. Ală ngai ơm tàm do là ală ngai niam bơnĕ nga n gơwèt mờ añ, tàm hơ̆ uă ngan là tŭ geh lơh mờ sền nàng git bơta mờng chài lơh chờ bơta chài rơgơi niam bơnĕ ngan, ù tiah geh is niam bơnĕ. Làng bol kis tàm do đềt mềr ngan. Añ gơboh ngan mờ phan sa bơh làng bol kis tàm do dê”.

Lài mờ tŭ kòp Kovid-19 gơtờp, pah nam ală kơnhoàl tàm tiah kơh bơnơm càr Quảng wă git nđờ rơhiang nă năc nhơl chờ tus. Uă tiah tus geh cau năc nhơl chờ tàm lơgar mờ lơgar bơdìh git tus bè Đỉnh Quế, brê chi phan lời wơl Pơ Mu, ƀòn nhơl chờ mpồl bơtiàn Hlơ Hoồng... Uă dơ̆ tus kơnhoàl tiah kơh bơnơm Tây Giang, lŏ Lương Thị Hương, Kwang atbồ cơl dŭ lơh broă rơndăp broă lơh Children Of Việt Nam neh yal uă cau tus bơh dunia tus tàm do lơh nàng git ală broă mờng chài, ală lơh chờ niam bơnĕ kòn cau Kơ Tu dê. Jăt lŏ Lương Thị Hương yal, bơdìh mờ trồ tiah mrềt niam, kòn bơnus đềt mềr den ù tiah brê bơnơm niam geh uă bơta, geh prăp gàr gam bè ờs tàm kơnhoàl Tây Giang dê là bơta niam nàng tơnguh bơtàu nhơl chờ tàm brê bơnơm dê. “Bơta lơh nùs nhơm añ niam bơnĕ ngan là cau gam gàr chi brê Pơ Mu, cau cih sồ kờp tơl tờm mờ jào làng bol sền gàr gàr. Bơdìh hơ̆ tai, añ kung di nùs nhơm mờ broă lơh chờ bơh làng bol kis tàm do dê, tamya Tâng tung da dá geh lơh niam ngan tàm nùs nhơm cau năc, añ neh tus bal uă dơ̆ mờ bol añ tus bal mờ ală cau tàm broă tamya hơ̆”.

Uă nam do, kơnhoàl Tây Giang neh wă geh ală mpồl cau năc tus bơh dunia tus bal ală dơ̆ nhơl chờ mpồl bơtiàn, sền nàng git rài kis, bơta chài rơgơi kòn cau Kơtu. Bi Pơloong Plênh, kwang bàng lơh broă tàm Cơl dŭ Chài rơgơi mờ yal tơngit kơnhoàl Tây Giang, là cau tơrbŏ bal, ai geh broă bơh ceh lơh bè nhơl chờ lơh broă nàng git bơta mờng chài. Tàm ală dơ̆ lòt bal mờ cau năc tus sền chi brê phan lời wơl Pơ Mu, klao pơnu kòn cau Kơtu do neh lơh cau năc dunia ngoh rơngăc ngan tŭ đơs dà Mỹ nàng yal bè bơta chài rơgơi bơh làng bol bi dê. “Añ kờñ ală bơta kwơ chài rơgơi niam bơnĕ geh bơto wơl nàng ală tiah tàm gùt lơgar bal mờ tus mờ bơyô ală lơgar bơdìh in git bal. Lài ngan den kung tìp uă ngan kal ke, ờ wă bal bè dà đơs, hơ̆ sồng bơta chài rơgơi phan sa bơh ală cau năc dê krơi is ngan mờ he dê, mơya ală cau năc do kờñ ngan tus tàm suơn, geh at ngkơr kao pŏ ù, jì ñhơ̆t, hơ̆ sồng tam biăp tus trồ mang chu gơnru ồs tamya bal mờ làng bol”.

Lài mờ tŭ kòp Kovid-19 gơtờp, càr Quảng Nam neh ai gùng dà pờ ơnàng tiah nhơl chờ, lơh jơh bơta geh tàm tiah kơh bơnơm hờ đah măt tơngai mŭt mờ bơta niam brê bơnơm geh uă bơta, bal mờ bơta chài rơgơi kòn cau niam bơnĕ ngan. Ồng Arất Blúi, Phó Củ tịc UɃÑZ kơnhoàl Tây Giang, càr Quảng Nam pà git, nhơl chờ tiah kơh bơnơm hờ đah măt tơngai mŭt càr Quảng Nam pal geh bơcri priă di pal nàng tơnguh jơh bơta geh neh geh lài. “Bol añ kơ̆p kờñ Dà lơgar bal mờ càr Quảng Nam bơcri uă rơlao tai priă nàng bơ̆t bơtàu phan bơna, dong kờl broă lòt rê geh niam, geh ală rơndăp broă lơh, broă dong kờl tơnguh bơtàu bơta chài rơgơi, tàp pràn să jan, nhơl chờ. Pal sền gròi tus ală bơta kwơ chài rơgơi phan bơna bal mờ ờ di phan bơna nàng prăp gàr mờ pơn jăt tai lơh geh uă rơlao”.

Tàm gùng dà tơnguh bơtàu càr Quảng Nam, 5 nam tus, càr geh sền kwơ broă tơnguh bơtàu nhơl chờ tiah kơh bơnơm hờ đah măt tơngai mŭt. Ồng Lê Trí Thanh, Củ tịc UɃÑZ càr Quảng Nam pà git, tơnguh bơtàu nhơl chờ tiah kơh bơnơm càr Quảng Nam ờ gơtùi tam cah is mờ broă prăp gàr mờ tơnguh bơtàu bơta niam brê bơnơm mờ prăp gàr bơta chài rơgơi tàm tiah do. Di lah prăp gàr mờ tơnguh bơtàu di gùng dà, do là ală bơta kwơ tờm ngan, ai geh muh măt pa tus mờ broă nhơl chờ càr Quảng Nam dê tàm tơngai tus. “Pơn jăt tai tơnguh bơtàu nhơl chờ tàm ală tiah geh tơl pràn nàng lơh bè nhơl chờ brê bơnơm, nhơl chờ khin bơrnañ mờ ơm rơlô să. Nhơl chờ brê bơnơm pơgồp bal mờ bơta chài rơgơi tàm tiah do bơh làng bol kòn cau kis tàm tiah kơh bơnơm dê. Jơh ală bơta nhơl chờ dờng mờ dềt geh tơrgùm bal nàng ai geh dùl bơta niam pa ai nhơl chờ tiah đah măt tơngai mŭt càr Quảng Nam dê”.