Tàm ƀòn dà lềng Quy Nhơn, tiah geh lơh dơ̆ sơnđờm bơh Nam Lòt nhơl Dà lơgar – Gia Lai 2026 dê, ală anih ơm bĭc neh rơcăng lài kờp sền nền wơl tơl làm ală phan rơcăng ồs sa crùh ồs sa. Tàm Anya Premier Hotel Quy Nhơn, hìu năc neh sền swì wơl ală măy yal ồs sa is, anih tờm đơng pơlam, gùng dô pleh bơta sơbơng roh kung bè ală măy mŏk crùh ồs dùl bă tiah; pơgồp bal mờ Kảñ sát rơcăng ồs sa crùh ồs sa lơh ală broă rơndăp lơh drơng wơl tŭ geh jơnau digơlan gơlik geh jal mhar.

Thượng tá ồng Đậu Văn Huy – Phó Lam bồ Cơldŭ Kảñ sát Rơcăng ồs  sa crùh ồs mờ dong kờl cau, dong kờl rềs àr – Kwang àng càr Gia Lai đơs sùm, broă lơh kràñ broă lơh rơcăng ồs sa crùh ồs sa ờ mìng là kơnòl broă bơh is mpồl lơh broă geh gơnoar dê lơm mờ gam là kơnòl bal bơh tơl anih lơh broă, tơl nă cau lơh broă dê nàng pơgồp bơnah bơ̆t bơtàu rùp hin Gia Lai là anih tus niam lơngăp lơngai, đềt mềr. Tàm tơngleh sơnđờm lơh Nam Lòt nhơl Dà lơgar 2026 tàm Gia Lai, càr digơlan rò pơgăp 70 rbô nă năc, kơn jơ̆ gàr niam lơngăp lơngai uă ngan. Bơta rơcăng lài bơh gờñ, bơh ngài mờ ndrờm bal, rơ̆p dong năc lòt nhơl iang nùs tŭ tus mờ Gia Lai.