Kwơmàng, broă lơh broă sa sươn sre jăt gùng dà ngui măy mok jak chài pa neh dong làng bol sơrbac mhar sơrlèt gan ală kal ke tài bơh kòp Kovid-19 lơh bơtờp, brồ guh bơtàu tơnguh pràn kơldang.

Lam bol añ lòt còp sươn plai zơu tây hòn gơs niam ngan tàm gùl ală sươn biăp, bơkàu tàm sươn lơh broă sa sươn sre ngui kông nghệ kao, ồng Lơ Mu Ha Pier, ơm tàm thôn B’Nơr B, thị trấn Lạc Dương, kơnhoàl Lạc Dương, càr Lâm Đồng chờ hờp ngan đơs, hơ̆ là cồng nha lơh broă tam tơngai lơh jăt jơnau sồr ơm yah ngài tài bơh kòp Kovid-19. Tŭ hơ̆, jơh ală phan lơh gơs bơh sươn sre drà tăc ndrờm kal ke lơm, hìu bơnhă ồng khin cha tam gơl dùl bă ù tam biăp nàng tam tờm plai zơu tây. Tŭ sươn tờm plai zơu tây sơnđờm gơ ai plai, kung là tŭ jơh gùt lơgar tam gơl tus jơnau bè ờs pa. Ală broă lơh sa bơh hìu bơnhă dê sơrbac mhar tơn geh lơh wơl mờ kơ̆ kơl jăp. Ồng Lơ Mu Ha Pier, pà gĭt, bơh tŭ hơ̆ tus tŭ do, lơh sa hìu bơnhă ồng dê neh lòt guh dùl cơnđoà pa. Ồng Lơ Mu Ha Pier, đơs: Tàm ală tŭ kòp Kovid-19 lơh bơtờp den làng bol tàm do ờ lời sơrbì sươn sre he dê, kung gam pơn jăt tai sền gàr. Den tàng bè hơ̆, tơnơ̆ tŭ kòp neh kơryan geh den làng bol lơh geh tơn phan bơna bơh sươn sre nàng tơnhàu mờ gơ ai priă jền tơn. Bal mờ hơ̆, giă tăc bro phan lơh geh bơh sươn sre nam do gơ geh sùm, den tàng hơ̆ ngan là bơta gơn kơnờm nàng lơh làng bol in sơlơ tơnguh tai lơh sa, sền gàr sươn rơhàng geh niam rlau, brồ guh bơtàu tơnguh lơh sa hìu bơnhă. Lơh sa tơl ngui tơl sa den tàng sa tềp do làng bol ndrờm blơi tơl phan mờ bơyai lơh ñô sa chờ sơnam pa bal mờ ƀòn lơgar chờ hờp chờ hờn rlau.

Di ngan bè jơnau ồng Lơ Mu Ha Pier dê đơs, làng bol kòn cau dùl êt nă cau tềng jơng bơnơm Lang Biang neh sơrbac mhar sơrlèt gan kal ke tơnơ̆ kòp dờng Kovid-19. Jăt ồng Cill Nôm ơm tàm thôn Bon Đưng 1, thị trấn Lạc Dương, kơnhoàl Lạc Dương uă ngan làng bol neh gĭt tam uă tờm chi tam jăt gùng dà kông nghệ kao, den tàng priă lơh geh gơ geh sùm mờ kơ̆ kơl jăp ngan. Pal sền ngăc, kờp bơh tơnơ̆ tŭ kòp Kovid-19, drà blơi phan lơh geh bơh sươn sre mờ giă tăc bro gơ geh sùm den tàng rài kis lơh sa làng bol dê mhar ngan bơtàu tơnguh wơl mờ bơtàu tơnguh.

           Ồng Cill Nôm, đơs: Lài do, tŭ làng bol lơh sre dùl nam geh dùl kàl den gơtìp tàm bơta jơgloh sùm, pal kis mờ broă lòt lơh broă apah. Bơh ngai tam gơl tờm chi tam, ai bơta jak chài măy mok ngui tàm broă lơh sa suơn sre măy mok pa mờ uă bơta chi tam ndai den rài kis hìu bơnhă hơ̆ sồng rơhời gơguh đau. Priă lơh geh gơguh uă, rài kis tơl ngui tơl sa den tàng hìu bơnhă kung blơi wil tơl ală phan ngui tàm rài kis mờ lòt rê. Mìng is hìu bơnhă añ, rài kis lơh sa tơl ngui tơl sa, bơtàu tơnguh rlau tai uă ngan pơndrờm mờ lài den tàng broă bơyai lơh wă rò sơnam pa sa tềp, nhơm chờ hờp sơnam pa kung chờ hờp chờ hờn, ram mhŭ bè ală hìu làng bol ndai tàm ƀòn lơgar sơl.

Jăt ồng Nguyễn Duy Hãnh, Kwang ătbồ Anih tờm lơh broă sa sươn sre kơnhoàl Lạc Dương yal, ờ mìng kong bol klar kal ke lùp bơsram, rơhời chài ngui geh măy mok lơh sa sươn sre jăt gùng dà măy mok pa, làng bol gam sơrbac mhar gĭt geh jơnau kờñ bơh drà kă bro dê. Nàng pleh gơtìp gơ ơm tàm bơta “lơh geh uă den giă, ờ geh tơnhàu mơya giă gơguh wơl”, tơrmù tus khà lơyah ngan rlau jơh rềs àr gơ aniai tàm broă lơh sa, làng bol neh đòm jăt broă tam phan jăt sră dan blơi phan, lơh bal tàm ală mpồl lơh bal lơh sa mờ blơi jơh phan bơna. Kơnờm bè hơ̆, priă geh bơh broă lơh sa sươn sre bơh kơnhoàl Lạc Dương dê tàm nam 2022 neh lơh geh kờp bal 330 tơlak đong tàm dùl lồ. Ồng Nguyễn Duy Hãnh, đơs: Tàm tơngai tus, kơnhoàl rơ̆p pơn jăt tai lơh ală broă lơh bal lơh sa gơ jăt bal mờ blơi phan bơna tàm ƀòn lơgar bal mờ ală phan bơna bơkah pơnrơ is bơh kơnhoàl dê. Mơkung sền gròi rề ơnàng lơh uă broă lơh bè tam uă tờm atiso, zơu tây, ală broă lơh cèng wơl cồng nha lơh sa niam ai làng bol in. Bơh hơ̆ lơh gơs tai ală broă lơh bal lơh sa, tăc blơi phan lơh geh bơh sươn sre. Pal ai tơl bè sơntìl, sơnơm tu phơng sih drơng niam ai broă bơtàu tơnguh lơh broă sa sươn sre măy mok pa. 

            Mờ bơta sơrbac mhar tàm broă lơh sa, jơh nùs ngui măy mok pa tàm broă lơh broă sa sươn sre bơh cau lơh broă sa dê, bal mờ bơta bơto pơlam, dong kờl jơh nùs bơh gơnoar ătbồ tiah do dê, ngan ngồn rài kis bơh cau K’Ho dê tàm Lang Biang đơs is mờ kơnhoàl Đơn Dương đơs bal rơ̆p pơn jăt tai geh bơtàu tơnguh pràn kơldang tàm sơnam pa.