Gùng ƀê tông lòt gan thôn Ka Đô, sàh Ka Đô, càr Lâm Đồng ngai do ờ mìng tơrbŏ ală hìu đam mờ sươn sre lơm mờ gam lam lòt tus tiah lơh sa lài do sùm bŏ lơm bè lơm pah kàl mìu tus. Bàr đah gùng, ală tiah hìu jàl tơlir niam ngan tàm pơn jăt bal, cơng tàng tơnggŏ ai dùl tiah lơh sa gam pah ngai tam gơl.

Hìu bơnhă ồng Ma Ren là dùl tàm ală hìu lơh lài tam gơl lơh sa jăt broă lơh tơrlòng lài lơh jơh ală broă. Bơh 5 sàu mrĕ lơngồt, biăp sơvê tam tàm hìu jàl, pơgồp bal ròng rlau 50 nơm jơrke hìu mờ mờr 10 nơm kơnrồ bơtờp sơntìl pa geh uă puăc, pah nam hìu bơnhă ồng lơh geh priă cồng pơgăp 500 tơlak đong tơnơ̆ tŭ kờp jơh priă tă lơh. Đơs gơjăt bal mờ lơh, ồng Ma Ren gơgơs cau geh bơngă pin dờn pơnrơ ngan bơh càr Lâm Đồng dê. Ồng neh lòt lài tàm uă broă thôn dê, bơh pà ù mờ hòi jà làng bol pà ù lơh gùng, tus lơh jăt mờ rề ơnàng lơh uă ală broă lơh tơrlòng lài lơh sa gơguh jak. Ồng Ma Ren, pà gĭt: “Să tờm añ bal mờ ală mpồl cau sùm hòi jà làng bol lơh gùng ƀòn, mpồng ƀòn tơlir, goh, niam. Kờñ làng bol khin cha tam gơl chi tam den tus tŭ do, uă hìu neh lơh jăt bơta gơguh jak măy mŏk, cồng nha lơh geh uă rlau, priă lơh geh kung kơ̆ kơl jăp, lơhp sa gơguh rlau mờ lài."

Tă pơgồp bơh ală cau geh bơngă pin dờn dê bè ồng Ma Ren gam pơn jăt tai gơrề uă tàm uă thôn ƀòn càr Lâm Đồng dê. Tàm sàh Đam Rông 2, bi Kon Yông K’ Khiếp neh khin cha tam bơrlŭ bal kwết sràt ờ geh gar, sầu riêng mờ mak ka tàm 5 lồ kơphê, cèng wơl priă cồng rlau 1 tơmàn đong pah nam. Bơh broă lơh tơrlòng do, uă hìu làng bol neh tam gơl lơh sa, ngui măy mŏk pa. Tus tŭ do, jơh gùt sàh geh rlau 478 lồ ù lơh broă sa sươn sre ngui măy mŏk pa, gơgơs 14 màh sồ tiah tam mờ 11 anih lơh bal lơh sa, pơgồp bơnah tơngguh uă priă jền phan lơh geh bơh sươn sre mờ lơh geh broă lơh broă sa kơnhăp jŏ. Bi Kon Yong K’ Khiếp yal:

"Là đảng viên den he pal lơh lài, lơh ngan lùp bơsram bơtàu tơngguh lơh sa, tam kơphê bơrlŭ bal mờ sàu riêng, kwết ờ geh gar, gar mak ka, bơtàu tơngguh lơh sa hìu bơnhă. Tŭ broă lơh tơrlòng lài cèng wơl cồng nha, làng bol rơ̆p dòn kơnờm mờ lơh jăt. Bơta chờ hờp ngan rlau jơh là ngai sơlơ geh uă hìu làng bol lơh jăt broă lơh tơrlòng lài tam bơrlŭ bal, rài kis geh bơtàu tơngguh loh làng ngan”.

Gơtùi đơs, cau geh bơngă pin dờn lơh gơlik bơta pràn ờ gŏ di bơh jơnau đơs mờ bơh ală broă lơh tơrlòng lài lơh sa geh cồng nha. Tŭ làng bol dòn mờ lơh jăt, ală jơnau lơh nền, gùng dà broă lơh dong kờl bơh Dà lơgar dê kung lơh geh cồng nha sơl. Tơngai bơh nam 2021 tus 2026, khà hìu rƀah uă bơta bơh càr Lâm Đồng dê neh gơmù bơh 9,33% gơmù gam 3,33%, ndrờm pal mờ gơmù mòr 50 rbô hìu rƀah. Tŭ do, jơh gùt càr geh 80 sàh geh tơl broă jàu ƀòn lơgar pa, 3 sàh geh tơl khà broă jàu ƀòn lơgar pa tơngguh uă mờ 1 sàh geh tơl khà broă jàu ƀòn lơgar pa lam lài.

Jăt ồng Bùi Ngọc Sơn, Phó Kwang Lam bồ Sờh Jơi bơtiàn mờ Pin dờn jăt yàng càr Lâm Đồng dê, jơh gùt càr tŭ do geh pơgăp 880 nă cau geh bơngă pin dờn tàm làng bol jơi bơtiàn dồ êt nă cau mờ pin dờn jăt yàng. Do là mpồl cau tờm lòt bal mờ gơnoar ătbồ ai ală jơnau lơh nền, gùng dà broă lơh mŭt tàm rài kis.

"Gơnoar broă bơh cau geh bơngă pin dờn dê tàm tơngai lài kwơmàng ngan gĭt lơh tàm broă tă pơgồp tàm bơtàu tơngguh lơh sa – mpồl bơtiàn tiah làng bol jơi bơtiàn dồ êt nă cau dê mờ tiah bơnơm. Khi ờ mìng là mpồl cau lơh kòn gùng ai jơnau lơh nền, gùng dà broă lơh bơh Đảng, Dà lơgar dê tus mờ Làng bol mờ gam să tờm tơn lơh krơh, lòt lài tàm bơtàu tơngguh lơh sa, bơ̆t bơtàu ală broă lơh tơrlòng lài lơh sa geh cồng nha. Bơh pràn lơh gơrề bơh ală krơh do dê, uă hìu làng bol tàm càr Lâm Đồng neh khin cha lơh jăt, pơgồp bơnah uă ngan tàm broă gơmù khà hìu rƀah, pa jơh rƀah tàm ù tiah ƀòn lơgar, tiah làng bol jơi bơtiàn dồ êt nă cau mờ tiah bơnơm geh cồng nha uă ngan”.

 Gùng bê tông tàm Ka Đô ngai do ờ mìng pờ gùng mŭt tàm tiah lơh sa lơm mờ gam pờ gơlik ală gùng lơh sa pa ai thôn ƀòn in. Gùng dà broă lơh bơh Dà lơgar dê lơh gơlik bơta gơn kơnờm bơh ală broă lơh loh làng, làng bol rơ̆p cơnđòa lòt jăt bal. Mờ hơ̆ ngan là bơnàng jă nàng ală thôn ƀòn tiah làng bol jơi bơtiàn dồ êt nă cau tàm càr Lâm Đồng bơtàu tơngguh lơh sa, brồ guh klàs rƀah kơnhăp jŏ bơh bơta dơlam is he dê.