Tàm dơ̆ lòt lơh broă tàm càr Dăk Lăk, ồng Nguyễn Thanh Nghị, Lam bồ Mpồl Gùng dà broă lơh, Broă lơh jŏ jòng Dà lơgar neh lơh broă mờ càr bè bơta lam lơh jăt kơnòl broă bơtàu tơngguh lơh sa – mpồl bơtiàn. Tàm dơ̆ lơh broă, càr Dăk Lăk dan Dà lơgar gờñ ai lơh jăt kơrnoăt boh lam krơi is nàng kờñ ai tơl bơta ƀươn priă jền in, lơh gơlik bơnàng jă lơh jăt jơnau kờñ gơguh tai bàr nơm khà. Lơh sa – mpồl bơtiàn qúy I sền bal kơ̆ kơl jăp mờ lơh geh uă cồng nha niam ngan. Bơta dờng rài lơh sa dê pơn jăt tai pờ ơnàng, gơguh tai kờp bal bơh jơh gùt càr dê jăt giă gam ngui tŭ do geh rlau 48 rbô 400 tơmàn đong, gơguh 11,7% pơndrờm bal dùl tŭ mờ nam 2025.

Đơs tàm dơ̆ lơh broă, ồng Nguyễn Thanh Nghị đơs niam ngan lơh ngan bơh Dăk Lăk dê tàm bơta gam uă kal ke, mơya càr pal kràñ cê jơh nùs rlau tàm đơng lam lơh, ngan là ai priă bơcri dà lơgar, tă bơsong ală rơndăp broă lơh gam gơkòl mờ tơrmù khà hìu rƀah.