Neh gơgơs mờng kwèng, pah ƀùi drim, ồng Pang Ting Sin (cau K’Ho) ơm tàm sơnah ƀòn Lang Biang – Dà Làc, càr Lâm Đồng ndrờm pờ sền jơnau yal tơnggĭt tàm điện thoại ngăc ngar. Ồng pờ phan ngui, pờ tàm ală bơnàng jă sồ bơh Anih Jơnau đơs Việt Nam dê mờ pờ tus jơnau đơs dà K’Ho. Ală jơnau yal tơnggĭt mpờl tàm măt điện thoại mờ dà jơi bơtiàn he dê tơn. Ồng rwah dùl jơnau yal tơnggĭt, mờ sền ngan:

 “VOV.K’Ho- Mpồl Kwang bàng ala mat Đảng Cộng sản Việt Nam bơh ồng Lê Hồng Quang, Phó Lam bồ Mpồl pơgồp jơnau đơs mờ Dong broă dà lơgar lơh Lam bồ mpồl neh còp mờ lơh broă tàm lơgar Brazil.

Pơgăp mờ do 25 nam, Jơnau đơs pờ mờ dà K’Ho bơh Anih Jơnau đơs Việt Nam dê geh pờ tơlik tàm rơdio. Bal mờ pờ tơlik tàm rơdio ờs mờng bơh lài, ală jơnau đơs geh pơnđàng tàm website mờ ală bơnàng jă internet mpồl bơtiàn. Ồng K’ Si Môn – Lam bồ Mpồl Lơh broă Mặt trận thôn Lộc Bảo, sàh Bảo Lâm 5, càr Lâm Đồng pà gĭt: ală jơnau yal tơnggĭt bè rài kis, gùng dà broă lơh bơh Đảng, Dà lơgar dê mờ ală jơnau yal niam chài geh pơnđàng mờ dà mè deh he dê tàm ală bơnàng jă sồ bơh Anih Jơnau đơs Việt Nam dê, dong làng bol ƀươn iăt, ƀươn wă mờ ƀươn gĭt rlau.

“Añ gĭt jơnau đơs pờ mờ dà K’Ho bơh sơnrờp là bơh facebook. Bơh hơ̆ añ gĭt uă rlau jơnau yal mờ dà K’Ho he dê. Să tờm añ kung sùm pờ sền mờ iăt ală jơnau yal geh yal mờ dà K’Ho, Mạ, tài bè hơ̆ añ hơ̆ sồng gĭt geh uă rlau tai. Kơ̆p kờñ làng bol jơi bơtiàn K’Ho, Mạ iăt nàng gĭt uă jơnau yal mờ dà kòn cau he dê, bơh hơ̆ pơgồp bơnah tàm broă prăp gàr, sền gàr mờ bơtàu tơngguh dà đơs jơi bơtiàn K’Ho, Mạ he dê ngai sơlơ bơtàu tơngguh rlau tai”.

Ờ mìng yal jơnau tus mờ làng bol lơm, jơnau đơs pờ mờ dà K’Ho bơh Anih Jơnau đơs Việt Nam dê gam pơgồp bơnah prăp gàr dà đơs jơi bơtiàn he dê. Ồng Cil Poh, Phó Chủ tịch Anih duh broă Làng bol sơnah ƀòn Lang Biang – Dà Làc, càr Lâm Đồng đơs là, bơta do sơlơ geh kwơmàng ngan tàm rài kis ngai do, tŭ dùl bơnah cau K’Ho rơhời hŭi dà đơs halà ờ gĭt cih akhar cih jơi bơtiàn he dê.

 “Tŭ do geh dồ bơnah cau K’Ho ờ gam gĭt đơs, ờ gĭt cih dà kòn cau he dê tai. Anih Jơnau đơs Việt Nam pờ mờ dà K’Ho là broă kwơmàng ngan. Mblàng yal mờ dà K’Ho dong làng bol tơngguh uă bơta wă wờng, gĭt wă. Añ kơ̆p kờñ Đảng, Dà lơgar pơn jăt tai sền gròi, sơlơ pờ uă tai jơnau đơs pờ mờ dà K’Ho nàng pơgồp bơnah sền gàr mờ prăp gàr dà đơs K’Ho he dê”.

Tàm ală ù tiah gam uă kal ke, broă yal jơnau tơnggĭt ngan ngồn tus mờ làng bol mờ dà jơi bơtiàn dê sơlơ geh kwơmàng ngan. Tàm sàh Đam Rông 4, càr Lâm Đồng, rlau 90% khà kờp làng bol là làng bol jơi bơtiàn dồ êt nă cau, mìng là K’Ho Cil mờ M’Nông. Ồng Lơ Mu Ha Poh, Phó Bí thư Duh broă sùm sàh Đam Rông 4 pà gĭt: mờ làng bol tiah do, ală jơnau yal tơnggĭt bè jơnau lơh nền, gùng dà broă lơh Đảng, Dà lơgar dê, bè rài kis, lơh sa mờ niam chài geh mblàng yal mờ dà K’Ho, M’Nông dong làng bol ƀươn gĭt rlau.

 “Anih Jơnau đơs Việt Nam sùm sền gròi, lòt bal mờ kâp ủy, gơnoar ătbồ ƀòn lơgar. Is ồn, sàh Đam Rông 4 geh gal làng bol jơi bơtiàn K’Ho Cil mờ M’Nông. Anih Jơnau đơs Việt Nam neh di tŭ ai jơnau yal bơh ƀòn lơgar dê tus mờ làng bol, mơkung yal tơnggĭt ală bơta kwơ niam chài ờs mờng bơh yau niam bơnĕ bơh làng bol dê tus mờ làng bol tàm jơh gùt lơgar”.

Rlau 80 nam do, bơh ngai Anih Jơnau đơs Việt Nam pờ jơnau đơs bơh sơnrờp, jơnau đơs pờ tơlik bơh Anih Jơnau đơs Việt Nam dê neh tus mờ jơh ală ù tiah ƀòn lơgar dà lơgar dê. Mờ jơnau đơs pờ mờ dà K’Ho bơh Anih lơh broă sùm tiah Tây Nguyên dê lơh neh geh 25 nam lòt mờ làng bol. Mờ tŭ dà K’Ho geh pờ tàm anih pờ tơlik jơnau đơs dà lơgar dê, geh pờ tàm anih sồ, pơgồp bơnah lơh gơrề pràn kơldăng dà đơs, niam chài jơi bơtiàn he dê tàm gùt plai ù.