Rơndăp broă lơh gùng rơndeh lòt mhar Quy Nhơn – Pleiku geh bơta jòng pơgăp 125 kơi sồ, ơnàng 4 bơnàng rơndeh lòt, kờp jơh priă bơcri rlau 43 rbô 700 tơmàn đong, mờ geh tam pà gơs 3 rơndăp broă lơh bơnah. Tàm hơ̆, Rơndăp broă lơh bơnah 3 geh bơta jòng pơgăp 35 kơi sồ, bơh Kơi sồ 90 tus Kơi sồ 124, mờ kờp jơh priă bơcri rlau 9 rbô 100 tơmàn đong. Gơl gùng lòt gan ù tiah 6 sàh, sơnah ƀòn, geh: Lơ Pang, Mang Yang, K’Dang, Đak Đoa, Ia Băng mờ Hội Phú; digơlan lơh sir tàm nam 2029.

Đơs tàm dơ̆ bơyai lơh, ồng Phạm Anh Tuấn, Củ tịc Anih duh broă Làng bol càr Gia Lai pà gĭt, Gùng dà lơgar 19 tŭ do là gơl gùng tờm kwơmàng ngan tàm tơrbŏ đah măt tơngai Lik mờ Mŭt càr Gia Lai dê tơnơ̆ rơndăp tăp sèng, tơmŭt bal nhàr ù tiah sră pơ àr gơnoar ătbồ, mơya kung gam geh uă gơl gùng kwèl kơh gơ pơdik pơdar, bơnàng gùng wềt, geh sùm jơnau pơhìn lơh roh bơta niam lơngăp lơngai tŭ lòt rê, gơgơs anih gơkòl dờng gơ wèt mờ bơtàu tơngguh lơh sa – mpồl bơtiàn càr dê.

Tŭ lơh sir, gùng rơndeh lòt mhar Quy Nhơn – Pleiku rơ̆p tơn rŭc lơyah tŭ jiơ lòt rê, gơmù nggùl khà priă tă jun pơndiang, tơngguh uă pràn jak tàm tơrbŏ tiah, gơgơs gơl gùng tờm kwơmàng ngan đah măt tơngai Lik – Mŭt, tàm tơrbŏ mờ gùng rơndeh lòt mhar đah Tô – đah Jum, ƀlàng rơndeh par, anih ơhò dà lềng ơm mờ mpồng nhàr lơgar ală lơgar Lệ Thanh, bơh hơ̆ ai tơl bơta bơtàu tơngguh lơh sa – mpồl bơtiàn mờ bơtàu tơngguh uă rài kis Làng bol in. Càr Gia Lai sồr ală cau tờm lơh mờ ală gah pal lơh gàr bơta niam uă gơ wèt mờ rơndăp broă lơh, nàng lơh geh ală jơnau sồr sền gàr 5 nam.