Anih atbồ sền gàr brê Dà Ra Hoa, gơwèt Mpồl atbồ brê rcang gàr lài bồ tô dà Dà Nhim geh kơnòl broă atbồ sền gàr rlau 9 rơbô 600 lồ brê. Bulah jơh anih mìng geh 8 nă kwang bàng, cau lơh broă mơya brê kung gam geh atbồ sền gàr niam kơnờm 13 Mpồl lơh broă bal sền gàr brê tus bal. Jơh ală cau tàm mpồl ndrờm geh tơm priă sền gàr bơh khà priă tă broă lơh drơng ala sền gàr tiah ơm kis brê mờ khà tă tơm bơh 800 tus 900 rơbô đông dùl nhai 1 lồ. Kờp jơh khà priă mờ pah nhai cau tàm pồl bơh 13 Mpồl lơh broă bal sền gàr brê dờp geh pah nam bơh 20 tus 25 tơlak đong. Bi Klong Cil Sơn, Mpồl lơh broă bal sền gàr brê sồ 5 ƀòn Yŭ Mnang, pà gĭt: “Ưn ngài Đảng, Dà lơgar uă ngan neh lơh geh ală bơta ai añ in tus bal tàm Mpồl lơh broă bal sền gàr brê. Kơnờm khà priă dờp ơpah geh tă tờm bơh broă lơh drơng ala sền gàr tiah ơm kis brê mờ hìu bơnhă añ mờ làng bol tàm ƀòn tam gơl geh rài kis uă ngan”.

Mpồl atbồ brê rcang gàr lài bồ tô dà Dà Nhim geh càr Lâm Đồng jàu atbồ sền gàr mờr 28 rơbô lồ brê gơwèt ù tiah sàh Lạc Dương mờ sơnah ƀòn Lang Biang – Dà Làc. Nam 2026 mpồl lơh broă jàu mờr 25 rơbô lồ ai 40 Mpồl lơh broă bal sền gàr in mờ rlau 1 rơbô nă cau, uă ngan là làng bol kòn cau K’Ho bal mờ mpồl lơh broă mpồl bal dờp lèng broă lơh drơng ala sền gàr tiah ơm kis brê.

Bơh bồ nam tus tŭ do broă lơh lòt sền, ală Mpồl lơh broă bal sền gàr brê neh gĭt gŏ mờ bal mờ Mpồl atbồ brê rcang gàr lài bồ tô dà Dà Nhim ai wơl 69 tiah brê, ù brê gơtìp sơgràm mờ kờp jơh bă ù ơnàng rlau 14 lồ; lơh 6 dơ̆ ai wơl ală tiah tơnhào phan kwơ tàm ù tìs mờ adat boh lam tàm tiểu khu 140, 142 mờ 143… Tàm dơ̆ sền wì dơ̆ I mờ ai ing lài dơ̆ 1 nam 2026, kờp jơh khà priă mờ Mpồl lơh broă bal sền gàr brê mờ 4 mpồl lơh broă mpồl bal dờp geh là rlau 6 tơmàn 800 tơlak đong. Ồng Đinh Hữu Được, Phó lam bồ Mpồl atbồ sền gàr brê rcang gàr lài bồ tô dà Dà Nhim, đơs nền, broă lơh tơm priă drơng ala sền gàr tiah ơm kis brê neh pơgồp bal niam ngan gơnoar kwơ, kơnòl bơh mpồl bơtiàn mờ làng bol tàm dùl bă tiah den tàng bă brê bơh mpồl lơh broă dê ngai sơlơ geh atbồ sền gàr niam ngan: “Cồng nha loh làng ngan rlau jơh là bơta gĭt wă bơh làng bol dê is ồn là ală hìu bơnhă geh dờp ơpah atbồ sền gàr brê geh tơnguh uă. Lơh jat tơngume sră pơr gon neh kĭ hơ mờ mpồl lơh broă khi neh lòt bal mờ mpồl lơh broă tàm broă lơh lòt sền brê is ồn là broă lơh ai wơl ală bă ù brê gơtìp sơgràm, ai wơl ală broă lơh bơt bơtàu tìs mờ adat boh lam tàm bă ù brê neh geh jàu ai Mpồl atbồ brê rcang gàr lài bồ tô dà Dà Nhim atbồ. Bơdìh hơ̆ là broă lơh bơtàu tơnguh brê làng bol kung jơh nùs tus bal is ồn là ală hìu bơnhă dờp ơpah”.

Càr Lâm Đồng tŭ do gam lam lài gùt lơgar mờ rlau 1 tơlak 100 rơbô lồ brê, tàm hơ̆ geh tus rlau 700 rơbô lồ tơl ală bơta broă lơh tơm priă drơng ala sền gàr tiah ơm kis brê gam dong ală mpồl lơh broă sền gàr brê Dà lơgar atbồ niam bă brê geh jàu. Bal mờ hơ̆ mờr 167 rơbô lồ geh ơpah tơn ai pơgăp 14 rơbô 400 hìu bơnhă, cau dồ nă să, mpồl bơtiàn làng bol ơm kis atbồ sền gàr mờ khà priă dờp geh pah nam bơh 20 tus 25 tơlak đong neh pơgồp bơnah tam gơl niam rài kis mờ broă lơh ai làng bol in. Ồng Nguyễn Văn Quang, Phó Chủ tịch Anih duh broă Làng bol sàh Dam Rong 4, càr Lâm Đồng, pà gĭt, sàh geh rlau 33 rơbô lồ brê. Bơh tơngume broă lơh tơm priă drơng ala sền gàr tiah ơm kis brê, atbồ sền gàr mờ bơtàu tơnguh brê neh gơ gơs dùl tàm 3 gùng lòt bơtàu tơnguh kơ̆ kơl jăp bơh càr dê.  “Bol hi pơgồp bal mờ uă ngan mpồl tờm brê, hơ̆ sồng ală mpồl geh gơ rềng lam lơh ală broă lơh tơrlòng lài lơh broă lơh sa pơgồp bal mờ brê. Neh lơh bal, kơlôi sơnơng bàr pe broă lơh tơrlòng lài bơtàu tơnguh lơh sa hơ đơm mƀur brê. Gơwèt mờ bàr pe mpồl lơh sa kă bro lam lơh lòt nhơl den bol hi kung hòi jà lam lơh ală broă drơng ala lam lơh lòt nhơl. Bơdìh hơ̆ tai, tus tŭ do nàng dong làng bol iang nùs sền gàr brê kung neh pơgồp bal tơnhàu ală phan brê bơtơl nàng tơnguh broă lơh sa làng bol in”.

Lâm Đồng là dùl tàm ală càr sơn rờp gùt lơgar lam lơh broă lơh tơm priă drơng ala sền gàr tiah ơm kis brê. Rlau 15 nam do, bơh broă lam lơh niam broă lơh do, tŭ do càr neh bơt bơtàu geh priă jền kuơmàng ngan ai broă lơh atbồ, sền gàr mờ rề ơnàng brê. Mò Nguyễn Thị Hải, Kwang lam bồ Kes priă sền gàr mờ rề ơnàng brê càr Lâm Đồng pà git, mờ broă dờp, tă tơm priă jền jat gùng dà loh làng, song dơpă, gàr gơnoar kuơ niam ngan rlau jơh ai cau sền gàr brê in, broă lơh tơm priă drơng ala sền gàr tiah ơm kis brê bơt bơtàu dùl bơta tờm kơnhăp kơ̆ nàng broă lơh sền gàr mờ rề ơnàng brê càr dê ngai sơlơ mùl màl, kơ̆ kơljap rlau: “Tŭ do, gùt càr geh rlau 700 rbô lồ brê geh dờp priă drơng ala sền gàr tiah ơm kis brê mờ bơnah priă geh ai dùl nam bơh 450 tus 500 tơmàn đong. Tơnơ̆ tŭ kờp sền mờ tam pà den giă tơm kờp bal 1 lồ brê in nàng lam lơh broă lơh atbồ, sền gàr geh pơgap 600, 700 rbô, geh tŭ geh ală bă brê geh tơm rlau 2 tơlak đong dùl lồ. Broă lơh tơm priă drơng ala sền gàr tiah ơm kis brê là dùl bơnah priă jền dờng ngan nàng cau tờm brê, ală hìu bơnhă dờp ơpah sền gàr brê gơtùi kơlôi rơcang ală bơnah priă tă mờ dong kờl dùl bơnah kes priă càr dê in tàm broă lơh atbồ, sền gàr brê”.

Rlau 15 nam lam lơh broă lơh tơm priă drơng ala sền gàr tiah ơm kis brê, càr Lâm Đồng neh rơhời lơh priă jền bơh brê gơ gơs bơta gơn kơnờm nàng làng bol đềt mềr, sền gàr mờ rề ơnàng brê. Tŭ gơnoar kuơ làng bol dê geh gàr niam, kơnòl sền gàr brê kung geh tơnguh sơl, lơh gơlik bơta tờm nàng wèt tus jơnau kờñ “brê ròng is brê”, pơgồp bơnah bơtàu tơnguh broă tam sền gàr brê kơnhăp kơ̆. Càr Lâm Đồng kung gam pơn jat tai lơh li la mờ rề ơnàng ală bơnah priă ai bơh broă drơng ala sền gàr tiah ơm kis brê, ờ mìng bơh hìu măi đèng dà mờ gam bơh broă lòt nhơl, broă drơng ala ngui dà mờ ală broă ndai. Bơh hơ̆, rơhời tơnguh priă jền cau tờm brê in, tơnguh cồng nha atbồ, sền gàr brê nàng brê mùl màl gơ gơs là broă lơh sa kơ̆ kơljap jŏ jòng sùm làng bol in.