Nam do, oh Nguyễn Ngọc Minh Tâm tàm ƀòn Brang, sàh nhàr lơgar Ia Puch guh ơdŭ 7. Do là dơ̆ sơnrờp oh ngài hìu bơnhă, ơm sa bĭc tơn tàm hìu bơsram mờ lồi poh hơ̆ sồng rê hờ hìu. Nam bơsram pa, mŭt tàm dùl tiah bơsram pa jơh lơm, geh tơl bơta bơsram sră, bơsram tàp, nhơl ñŏ lơh oh Tâm gơlơh chờ hờp ngan.

“Oh gơlơh chờ hờp ngan mŭt nam bơsram pa tài bơh sau gơtùi bơsram tai uă bơta chài, uă môn bơsram mờ geh tai tŭ jiơ nàng bơsram jơnau bơsram. Geh tŭ ờ wă bàr pe jơnau bơsram, sau gơtùi lùp tơn pơgru mờ ờ duh pal ơm kơ̆p tus ngai tơnơ̆. Bơdìh mờ tŭ jiơ bơsram sră, bol kòn gam gơtùi lơh broă lòt sền nàng gĭt, lòt tus hìu sền sră nàng sền sră halà ƀùi mho lòt nhơl plai tơrnò iar, coh plai tơrnò iar. Hơ̆ là pơgăp tŭ jiơ chờ hờp ngan”.

Bal mờ bơta chờ hờp bơh kơnòm bơsram dê là bơta chờ hờp, bơta iang nùs mờ nggờc ơnòng bơh ală mè bèp dê tŭ kòn dềt geh bơsram mờ ơm kis sa bĭc tơn tàm hìu bơsram.

Nam bơsram do, jơh bàr nă kòn bơh ồng Rơ Mah Ca dê, kòn cau Jrai ơm tàm ƀòn Chư Kó, sàh Ia Púch, ndrờm mŭt bơsram ơm sa bĭc tơn. Ùr bơklau ồng là cau lơh phan còr bơsơ̆t kau su, sùm pal lik bơh hìu lòt lơh broă bơh tŭ trồ pa ring àng, hơ̆ sồng gơ jă gơ jal ngan tai wơl rê nàng thàn jun kòn lòt bơsram. Mŭt tàm kàl lơh mìr halà ală ngai mìu càl dờng, gùng bŏ lơmbè lơm, ờ than jun kòn, lồi dŭt ồng pal lời kòn sơrbì bơsram ơm tàm hìu.

Tŭ do, tŭ ală kòn geh sàu sa, bơsram sră mờ ơm kis tàm hìu bơsram bơh bồ poh tus lồi poh. Ùr bơklau ồng Rơ Mah Ca ờ gam pal bòl glar tai jơnau jun rò kòn pah ngai, tŭ do ală kòn kung ờ huan pơhìn gơtìp rlô bơsram tài ală kal ke bơh hìu bơnhă mờ gùng lòt.

“Ưn ngài Đảng mờ Dà lơgar neh lơh hìu bơsram ơm sa bĭc tơn niam ngan. Bơh tŭ do, ală kòn añ dê geh bơsram, sàu sa, ơm rlô, nhơl ñŏ tàm klờng, tus lồi poh hơ̆ sồng rê. Añ brờn ngan”.

Hìu bơsram Bal ơm sa bĭc tơn ală kâp Dùl mờ Bàr Ia Púch nam bơsram do geh 752 nă kơnòm bơsram, geh rơndăp gơs 23 ơdŭ. Nàng mè bèp gĭt loh mờ dùl nùs bal mờ broă lơh bơsram pa, bơh lồi nam bơsram 2025 – 2026 tơn, sàh Ia Púch pơgồp bal mờ ală hìu bơsram kâp dùl, kâp bàr tàm ù tiah he dê geh broă rơndăp lơh tơnggơs hìu bơsram bal ơm sa bĭc tơn ală kâp. Tàm ală nhai rlô bơkăng, broă lơh rwah kơnòm bơsram, rơndăp cau pơgru, rơndăp tăp sèng ơdŭ bơsram, tiah sàu sa ơm bĭc mờ ală broă lơh bơto bơtê geh lam lơh dơ̆ lĕ bal.

Klau pơgru Trương Duy Hồng, pơgru hìu bơsram pà gĭt, broă mŭt lơh broă hìu bơsram ơm sa bĭc tơn kung gơ sồr cau pơgru tam gơl broă lam lơh mờ ătbồ kơnòm bơsram. Pơgru kong kơnòl ơdŭ neh lơh mpồl Zalo, pơrjum mờ boh bơr tơn mờ tơl hìu bơnhă nàng mè bèp gĭt loh broă bơsram sră, sàu sa ơm bĭc mờ ơm kis bơh kòn he dê.

“Ală pơgru kong kơnòl ơdŭ neh pơrjum mè bèp kơnòm bơsram, cih yal ai mè bèp in boh bơr bè broă lơh broă bơh broă lơh ơm sa ngai mờ ơm sa bĭc tơn. Uă ngan mè bèp là iang nùs ngan. Tài bơh khi gĭt broă lơh hìu bơsram pa dờng ngan, wil tơl ală broă, tiah nhơl ñŏ, sàu sa ơm bĭc, ơm rlô mờ niam lơngăp lơngai in”.

Bal mờ Hìu bơsram Bal ơm sa bĭc tơn ală kâp Dùl mờ Bàr Ia Púch, nam bơsram 2026 – 2027, kơnhoàl ù tiah đah măt tơngai Mŭt càr Gia Lai gam geh 6 hìu bơsram bal mờ broă lơh tơrlòng lài mŭt lơh broă, wă kơnòm bơsram tàm ală sàh nhàr lơgar. Ală broă bơ̆t bơtàu geh sơnđờm lơh bơh nhai 11 nam 2025, tus tŭ do neh jơh lơh ală bơnah broă tờm kwơmàng drơng bơto bơtê, sàu sa ơm bĭc mờ ơm kis. Jơh 7 hìu bơsram neh rwah rlau 6 rbô 800 nă kơnòm bơsram, uă ngan là bơsram ơm sa bĭc tơn mờ ơm sa ngai.

Do là tam gơl pal sền ngan gơ wèt mờ kơnhoàl ù tiah nhàr lơgar đah măt tơngai Mŭt Gia Lai, tiah geh pơgăp 90 kơi sồ gùng nhàr lơgar, gal làng bol jơi bơtiàn dồ êt nă cau ơm kis mờ bơta lòt rê, bơsram sră bơh kòn dềt dê gam ờ dồ êt kal ke. Mờ broă lơh tơrlòng lài, kơnòm bơsram ờ mìng geh tai cơldŭ bơsram, tiah sàu sa ơm bĭc mờ gam geh ù tiah nàng sền sră, nhơl tàp pràn să jan mờ tus bal ală broă lơh bơto bơtê bơdìh tŭ jiơ bơsram tàm ơdŭ. Kwơmàng rlau, broă bơsram bơh ală oh dê geh lơh sùm, ala tài kơldìng uă ir tàm bơta jun rò mờ ơm kis bơh tơl hìu bơnhă dê.

Ồng Phạm Văn Nam, Kwang Lam bồ Sờh Bơto bơtê mờ Bơsram càr Gia Lai pà gĭt, ală hìu bơsram ơm sa bĭc tơn rơ̆p pơgồp bơnah tơrmù bơta ờ ndrờm bal bơto bơtê đah tiah nhàr lơgar mờ ală kơnhoàl ù tiah ƀươn ƀoài rlau, mơkung lơh geh mpồl cau lơh broă dùl bă tiah tơn ai ƀòn lơgar in.

“Hìu bơsram ơm sa bĭc tơn ală kâp tàm ală sàh nhàr lơgar geh gơtha kwơmàng ngan. Ală oh rơ̆p geh sền gàr, ròng siam bơto bơtê wil tơl, jơh nùs jơh tồr nàng geh bơta bơsram sră niam rlau, pơgồp bơnah tam gơl gĭt wă. Ngan ală hìu bơsram do rơ̆p bơto mpồl cau lơh broă jak nàng tơnơ̆ do ală oh wơl rê wơl drơng ƀòn tờm bơh he dê in, pơgồp bơnah bơtàu tơngguh lơh sa – mpồl bơtiàn tàm ƀòn lơgar”.

Bơh kàl sơnđờm mŭt nam bơsram pa nam do, kơnòm bơsram tiah nhàr lơgar đah măt tơngai Mŭt càr Gia Lai dê sơnđờm geh bơsram, ơm bĭc sàu sa mờ bơsram tàp tàm tiah bơto bơtê ndrờm bal. Hìu bơsram ơm sa bĭc tơn ờ mìng lơh tam gơl niam bơta bơsram sră ngai do, mờ gam là tiah dong kờl, lam lòt tus tơnơ̆ do ai kơnòm dềt tiah nhàr lơgar tàm ƀòn lơgar in.