Rlau 3 rbô 400 nơm ơhò neh geh rơndăp tăp sèng tàm 7 tiah kơ̆t ơm, mpồl lơh broă geh gơnoar sơlơ lòt sền, kràñ cê jơh nùs sồr jơh ală cau măy ơhò mù bơh ơhò lài mờ 6 jiơ mho ngai do 28/11; mơkung kờl sền nền wơl mờr 180 anih tơrlah, ngơr bam jrô nàng gàr niam lơngăp lơngai màng kis làng bol in. Jăt jơnau sồr kơryan ờ ai lòt rê bơh Anih duh broă Làng bol càr Khánh Hoà dê, bơh 7 jiơ drim ngai do 28/11, jơh ală ơhò lòt nhơl, ơhò jun pơndiang phan, ơhò ka mờ ơhò lơh broă tàm dà lềng pal ơm lơh broă; tơnơ̆ 6 jiơ mang ngai do 28/11, jơh ală cau măy ơhò pal mŭt hờ àr; cau ròng phan tàm dà ờ gŏ di ơm wơl tàm hìu gŭ rơkị.

Càr Khánh Hoà neh gàr niam jơnau yal tơnggĭt nàng jơh ală ơhò lơh broă tàm dà lềng in gĭt jơnau yal mìu càl rbŭt dờng sồ 15 mờ rơcăng lài rơcăng pleh. Lòt sền ală tiah kơ̆t ơm mờ tiah pơhìn uă, ồng Trần Phong, Củ tịc Anih duh broă Làng bol càr Khánh Hoà sồr ƀòn lơgar mờ mpồl lơh broă geh gơnoar sơlơ bơto pơlam cau làng bol, kràñ cê jơh nùs lơh glài ală cau lơi ờ lơh jăt.