Mpồl lơh broă neh lòt sền kơnhoàl ù tiah đùh sră sồ 8 sàh Ea Nuôl; kơnhoàl ù tiah đùh sră sồ 60 mờ 61 sơnah ƀòn Buôn Ma Thuột; kơnhoàl ù tiah đùh sră sồ 21 sơnah ƀòn Tân Lập. Do là ală anih đùh sră geh gal cau tĕ khà là làng bol jơi bơtiàn dồ êt nă cau mờ cau tĕ khà geh jăt yàng den tàng broă lơh rơcăng geh sồr lơh kơ̆ kơl jăp, pal lơh di jơnau sồr.

Tàm ală anih lòt sền, Ƀí thư Tỉñ ủy càr Dăk Lăk ồng Lương Nguyễn Minh Triết bal mờ mpồl lơh broă să tờm tơn kờp sền nền wơl phan bơna, broă rơndăp lơh rơndăp kơnhoàl ù tiah đùh sră, broă lơh mblàng yal, gàr niam lơngăp lơngai rơndăp tăp sèng mờ ală jơnau sồr drơng cau tĕ khà in tàm ngai tĕ khà. Ƀí thư Tỉñ ủy càr Dăk Lăk sồr Anih duh broă Tĕ khà ală ƀòn lơgar pơn jăt tai kờp sền nền wơl ală kơnhoàl ù tiah đùh sră, rơcăng wil tơl gùng dà broă rơndăp lơh nàng rơcăng lài lơh bơsong ală jơnau digơlan gơlik geh bè broă lơngăp lơngai rơndăp tăp sèng, trồ tiah lơh aniai halà kòp bơtờp; mơkung sùm bơtơl, gĭt nền broă gơlik geh tàm kâp hơđơm.