Còp mờ nting bơr sa tềp Củ tịc lơgar lài do ồng Nguyễn Minh Triết mờ Củ tịc lơgar lài do ồng Trương Tấn Sang tàm hìu is, Củ tịc lơgar ồng Lương Cường đềt mềr lùp còp pràn kơldang să jan, rài kis hìu bơnhă bàr nă oh mi dê. Củ tịc lơgar tơlik nùs nhơm sền dờng màng, kah ưn ngài uă ngan gơ wèt mờ ală tă pơgồp dà kơlhề, tă pơgồp dờng ngan bơh Củ tịc lơgar lài do ồng Nguyễn Minh Triết mờ Củ tịc lơgar lài do ồng Trương Tấn Sang dê ai broă lơh kăc màng bơh Đảng, bơh jơi bơtiàn dê in; mơkung kơ̆p kờñ pơn jăt tai dờp geh ală jơnau đơs tă pơgồp jơh nùs jơh tồr, mờng chài kwơmàng ngan bơh ală oh mi dê ai broă lơh bơ̆t bơtàu mờ bơtàu tơngguh dà lơgar in tàm rài pa.

Tàm nùs nhơm ram mhŭ, jơh nùs, Củ tịc lơgar đềt mềr lùp còp bơta tàm rài kis, bơsram sră mờ lơh broă bơh cau hìu bơnhă, hìu bơnhă ƀồc Tổng Ƀí thư lài do ồng Lê Duẩn, ƀồc Tổng Ƀí thư lài do ồng Nguyễn Văn Linh, ƀồc Củ tịc Mpồl duh broă Dà lơgar lài do ồng Võ Chí Công, ƀồc Củ tịc lơgar lài do ồng Lê Đức Anh; nting bơr kơ̆p kờñ cau hìu bơnhă mờ hìu bơnhă ală oh mi dê sùm pràn kơldang, gơboh gơbài, geh cồng nha, pơn jăt tai đòm jăt bơhiàn hìu bơnhă mờ broă neh lơh geh dê, sùm lơh ngan pơnđơl bơsram sră, lơh broă niam, tă pơgồp dà kơlhề uă ngan ai Dà lơgar tờm, làng bol in.