Ngai 23/12, tàm Dà Làc, Anih duh broă Làng bol càr Lâm Đồng bơyai lơh Pơrjum tơn jơh Broă lơh Dà lơgar bè sơlơ lơh broă bal mờ hòi jà dong kờl ờ gơ wèt Cíñ phủ lơgar ndai tơngai bơh nam 2019- 2025. Tơngai lài, càr Lâm Đồng dờp 133 broă lơh, rơndăp broă lơh, ờ gơ wèt rơndăp broă lơh bơh ală mpồl ờ gơ wèt Cíñ phủ lơgar ndai dong kờl mờ kờp jơh priă dong kờl rlau 18 tơlak 250 rbô dolar Mỹ. Jơnau đơs bơh Anih duh broă Làng bol càr Lâm Đồng dê pà gŏ, ală broă lơh, rơndăp broă lơh, ờ gơ wèt rơndăp broă lơh bơh ală mpồl ờ gơ wèt Cíñ phủ lơgar bơdìh neh pơgồp bơnah bơtàu tơngguh lơh sa – mpồl bơtiàn kung bè sền gàr niam lơngăp lơngai rài kis mpồl bơtiàn, tơn jơh jơgloh, tơrmù rƀah, kham sơm kòp, bơto bơtê, tơngguh uă pràn jak lơh broă, gĭt wă cau làng bol tiah rơndăp broă lơh dê, pơgồp bơnah bơtàu tơngguh rài kis Làng bol dê, is ồn là tiah làng bol jơi bơtiàn dồ êt nă cau, tiah lơh sa gam tìp uă kal ke.

Tàm pơrjum, càr Lâm Đồng neh yal bè ai lài tàm gơhòi gơ jà cau dong kờl. Jăt hơ̆, ală broă ai lài khà dùl càr dê, là lơh sơnơm, broă lơh sa sươn sre, bơto bơtê, ală broă mpồl bơtiàn…Càr gam lơh Sră cih măt ală rơndăp broă lơh hòi jà dong kờl tơngai bơh nam 2026- 2030 bal mờ broă rơndăp lơh ătbồ mờ ngui dong kờl ờ gơ wèt Cíñ phủ lơgar ndai; Ai tơl bơta ƀươn ƀoài bè gùng dà broă lơh, broă dong kờl bơh dà lơgar dê nàng hòi jà ală mpồl ờ gơ wèt Cíñ phủ lơgar ndai mŭt lơh broă, lam lơh ală rơndăp broă lơh tàm càr jăt tàm bơta lơh jăt kơrnoăt boh lam lơgar Việt Nam mờ ală jơnau pal jăt ƀòn lơgar dê.