Tàm broă lơh, làng bol lơh ka geh yal tơnggĭt ală tơngume tờm ngan bơh Adăt Phan tàm dà nam 2017; pơlam gàr sùm măy jăt sền gùng lòt, cih tàm sră lơh ka mờ lơh jăt sră nggal tŭ ơhò lik, mŭt tàm anih ơhò ơm. Mpồl lơh broă geh gơnoar kung bơto yal bơta chài rơcăng kơryan lài rềs àr, lơh bơsong jơnau digơlan gơ aniai mờ pơgồp bal lòt jòi, dong kờl cau gơtìp rềs àr tàm dà lềng.

Ồng Đồng Văn Thi, làng bol lơh ka sơnah ƀòn Phú Thủy pà gĭt, ală jơnau gĭt wă geh bơto yal dong làng bol gĭt loh rlau kơnòl tŭ lơh broă, iang nùs lòt dà lềng mờ lơh ka di mờ kơrnoăt boh lam. “Kung rê hờ àr jŏ rao, tŭ do hơ̆ sồng lòt wơl, kung kơno sơl đơs bơta IUU do mơya bơh lài tus tŭ do kung ờ hềt gĭt nền ngan. Ngai do, añ lòt pơrjum, añ wờng pal lơh ka di jơnau sồr pal jăt, ờ gŏ di lơh ka tàm ală tiah dà lềng Dà lơgar ờ ai gơnoar, lơh bè lơi nàng broă lơh ka tàm dà lềng di mờ kơrnoăt boh lam”.

Jăt Cau ling Sền gàr nhàr lơgar Pôs đông Sền gàr nhàr lơgar Thanh Hải, bal mờ sền swì, sok sền tàm mpồng dà lềng mờ tàm dà lềng, broă bơto yal tơn kơrnoăt boh lam dong làng bol lơh ka wă wờng loh kơnòl ờ sơgràm tiah dà lềng lơgar ƀơdìh dê, lơh jăt ală jơnau sồr tàm lơh ka mờ gàr niam lơngăp lơngai kòn bơnus, măy mŏk ơhò plung in. Ồng Tạ Hữu Nghĩa, Đại tá, Phó Lam bồ Mpồl Hòi jà làng bol, Pôs đồng Sền gàr nhàr lơgar Thanh Hải, pà gĭt: “Pôs đồng Sền gàr nhàr lơgar Thanh Hải rơcăng lài pơgồp bal mờ ală mpồl, gah, mpồl cau mờ mpồl lơh broă geh gơnoar lam lơh ndrờm bal ală gùng dà broă rơndăp lơh, tàm hơ̆ tơrgùm mblàng yal tàm hìu pơrjum mờ sền gŏ tơn mờ măt tàm ală anih ơhò ka ơm nàng làng bol lơh ka in gĭt loh ală jơnau cih bơh kơrnoăt boh lam dê. Mờ, mpồl lơh broă kung pơgồp bal tơngume mblàng yal kơrnoăt boh lam tàm ală dơ̆ pơrjum nàng làng bol in wờng mờ lơh jăt niam ală jơnau sồr pal jăt tàm ală tŭ lơh ka tàm dà lềng”.

Tơngai tus, Cau ling Sền gàr Nhàr lơgar càr Lâm Đồng pơn jăt tai pơgồp bal mờ ală gah, ƀòn lơgar lơh pràn bơto yal kơrnoăt boh lam tàm kơnhoàl ù tiah kềng gah dà lềng pơgồp bơ̆t bơtàu broă lơh ka geh kơnòl, bơtàu tơngguh kơnhăp jŏ mờ lơh jăt gơtùi ală jơnau sồr bơh Anih duh broă câu Au bè kơryan lơh ka IUU.