Tơnơ̆ tŭ lam lơh jat, Jơnau sồr neh mhar ngan lòt mut tàm bơta geh ngan rài kis dê, bơh sơn rờp cèng wơl cồng nha niam ngan, lơh geh bơta gơn kơnờm pa nàng kwang bàng, đảng viên tàm càr in tam gơl pa bồ tơngoh kơlôi sơnơng tàm lơh broă, lơh sa, pơgồp bơnah sơlơ tơnguh tai lơh sa- mpồl bơtiàn bơh càr dê bơtàu tơnguh.

Là đảng viên kơnòm să pơrjum tàm thôn Dà Ngềt 1, xã Lát, kơnhoàl Lạc Dương, càr Lâm Đồng, bi Cil Ha Sip, kòn cau K’Ho neh mhar ngan bơsram lơh jat Jơnau sồr sồ 34 bơh Mpồl Lơh kơnòl broă sùm Tỉñ ủy càr Lâm Đồng, lơh jat nùs nhơm geh gơnoar, ngăc ngar, bơceh lơh, khin cha kơlôi, khin cha lơh tài bơta kwơ bal bơh mpồl bơtiàn dê. Bơdìh mờ lơh sir niam ngan kơnòl broă bơh Anih duh broă làng bol xã dê jàu, Cil Ha Sip gam jơh nùs tơnguh lơh broă lơh sa, ngui broă tam kơphê jat gùng dà broă lơh kơ̆ kơl jăp mờ hòi jà làng bol tàm ù tiah do in lơh jat bal. Tŭ do xã Lát neh lơh geh Mpồl lơh broă bal lơh sa kơphê sàng goh, mờ gĭt nđờ jơ̆t hìu bơnhă cau lơh broă sa làng bol jơi bơtiàn dồ ết nă cau tus bal lơh sa jat sră blơi phan. Bi Cil Ha Sip, đơs: “Tơnơ̆ tŭ geh bơsram lơh jat Jơnau sồr sồ 34 bè ală bơta đảng viên pal lơh mờ ală bơta đảng viên pal pleh den añ neh mut ngui tàm rài kis bơh să tờm añ dê. Lơh krơh niam nàng cau tàm hìu bơnhă mờ tơl nă cau gùt dar in lơh jat bal”.

Kung bè bi Cil Ha Sip sơl, ală đảng viên bơh Ci ƀộ thôn Păng Tiêng, xã Lát kung gĭt wă loh gơnoar lam lài lơh krơh niam bơh đảng viên tàm lơh jat Jơnau sồr sồ 34 bơh Mpồl lơh kơnòl broă sùm Tỉñ ủy càr Lâm Đồng dê. Jat ồng Rơ Ông K’Thiên, Ƀí thư Ci ƀộ thôn Păng Tiêng, bơdìh mờ 4 bơta pal pleh, geh: pleh lơh tìs, sa kơñau is; pleh tàm tuh glài bal, rơ ngòt kơnòl; pleh lơh broă ờ jơh nùs, ờ cèng wơl cồng nha; pleh lơh hừh is nùs bơh să tờm dê mờ lơh bè kis bơnĕ bơnài bal mờ gơ̆p... ală đảng viên tàm Ci ƀộ ndrờm lơh jat niam 3 bơta kờñ lơh, hơ̆ là: đơs lòt bal mờ lơh, lơh bơta di tài bơta kwơ bal; lơh jơh kơnòl broă, jơh nùs nhơm lơh ngan uă, bồ tơngoh kơlôi sơnơng tam gơl pa; cèng wơl cồng nha uă ngan rlau jơh, bơta niam uă ngan rlau jơh. Ồng Rơ Ông K’Thiên, đơs:“Đảng ủy xã neh lam lơh jat Jơnau sồr sồ 34 bơh Tỉñ ủy càr dê tus mờ tơl nă đảng viên mờ tơl Ci ƀộ thôn. Bơh hơ̆, Ci ƀộ thôn neh lam lơh jrô ơnàng làm uă Jơnau sồr do tàm ală dơ̆ pơrjum Ci ƀộ, jơh bal tàm ală dơ̆ pơrjum mpồl bal bơh thôn dê. Bơh hơ̆, ală đảng viên mờ làng bol tàm thôn ndrờm lơh jat ală tơngume tàm Jơnau sồr do mờ jơh nùs lơh jat, rài kis ƀòn lơgar tam gơl, nùs nhơm ƀòn lơgar bal geh tam klăc bal”.

Xã Lát, kơnhoal Lạc Dương geh rlau 70% làng bol ơm kis là làng bol jơi bơtiàn dồ ết nă cau, uă ngan kis mờ broă lơh sa suơn sre tam biăp, phan tam lơyah ngai mờ tam kơphê. Bulah gơrềng kal ke bal bơh rài lơh sa dà lơgar dê, mơya lơh sa- mpồl bơtiàn bơh tiah do dê kung gam gàr niam kơ̆ kơl jăp bơta bơtàu tơnguh. Tàm hơ̆, priă lơh geh kờp bal tơl nă cau neh lơh geh mờr 50 tơlak đong dùl nam, gơguh 5 tơlak đong pơndrờm mờ bồ nam 2024, khà hìu bơnhă rƀah kung gơmù gam 2,6%, srơh bơt bơtàu ƀòn lơgar pa cèng wơl cồng nha niam ngan mờ 17 tàm 19 broă jàu neh lơh sir...

Jat ồng Lơ Mu Ha John, Phó Ƀí thư Đảng ủy xã Lát, kơnhoàl Lạc Dương, càr Lâm Đồng, cồng nha do geh bơta tă pơgồp kwơ màng ngan bơh broă lam lơh di tŭ mờ lơh gơ rề uă ngan Jơnau sồr sồ 34 jrô ơnàng làm uă tàm đảng viên mờ ală rơnàng làng bol dê: “Tơnơ̆ tŭ Jơnau sồr sồ 34 geh lam lơh jrô ơnàng làm uă, uă ngan kwang bàng, đảng viên mờ làng bol ndrờm dồ nùs bal, lơh jat mờ tơnguh uă nùs nhơm lơh jat niam ală bơta pal lơh, bơta pal pleh. Bơh hơ̆, làng bol ngai sơlơ pin dờn tàm ală gùng dà broă lơh bơh Đảng mờ Dà lơgar dê”.

Bal mờ Jơnau sồr sồ 34, Mpồl lơh kơnòl broă sùm Tỉñ ủy càr Lâm Đồng kung pơn jat tai lam lơh Jơnau pơndŭt sồ 21, ngai 25/10/2021 bơh Mpồl duh broă Đảng Dà lơgar dê pơgồp bal mờ lơh pràn broă bơsram, lơh jat bồ tơngoh, nùs nhơm, rài kis Hồ Chí Minh dê mờ kơnòl lơh krơh niam bơh kwang bàng, đảng viên, lài ngan là cau lam bồ.  Bơh hơ̆, lơh geh bơta tam gơl dồ ròt bal, loh làng bè gĭt wă mờ lơh broă bơh ală kấp ủy, gơnoar atbồ, kwang bàng, đảng viên dê tàm broă lơh jat niam broă lơh glài, duh rơngòt kơrnoat boh lam bơh Đảng, adat boh lam bơh Dà lơgar dê, lơh geh bơta gơn kơnờm pa sơlơ tơnguh tai rài kis bơh ală ƀòn lơgar đơs is, lơh sa- mpồl bơtiàn bal tàm tiah do dê bơtàu tơnguh.