Mho ngai 1/04, tàm Hìu Quôk hội, Củ tịc Quôk hội ồng Trần Thanh Mẫn neh đơng lam Dar pơrjum dơ̆ 56 Anih duh broă Lơh kơnòl broă sùm Quôk hội dê. Đơs tàm dar pơrjum, Củ tịc Quôk hội đơs sùm, dùl tơngume kwơmàng ngan là ai jơnau đơs rơcăng broă lơh rơndăp broă kwang bàng lơh broă yal mờ Quôk hội in tàm Dơ̆ pơrjum dơ̆ sơnrờp, Quôk hội khoă XVI; sồr broă lơh do pal geh rơcăng gơ in niam ngan, kơrhia ngan, pal lơh di broă rơndăp tăp sèng, jơnau sồr.

Củ tịc Quôk hội ồng Trần Thanh Mẫn pà gĭt, Anih duh broă Lơh kơnòl broă sùm Quôk hội dê rơ̆p ai jơnau đơs bè uă tơngume kwơmàng, tàm hơ̆ geh rơndăp broă lơh Adăt tam gơl, bơtơl bàr pe bơta bơh Adăt Sền gàr rềs àr mpồl bơtiàn dê. Anih duh broă Lơh kơnòl broă sùm Quôk hội ai jơnau đơs dơ̆ lồi dŭt bè broă lơh rơcăng Dơ̆ pơrjum dơ̆ sơnrờp, Quôk hội khoă XVI in bal mờ ală jơnau sồr gàr niam broă lơh Quôk hội dê tơngai tus, bơh phan bơna tus ală bơta dong kờl gơrềng bal. Mờ dar pơrjum kung rơ̆p ai jơnau đơs bè jơnau yal cồng nha broă lơh jăt sền nam 2025, ală nhai bồ sơnam 2026 mờ jơnau rơcăng broă lơh jăt sền nam 2027 nàng yal Quôk hội in.