Yal tàm dơ̆ lơh broă, ồng Lương Nguyễn Minh Triết, Ƀí thư Tỉñ ủy càr Dăk Lăk pà gĭt: lơh sa – mpồl bơtiàn qúy I sền bal kơ̆ kơl jăp mờ lơh geh uă cồng nha niam ngan. Bơta dờng rài lơh sa pơn jăt tai pờ ơnàng, GRDP jăt giă tŭ do geh rlau 48 rbô 400 tơmàn đong, gơguh 11,7% pơndrờm bal dùl tŭ mờ nam 2025.

Bulah bè hơ̆, kờp khà gơguh GRDP, càr rơ̆p pa lơh geh pơgăp 7,5%; ai priă bơcri dà lơgar lơyài; broă lơh tơm wơl, sờr ntrờn măt ù uă rơndăp broă lơh gam kal ke; broă tă bơsong sră nggal ai ală rơndăp broă lơh gơn kơnờm in ờ hềt di tŭ; broă lơh lơh sa kă bro tìp uă bơta gơ kơryan.

Ƀí thư Tỉñ ủy càr Dăk Lăk đơs là, nàng lơh geh jơnau kờñ gơguh tai 10% rlau hơđăng, jơnau kờñ hòi tơrgùm priă lơh sa tàm tŭ tơngai tus uă ngan, sơrlèt rlau uă ngan jơnau tơl pràn kes priă ƀòn lơgar dê. Tài bè hơ̆ dan Dà lơgar gờñ geh kơrnoăt boh lam hòi tơrgùm bơta pràn làng bol dê lơh is, rề ơnàng jơnau tơl pràn càn priă ODA, mơkung ai tơl bơta gơhòi gơ jà bơcri priă uă tàm ală broă lơh sa mờ măy mŏk măy mŏk pa, logistics, lơh gơlik niam phan lơh geh bơh sươn sre mờ ròng siam măy mŏk pa. Dăk Lăk kung dan geh kơrnoăt boh lam rơcăng lài rlau nàng bơsong jơtài jơngkah, lơh geh bơta pràn ai ƀòn lơgar in:

 “Tŭ do càr geh broă rơndăp lơh jơh rao, mơya broă rơndăp lơh nàng lam lơh mùl màl den kal ke ngan, ngan là kơnhoàl ù tiah đah măt tơngai Lik, jơtài gam uă ngan, ai apah den ờ ai apah, tăc den ờ ai tăc, tam gơl gơgơs anih lơh broă, anih tờm lơh sơnơm den ờ dipal gơnoar broă dà lơgar den tàng kơ̆p kờñ ngan Dà lơgar kơlôi sơnơng geh kơrnoăt boh lam lơi ƀươn rlau, bơh gơnăp gơnoar dà lơgar den càr hơ̆ sồng geh bơnàng jă nàng càr lơh mùl màl tàm broă tam gơl ală jơtài do nàng drơng ai bơtàu tơngguh in niam rlau”.

Đơs tàm dơ̆ lơh broă, ồng Nguyễn Thanh Nghị đơs niam ngan lơh ngan bơh càr Dăk Lăk dê tàm bơta gam uă kal ke, mơya càr kờñ pal kràñ cê jơh nùs rlau tàm đơng lam lơh, ngan  là ai priă bơcri dà lơgar, tă bơsong ală rơndăp broă lơh gam gơkòl mờ tơrmù khà hìu rƀah. Ồng kung tơngkah, tơnơ̆ tŭ tơrgùm dùl ƀòn lơgar, Dăk Lăk geh bơta brê bơnơm geh is rơ̆ ru mơya phan bơna tàm tơrbŏ, mpồl cau lơh broă mờ pràn jak tam gơl sồ gam ờ hềt pràn, gơrềng tus bơnàng jă gơguh tai.

“Dan kờp sền nền wơl broă rơndăp lơh pơnyơu mờ pal geh broă rơndăp lơh mùl màl ai tơl gah, tơl broă lơh ai ală rơndăp broă lơh gơn kơnờm tă pơgồp ai gơguh tai in. Tŭ do, rơndăp ù tiah bè lơi, nàng gàr niam cau mŭt bơcri den mpồl cau lơh broă bè lơi, tàm tơrbŏ gùng lòt geh ƀươn lah ờ. Bol he neh kal ke den kờñ cau bơcri priă mŭt do den pal geh bơta lơi rlau den hơ̆ sồng gơhòi gơ jà geh cau bơcri priă. Broă tai là tă bơsong bơta gơkòl priă jền, lài jơh ờ hềt gơhòi gơ jà bơcri priă den bơsong ală rơndăp broă lơh gam gơkòl".

Bơh ală pơlam gùng mờ sồr lơh tàm dơ̆ lơh broă, gơtùi gŏ loh jơnau sồr gơ tơlik gơ wèt mờ Dăk Lăk ờ mìng ơm wơl tàm broă dan kơrnoăt boh lam mờ kwơmàng rlau là lam lơh jăt gơtùi, ai ală jơnau lơh nền, jơnau lơh nền tàm pơrjum Đảng dê mùl màl gơlòt mŭt tàm rài kis. Kờñ bè hơ̆, càr pal lơh loh làng bơh ală broă lơh, broă rơndăp lơh lơh broă rềp mùl màl; kràñ cê jơh nùs tă bơsong anih gơkòl, tă bơsong bơta gơkòl priă jền, lơh geh tiah ƀươn nàng gơhòi gơ jà bơcri priă mờ lơh geh gơguh tai. Tŭ tơl kơnòl broă geh lam lơh ndrờm bal, gơ jăt bal mờ kơnòl loh làng mờ cồng nha ngan ngồn, jơnau lơh nền tàm pơrjum Đảng dê rơ̆p ờ mìng là pơlam gùng mờ gơgơs gơn kơnờm bơtàu tơngguh, pơgồp bơnah ai Dăk Lăk tam gơl pràn, bơtàu tơngguh mhar mờ kơnhăp kơ̆ tàm tŭ tơngai tus.