Tơnơ̆ tŭ iăt ală mpồl lơh broă bơh Anih Jơnau đơs Việt Nam dê yal tơngai pơrgon lam lơh broă lơh rơcăng ai Pơrlòng Pờ tơlik jơnau đơs gùt lơgar dơ̆ XVII in, đơs pơndŭt dơ̆ lơh broă, Phó Kwang Lam bồ dờng Anih Jơnau đơs Việt Nam ồng Phạm Mạnh Hùng, Lam bồ Mpồl Bơyai lơh Pơrlòng Pờ tơlik jơnau đơs gùt lơgar dòn là, mờ bơta bơyai lơh mờ rơcăng nền nòn, Pơrlòng Pờ tơlik jơnau đơs gùt lơgar dơ̆ do rơ̆p ơn tŭ tơngai bơtàu tơngguh pa ai pờ tơlik jơnau đơs gùt lơgar in mờ ală cau lơh ƀăo, cau sền swì jơnau, cau drơng măy geh dùl nùs nhơm chờ hờp crăp rơcăng lòt bal mờ jơi bơtiàn nàng lơh geh mùl màl ală jơnau kờñ bơtàu tơngguh dà lơgar tàm tŭ tơngai pa.

Ală jơnau tus bal Pơrlòng geh uă bơta mùl gŏ is bơh sră ƀăo pờ tơlik jơnau đơs dê, bè: jơnau đơs pờ tơlik tơn; jơnau cih sền gŏ tơn, jơnau cih sền gŏ tơn lùp khà; jơnau đơs pờ tơlik mìng dùl tơngume, jơnau đơs pờ tơlik dà jơi bơtiàn. Is ồn, dơ̆ Pơrlòng do dơ̆ sơnrờp, Anih Jơnau đơs Việt Nam ai tơmŭt pơrlòng ngan ngồn bơta Podcast- bơta tơngume săp đơs gam bơtàu tơngguh pràn kơldang tàm anih sồ; bơyai lơh Pơrjum cribơyai ală lơgar mờ Dơ̆ sơnđờm mŭt lơh bal mờ Broă lơh đơs crih tam ya “Ntas săp rài pa” geh lơh tàm Ƀlàng dờng 30/10, sơnah ƀòn Hạ Long mờ bơta tus bal bơh uă cau mờng đơs crih tam ya, cau đơs crih tiơng pơnrơ mờ gĭt nđờ jơ̆t rbô nă cau sền.