Tàm Càr lơgar Hà Nội, tàm ală nhai sơnrờp lam lơh Jơnau lơh nền tàm Pơrjum dờng XVIII Đảng ƀộ ƀòn dờng tơngai lơh broă bơh nam 2025- 2030 tơn, dồ ròt ală jơnau lơh nền dờng tàm pơrjum neh geh lơh loh làng bơh ală broă lơh bơ̆t bơtàu, rơndăp broă lơh gơcèng broă kwơmàng. Rơndăp broă lơh tờm kwơmàng, hơ̆ là Gùng dờng ù tiah ƀòn lơgar dà dờng Hồng mờ Tiah ƀòn drà tàp pràn să jan Olympic geh kơ̆p gơn lơh gơlik gơs bơta tam gơl pràn bơtàu tơngguh, pờ gơlik “Cồng nha lơh geh crih crài dà dờng Hồng dê” tàm tơngai mờr tus. Kwang bàng Ƀộ Cíñ trị, Ƀí thư Thàñ ủy ƀòn dờng Hà Nội ồng Nguyễn Duy Ngọc pà gĭt: “Do là 2 rơndăp broă lơh geh gơtha is ồn kwơmàng, pơgồp bơnah bơtàu tơngguh Càr lơgar, tiah ring dà dờng Hồng mờ jơh gùt lơgar, wèt tus lơh gơs cồng nha lơh geh crih crài dà dờng Hồng dê, drơng jơnau kờñ gơboh GRDP bơh 11% rlau hơđăng tàm nam do tơn mờ jơh gùt tơngai lơh kơnòl broă, lơh gơlik gơs muh măt pa bơh Càr lơgar Hà Nội dê, niam chài kòn bơnus, bơhiàn niam chài is, bơceh lơh, brồ guh gơgơs gùng dà ƀòn drà bơceh lơh tơlir, ngăc ngar, tàm tơrbŏ gùt plai ù”.

Ờ mìng Hà Nội, tàm làm gùt lơgar, uă ƀòn lơgar gam dồ ròt lam lơh ală rơndăp broă lơh phan bơna bơ̆t bơtàu tờm kwơmàng, bơh gùng lòt, ƀòn drà, tiah lơh sa mờ măy mŏk măy mŏk pa tus phan bơna bơ̆t bơtàu ƀòn brê bơnơm, lơh gơlik bơta gơn kơnờm gơrề uă ai gơguh lơh sa in. Tàm bơta dunia tam gơl pràn, lơh sa dờng Việt Nam dê pơn jăt tai geh gàr kơ̆ kơnhăp. Tơngai bơh nam 2021- 2025, gơguh GDP kờp bal geh 6,3%, is nam 2025 geh 8,02%; kờp priă rài lơh sa gơguh tus 514 tơmàn dolar Mỹ, rơndăp ơm khà 32 tàm dunia; GDP kờp bal dồ nă cau sơrlèt 5 rbô dolar Mỹ. Roh giă priă geh gròi sền, ală tàm pơnring dờng bơh rài lơh sa dê geh gàr niam. Phó Pơgru dờng, Tiến sìh ồng Nguyễn Thường Lạng, Klờng Đại họk Lơh sa làng bol dà lơgar đơs là, ală cồng nha do geh gơtha is ồn kwơmàng ngan: “Do là bơnàng jă kơ̆ kơnhăp ngan ai tŭ tơngai bơtàu tơngguh pa in, tàm hơ̆ pal tơrgùm tàm tam gơl tơlir, tam gơl sồ; khin cha koh tơrmù sră pơ àr, tơngguh gơnoar ai mpồl lơh sa kă bro in nàng lơh gơlik bơta bơtàu tơngguh pràn bè lơh sa”.

Nam 2025, jơh gùt lơgar geh mờr 300 rbô mpồl lơh sa kă bro tơnggơs pa mờ wơl lơh broă wơl; kờp jơh priă cih tàm sră pơ àr bơtơl tàm rài lơh sa geh mờr 6 tơlak 400 rbô tơmàn đong. Kơnhoàl ù tiah FDI pơn jăt tai lơh gơnoar broă kwơmàng, mờ kờp jơh priă lơh jăt tơngai bơh nam 2021- 2025 geh rlau 158 tơmàn dolar Mỹ, pà gŏ bơta pràn gơkờñ bơh tiah bơcri priă Việt Nam dê. Mŭt tàm tŭ tơngai bơh nam 2026- 2030, jơnau kờñ gơguh GDP kờp bal bơh 10% dùl nam rlau hơđăng geh gĭt loh làng. Ală rơndăp broă lơh phan bơna bơ̆t bơtàu kwơmàng bè gùng rơndeh lòt mhar đah Tô – Jum, phan bơna bơ̆t bơtàu sồ, năng lượng, logistics; bal mờ pơlam gùng bơtàu tơngguh lơh sa tơlir, lơh sa sồ, lơh sa mờ măy mŏk “Make in Vietnam”, bal mờ hơ̆ là broă lơh bơh gah lơh sa mờ măy mŏk niam chài, lòt nhơl dê…rơ̆p pờ gơlik ù tiah bơtàu tơngguh pa ai dà lơgar in. Cau gĭt wă jrô lơh sa Tiến sìh ồng Lê Duy Bình đơs là: “Nùs nhơm rơcăng lài is, kơnờm tàm bơta pràn is lài jơh pal geh tơnggŏ tàm kơ̆ kơl jăp lơh sa dờng, tàm pràn jak lơh tờm gùng dà broă lơh priă jền ngui tăc blơi, nam priă jền mờ tơngguh bơngă rài lơh sa Việt Nam dê tàm mŭt gơrờm bal ală lơgar”.

Bal mờ gơguh lơh sa, ală tam gơl pràn kwơmàng bè kơrnoăt boh lam, phan bơna bơ̆t bơtàu mờ ală cau lơh broă geh lam lơh ndrờm bal. Dơ̆ pơrjum Quôk hội khoă XV geh đơs là dơ̆ pơrjum gơcèng bơta kah yau, mờ uă adăt, jơnau lơh nền tàm pơrjum tă bơsong anih gơkòl kơrnoăt boh lam, ai tơl bơta ƀươn priă jền in, tam gơl pràn bơh kơlôi sơnơng ătbồ tus bơceh mòn bơtàu tơngguh, tơn jơh bơta pleh pồn, tàm tuh kơnòl. Mờ bơnàng jă kơ̆ kơnhăp neh geh bơ̆t mòn, Pơgru dờng, Tiến sìh ồng Phan Xuân Sơn, Lam bồ Anih Kơlôi sơnơng Măt cau tiơng pơnrơ, pin dờn đơs: “Añ sùm pin dờn tàm gùng lòt tơnơ̆ do jơi bơtiàn dê mờ pin dờn tàm bơta đơng lam Đảng dê mờ jơi bơtiàn bol he geh dùl nùs nhơm kơ̆ dơn, dùl nùs nhơm gơtùi đơs là kơ̆ dơn jak chài ngan, bơceh lơh, sơrlèt kal ke tàm tơl tŭ tơngai. Tŭ do mŭt tàm rài pa, bol he kung lơh niam nùs nhơm hơ̆ mờ Đảng là cau tờm gar sơntìl jơi bơtiàn dê. Tŭ do, pơrjum dờng 14 Đảng dê là gùng dà bơ̆t bơtàu dùl Đảng là bơdìh mờ ală jơnau yau den geh jak chài, nùs nhơm den rơ̆p lam jơi bơtiàn Việt Nam cơnđòa guh jak chài bè ală jơi bơtiàn jak chài tàm dunia”.

Mờ bơta pin dờn jơh nùs ngan tàm bơta đơng lam Đảng dê, mờ bơta kơ̆p kờñ ngan brồ guh bơh jơi gùt jơi bơtiàn dê, tài dùl dà lơgar Việt Nam bơtàu tơngguh, gơboh gơbài, tơƀă pơnì bal mờ ală lơgar dờng pràn làm gùt plai ù, đảng viên mờ làng bol jơh gùt lơgar pin dờn là, mờ bơnàng jă broă neh lơh geh, mờ nùs nhơm rơcăng lài is, kơnờm tàm bơta pràn is, bal mờ bồ tơngoh tam gơl pa mờ lơh broă kràñ cê jơh nùs, dà lơgar he rơ̆p ngui jơh gơtùi jơh ală tŭ niam, sơrlèt rlau ală bơta lòng, lơh geh ngan ngồn jơnau kờñ bơtàu tơngguh mhar mờ kơnhăp jŏ.