Nam 2021, tàm thôn 3, sàh Ea Bung geh bơta tam pìt tam phà rơbòng lam dà. Bàr pe hìu bơnhă dồ nă să kơryan rbòng dà  bơh jŏ neh ngui bal mờr 30 nam, lơh ai ală hìu bơnhă đah đơm gơtìp ờ tơl dà tuh den tàng gơ lam tus ờ geh tơnhào phan tam. Bơta tam lah tam ring jŏ jòng, ală hìu bơnhă neh lam bal mờ gơ̆p lòt tus tàm sàh nàng bơsong tam pìt tam phà, mơya ờ geh cồng nha mờ bơta tam lah đah ală hìu bơnhă dê sơlơ uă ngan. Tus ngai 3/07 pa do, tơnơ̆ 2 ngai gơnoar atbồ sàh pa geh tơnggơs, ală hìu bơnhă den pơn jat tai lơh sră mờ lam bal mờ gơ̆p lòt tus tàm sàh nàng yă. Tơnơ̆ tŭ iăt kơno jơnau đơs bơh 2 gah dê, đơng lam bồ sàh Ea Bung mờ ală kwang bàng drơng broă neh mù tus tàm tiah tờm, lơh broă ngan ngồn mờ ală hìu bơnhă mờ ai tơlik gùng dà broă lơh cri tơrña bơyai. Mìng tơnơ̆ 2 jiơ, tơl bơta kòl yan neh geh tă bơsong, 4 hìu bơnhă ring bal tam pà gùng pơlam rbòng dà mờ bal mờ gơ̆p lơh niam wơl gùng rbòng dà ngui niam geh cồng nha. Geh sre tàm tiah lồi rbòng dà, mò Lê Thị Liên, làng bol tàm thôn 3 đơs: “Đơng lam bồ sàh kung jơh nùs ngan, rềp làng bol, ưn ngài đơng lam bồ sàh dong kờl añ, rơndăp tăp sèng ai añ in nàng añ in lơngăp lơngai, tŭ do kung bè ờs rao, pờ gùng dà bè ờs sơl rao”.

Bơta tam lah jŏ jòng 4 nam geh bơsong tàm pơgăp ờ hềt tơl 2 jiơ, hơ̆ là kơnờm broă lơh pa- rềp làng bol, rcang lài gĭt ală bơta, mù tơn tàm ƀòn lơgar nàng tơm bơh bơr, iăt kơno mờ tă bơsong. Jat ồng Đỗ Duy Toại – Củ tịc Anih duh broă Làng bol sàh Ea Bung, tơnơ̆ tŭ mpồl lơh broă gơnoar atbồ sàh geh tơnggơs jat broă lơh 2 kấp, jơh ală anih lơh broă cíñ trị sàh neh mhar ngan lơh broă rơndăp lơh “100 ngai sơn rờp mut lơh broă”. Tàm hơ̆, is ồn đơs sùm gùng dà broă lơh: lòt tus tàm ƀòn lơgar, rềp làng bol, ơm mờ làng bol, ai làng bol lơh cau tờm.

Sàh neh tơlik mat ală mpồl lơh broă tơn tus tàm 3 thôn geh uă broă kal ke bè ù tiah, lơngăp lơngai rơndăp tăp sèng nàng tìp mat, iăt kơno jơnau đơs mờ tă bơsong tơl dơ̆ broă ngan ngồn. Ồng Đỗ Duy Toại, pà gĭt: “Bơdìh broă lơh jat broă lơh tàm anih lơh broă den pal mù tàm ƀòn lơgar nàng iăt kơno ală jơnau đơs bơh làng bol dê, ală bơta ờ suk ơm mờ bơh jŏ ờ hềt geh bơsong den ai lơh lài bơsong mơ tơn. Bơh 22 ngai lơh broă den sàh lơh broă mờ 3 thôn. Hơ̆ là bơta rềp làng bol, ơm mờ làng bol nàng bơsong broă lơh jal mhar, broă geh ngan tus tơn mờ làng bol den tàng bơta do kwơ màng ngan. Ờ gŏ di bè lài do ờs mìng ơm nggui tàm cơldŭ lơh broă kơ̆p làng bol tus yal yă den hơ̆ sồng he gĭt..”.

Bơdìh mờ nùs nhơm pa mờ broă lơh pa, sàh Ea Bung kung dờp ờ dồ ết kal ke. Anih lơh broă sàh dê tŭ do bơh jŏ geh lơh ai ờ hềt tus 30 nă kwang bàng, mơya tŭ do pal àñ tai 70 nă cau lơh broă, tàm tŭ phan bơna măi mok drơng broă lơh dà lơgar ờ hềt geh bơcri priă lơh ring bal. Ồng Nguyễn Văn Phú – Phó Củ tịc Anih duh broă Làng bol sàh, drơng broă sră pơ àr gơnoar atbồ Dà lơgar, pà gĭt: “Dơ̆ 1 là ală măi mok, phan bơna, gùng pờ internet mờ bàr pe broă lơh ờs mờng tŭ do ờ hềt tơl làm. Geh tai là, kwang bàng tàm tŭ rơndăp tăp sèng ờ hềt geh bơto bơtê mờ tề lam... Gùng che ồs đèng yau ờ lơh geh jơnau kờñ den tàng gơlam tus bơta gơguh CP mờ tàm tŭp ồs đèng, gơrềng tơn tus broă lơh, roh tŭ tơngai ai làng bol mờ kwang bàng in tŭ lơh jat”.

Ală bơta kal ke do neh geh sàh yal tơn tàm dơ̆ lơh broă mờ Củ tịc Anih duh broă Làng bol càr Dăk Lăk tàm ngai 23/07. Bơta geh mat di tŭ bơh đơng lam bồ càr dê ờ mìng tơngŏ nùs nhơm iăt kơno, rềp ƀòn lơgar lơm, mờ sơlơ đơs nền bơta rcang lài,  lơh ngan bơh gơnoar atbồ 2 kấp: sàh rềp làng bol, càr rềp sàh. Bơta do gam lơh geh nùs nhơm pa bơh mpồl lơh broă gơnoar atbồ, jơh ală wèt rê mờ làng bol. Ồng Tạ Anh Tuấn, Phó Ƀí thư Tỉñ ủy càr, Củ tịc Anih duh broă Làng bol càr Dăk Lăk đơs: “Bol añ gam sồr Sờ Jak chài Măi mok kờp sền jơh bè phan bơna măi mok mờ broă lơh tam gơl sồ bơh càr dê nàng geh broă lơh bơcri priă lơh halà lơh niam wơl. Bè phan bơna bơt bơtàu gùng che ồs đèng den đơs mờ Cơldŭ lơh broă Anih duh broă Làng bol càr lơh broă mờ gah ồs đèng nàng lơh geh jơnau sồr bè gùng che ồs đèng. Tiah lơi geh làng bol ơm kis, geh broă lơh den pal geh gùng che ồs đèng Dà lơgar mờ pal geh gùng pờ internet geh điện thọai at tê nàng pleh tiah là tiah tờm kal ke”.

Tơnơ̆ rlau 3 poh mut lơh broă gơnoar atbồ 2 kấp tàm ƀòn lơgar, làng bol sàh Ea Bung gam rơ hời gĭt loh bơta tam gơl pa bơh gơnoar atbồ dê- ờ mìng là mpồl lơh broă rơndăp tăp sèng wơl lơm mờ gam là tam gơl tàm broă lơh, broă tus bal, tàm nùs nhơm drơng broă. Tơl dơ̆ broă geh tă bơsong, tơl jơnau đơs geh iăt kơno di tŭ... ngan là cơng tàng loh làng ai bơta di ngan bơh broă lơh gơnoar atbồ ƀòn lơgar 2 kấp- tŭ mpồl lơh broă tơrgùm di pal, rềp làng bol mờ tài làng bol.