Tŭ geh kwang bàng mờ cau ling sền gàr nhàr lơgar rê hờ ƀòn hòi jà làng bol ơm kis lơh sa kơ̆ kơl jăp dồ bă tiah, pơlam lơh sre, ròng siam, rài kis làng bol kòn cau La Hủ dê tàm ƀòn Pha Bu, sàh Pa Ủ, càr Lai Châu rơhời tam gơl. Mờ tàm gùng lòt hơ̆, kra ƀòn ồng Ly Xạ Pu là dùl tàm ală cau lơh lài lòt lài. Ờ ngòt trồ tơngai halà trồ mìu, ồng tus tơl hìu hòi jà làng bol sơrbì bơhiàn bơngơl gơla, sền gàr sàng goh ƀòn, sền gròi lơh broă lơh sa, sền gàr gùng nhàr lơgar jrong nhàr lơgar.

“Pal lơh ngan jơh pràn nàng hòi jà làng bol gĭt wă, ală bơta lơi mờ lơh gơtùi mờ ală bơta lơi ờ lơh gơtùi. Nàng lơh bè lơi rài kis làng bol dê rơhời bơtàu tơnguh, den tàng añ mìng gĭt lơh ngan jơh pràn nàng hòi jà làng bol lơh sa, lơh broă lơh sa nàng tơl sàu, tơl soh. Añ mìng gĭt lơh ngan mblàng yal, hòi jà làng bol jơh pràn rlau tai”.

Bơh nam 2020 tus tŭ do, kra ƀòn ồng Ly Xạ Pu neh tus bal gĭt nđờ rơhiang dơ̆ mblàng yal tàm ală ƀòn tiah jơnhoa nhàr lơgar. Ală jơnau đơs dềt rơhền mơya bềng kơnòl bơh ồng dê neh pơgồp bơnah lơh tam gơl gĭt wă bơh làng bol La Hủ ƀòn tờm he dê.

Tŭ do, tàm ală ƀòn Pha Bu, Nhú Ma, Vạ Pù halà Tân Biên…, uă hìu làng bol neh gĭt lơh kòi, ròng siam phan puan jơng, tam chi lơh sơnơm, ngui điện thoại ngăc ngar nàng tàm pơgơl phan bơna. Kơnòm dềt geh tus klờng bơsram akhar, đơs dà Yoan. Nàng làng bol in dòn mờ lơh jăt, hìu bơnhă ồng Pu sùm lơh krơh lòt lài tàm bơtàu tơnguh lơh sa mờ broă lơh tơrlòng lài ròng kơnrồ, sur, tam tờm thảo quả mờ sa nhân dum loañ tềng hơđơm mƀur brê.

Neh geh tŭ là hìu rƀah ƀòn dê, hìu bơnhă bi Phàn Lê Sa lài do mìng kơ̆p kơldìng tàm dồ êt sre lơh kòi dồ kàl lơm. Dờn jơnau hòi jà bơh kra ƀòn ồng Ly Xạ Pu dê, bi khin cha tam gơl tus tam tờm quế, sa nhân dum loañ. Tơnơ̆ bàr pe nam tơryăng tơryồng lơh sa, rlau 3 lồ quế, sa nhân neh gơ ai sa, dong hìu bơnhă bi klàs rƀah.

“Wa Pu là cau jơh nùs jơh tồr ngan, sùm lòt tus tàm ƀòn nàng pơndờm pơnđiang, dong kờl làng bol bơh broă dềt rơhền ngan rlau jơh tus broă kal ke. Wa sùm jơh nùs ngan bơto sồr ai làng bol in ală bơta niam mờ sùm hòi jà làng bol lơh niam ală broă bơh mpồl bơtiàn dê. Kơ̆p kờñ tơngai tus Wa geh tai uă pràn kơldang, lơh ngan lòt tus ƀòn nàng hòi jà sùm nàng làng bol gĭt bal mờ lơh jăt”.

Kơnờm bơta lơh ngan bơh kâp ủy, gơnoar ătbồ ƀòn lơgar dê mờ ală cau geh bơngă pin dờn dê bè kra ƀòn ồng Ly Xạ Pu, khà hìu rƀah uă bơta bơh sàh dê gơmù gam mờr 64%; ƀòn lơgar kung neh lơh geh 7 tàm 19 broă jàu bơ̆t bơtàu ƀòn lơgar pa.

Ờ mìng là cau geh bơngă pin dờn tàm mpồl bơtiàn lơm, ồng Ly Xạ Pu gam là cau lơh kòn gùng đah kâp ủy, gơnoar ătbồ mờ làng bol, bal mờ mpồl ling sền gàr nhàr lơgar sền gàr lơngăp lơngai rơndăp tăp sèng, sền gàr kơnhăp kơ̆ gơnoar tờm ù tiah nhàr lơgar dà lơgar dê. Ồng Đao Văn Thức, Phó Chủ tịch Mpồl duh broă Làng bol sàh Pa Ủ, càr Lai Châu pà gĭt:

“Ồng Ly Xạ Pu là dồ nă cau pơnrơ ngan tàm hòi jà làng bol kơ̆ kơl jăp rài kis; hòi jà làng bol lơh sàng goh ƀòn, bơtàu tơngguh lơh sa. Hìu bơnhă ồng hơ̆ là dùl hìu bơnhă lơh krơh, bơtàu tơngguh ròng kơnrồ, sur. Tŭ do, ồng hơ̆ gam pơn jăt tai hòi jà làng bol tam gơl bơh broă tam kòi ờ huan geh cồng nha, nàng tam tờm chi tam geh priă jền lơh sa uă nàng bơtàu tơngguh lơh sa”.

Tàm sơnam neh rlau 70 sơnam, bulah bơta pràn ờ gam bè lài tai, mơya ồng Ly Xạ Pu kung gam ngai pah ngai sùm lòt tus tơl ƀòn, đơs ai làng bol in iăt bơta niam bơh jơnau lơh nền pa dê; hòi jà làng bol tơryăng tơryồng lơh sa, gàr brê, gàr ƀòn, gàr nhàr lơgar Dà lơgar dê. Dồ rài kis jơh nùs jơh tồr tài mpồl bơtiàn, cau đảng viên kòn cau La Hủ hơ̆ gam ngềt ngơ̆t bơsram mờ lơh jăt jơnau Wa Hồ dê bơh ală broă lơh dềt rơhền ngan rlau jơh. Gơlơh bè sơm pòl ồs hìt sùm tàm gùl brê bơnơm jơnhoa tiah nhàr lơgar, ồng kung gam jơr ram bơta pin dờn tiah ală ƀòn kòn cau La Hủ tàm tiah lồi đah Tô măt tơngai mŭt Dà lơgar dê.