Chờ gờm Pơrjum dờng Cau ala măt gùt lơgar dơ̆ XIV Đảng dê, bơh lồi nhai 12 nam 2025, càr Khánh Hoà neh bơyai lơh sơnđờm lơh, ai ngui 5 broă lơh bơ̆t bơtàu, rơndăp broă lơh dờng. Lơh sa – mpồl bơtiàn càr dê kung pơn jăt tai geh tam gơl niam tàm gùng dà gơguh bơh nam 2025 dê, lơh gơlik bơta tam gơl mpờl gŏ loh làng ngan ai rài kis Làng bol in tơnơ̆ trồ tiah lơh aniai. Tàm sàh Thuận Bắc, càr Khánh Hoà, uă hìu pơn jăt tai brồ guh lik klàs rƀah kơnhăp jŏ, pin dờn lơh sa, bơ̆t bơtàu rài kis kơ̆ kơl jăp, hờm ram rlau. Mò Chamaléa Thị Điêm, kòn cau Rơglai, ơm tàm thôn Đá Mài Dưới, sàh Thuận Bắc, càr Khánh Hoà, yal: “Wèt tus Pơrjum dờng XIV Đảng dê, làng bol bol hi dòn kơnờm mờ kơ̆p kờñ ală cau ala măt pơn jăt tai lời bơta sền gròi uă tus tiah làng bol jơi bơtiàn dồ êt nă cau; lơh sir Jơnau rơcăng cih Jơnau yal cíñ trị jăt gùng dà rềp mờ bơta geh ngan, bơcri priă di broă, di cau. Bơh hơ̆, lơh geh wơl pràn kơldang rlau tai kơ̆p kờñ ngan kơnờm tàm bơta pràn is, lơh ngan is, nùs nhơm tam klăc, bồ tơngoh kơ̆p kờñ brồ guh bơh làng bol dê nàng cau jơi bơtiàn dồ êt nă cau ờ mìng klàs bơh rƀah kơnhăp jŏ mờ gam tă pơgồp uă ngan tàm bơta bơtàu tơngguh bal bơh dà lơgar dê”.

Tus bal Pơrjum dờng Cau ala măt gùt lơgar dơ̆ XIV Đảng dê, Đảng ƀộ càr Khánh Hoà geh 32 nă cau ala măt. Nùs nhơm geh kơnòl bơh ală cau ala măt dê geh tơnggŏ loh tàm ală tŭ rơcăng tus bal Pơrjum dờng. Ală jơnau đơs tă pơgồp bơh kwang bàng, đảng viên mờ Làng bol dê tàm càr Khánh Hoà gơ wèt mờ Jơnau rơcăng cih ală Sră nggal Pơrjum dờng neh geh tơrgùm jơh, pơyua tus Dà lơgar in bơn gờñ. Ală cau ala măt lời uă tŭ jiơ kơlôi sơnơng nền ală jơnau rơcăng cih, nàng gơtùi tus bal cribơyai geh cồng nha. Phó Pơgru dờng, Tiến sìh ồng Phan Quốc Anh, pơgru bơto Klờng Đại họk Văn Lang, cau ala măt Mpồl càr Khánh Hoà lòt Pơrjum dờng XIV pà gĭt: “Añ gơlơh niam ngan gơ wèt mờ jơnau rơcăng cih jơnau lơh nền tàm pơrjum dơ̆ do tŭ Đảng pơn jăt tai đơs nền bơtàu tơngguh niam chài lòt bal mờ bơtàu tơngguh lơh sa. Jơnau rơcăng cih đơs sùm bơtàu tơngguh lơh sa mờ măy mŏk niam chài, bơ̆t bơtàu ală bơta kwơ dà lơgar, niam chài kòn bơnus mờ hìu bơnhă, sền lơh sa, phan lời wơl niam chài là bơta pràn kwơmàng ai bơtàu tơngguh in. Tàm nùs nhơm kơnòl bơh cau ala măt dê, añ rơ̆p jơh nùs tă pơgồp jơnau đơs tàm ală sră nggal jơnau rơcăng cih jơnau lơh nền tàm pơrjum, broă lơh lơh broă”.

Jăt ồng Nghiêm Xuân Thành, Ƀí thư Tỉñ ủy, Lam bồ Mpồl cau ala măt Đảng ƀộ càr Khánh Hoà, tơl nă cau ala măt tàm mpồl rơ̆p lơh niam jơh nùs jơh tồr nùs nhơm kơnòl, tă pơgồp jơnau đơs tàm bơta tơrgùm ai bơh mùl màl bơtàu tơngguh ƀòn lơgar mờ dà lơgar dê. Is ồn, rơ̆p tơrgùm tàm gah broă mờ càr ai geh bơh mùl màl: “Gơ wèt mờ càr Khánh Hoà, càr neh mờ gam kơlôi sơnơng, dan ală kơrnoăt boh lam, gùng dà broă lơh ờ mìng tàm bơta jòi lơh lơm mờ wèt tus ătbồ broă dà lềng tơlir. Broă tờm là bơtàu tơngguh lòt nhơl, drơng broă sa priă, broă lơh sa sươn sre ngui măy mŏk pa, ngan là ròng tam phan tàm dà măy mŏk pa; bơtàu tơngguh drơng broă sa priă logistics mờ lơh sa mờ măy mŏk kềng gah dà lềng. Mờ càr kung rơ̆p tus bal tă pơgồp jơnau đơs lơh sir kơrnoăt boh lam, gùng dà broă lơh tàm broă dà lơgar nàng kờñ ai tơl bơta niam ai ală bơta pràn ai bơtàu tơngguh lơh sa dà lềng in tàm ală ƀòn lơgar geh bơta ƀươn, bơh hơ̆ tă pơgồp uă ngan tàm gơguh bal dà lơgar dê".

Bơh mùl màl bơtàu tơngguh ngan ngồn ƀòn lơgar dê, is ồn là ală cồng nha tàm bơtàu tơngguh wơl lơh sa – mpồl bơtiàn, sền gròi rài kis Làng bol mờ pơlam gùng bơtàu tơngguh kơ̆ kơl lơh sa dà lềng, ală cau ala măt càr Khánh Hoà kơ̆p gơn rơ̆p tă pơgồp ngan ngồn tàm broă lơh sir ală jơnau lơh nền kwơmàng bơh Pơrjum dờng dê. Ală jơnau đơs tă pơgồp jơh nùs jơh tồr, geh kơnòl hơ̆ ờ mìng tơnggŏ bơta pin dờn bơh kwang bàng, đảng viên mờ Làng bol càr Khánh Hoà dê tàm cồng nha lơh geh bơh Pơrjum dờng XIV Đảng dê lơm mờ gam đơs nền lơh ngan jơh nùs lòt bal mờ jơh gùt lơgar lơh geh ngan ngồn jơnau kơ̆p gơn bơtàu tơngguh mhar, kơnhăp jŏ, bơ̆t bơtàu dà lơgar pas sơm, gơboh gơbài tàm tŭ tơngai pa.