Thôn 5B, sàh Hoà Ninh, càr Lâm Đồng tiah ồng mò, mè bèp bi Ka Thuân ơm kis bơh jŏ rài do kung là tiah ơn prăp broă tàñ ồi yau. Bơh dềt, Ka Thuân neh kwèng mờ rùp să ală pang ồi mbơn, pang ồi trŭp pồt să ờs mờng bơh yau bơh cau ùr K’Ho dê, ală sơpềñ geh tiah là phan ntròñ, pang ồi trŭp să ƀalhiă ngan mơya bềng uă bơhiàn niam chài krơi is.

Nam 2019, tŭ ơm rlô ing broă lơh tàm kông ty nàng ròng kòn dềt, Ka Thuân sơnđờm tăc phan online mờ dờp gŏ geh uă bơta sền gròi bơh cau năc blơi phan dê bè ồi yau. Tàm hìu neh geh lài măi mai phan, mờ geh bèp mờ bi ùr bơto tai gùng jrum cồng brài bơh gờñ, bi lơh nền tê he lơh gơlik is phan bơna he dê, ai măt kă bro Ka Thuân Minz. Bơh chờm, bi mìng mai phan soh pa bơh ồi yau ai să tờm in soh lòt ñô bau, lòt ñô sa nhơl. Gŏ niam, uă cau prơ, hơ̆ sồng sồr mai bal. Bi Ka Thuân ñŏ lơbơn niam ngan yal:

 “Lài mờ tŭ añ pờ hìu măy phan soh pa mai bơh pang ồi yau jơi bơtiàn K’Ho dê, tàm ƀòn lơgar gŏ uă ngan làng bol he kờñ ngan soh phan ồi yau bơrlŭ bal mờ rùp bơka phan soh pa rài do dê. Bơh hơ̆ añ geh jơnau kơlôi pơgồp bal wơl đah pang ồi yau bơrlŭ bal mờ phan soh pa tŭ do bal mờ bơta kơ̆p kờñ ngan sền gàr wơl bơta niam chài ờs mờng bơh yau ồng mò yau dê, tŭ rơnàng kơnòm să soh phan mai bơh ồi yau do den oh kòn kòn sau gĭt geh niam chài ờs mờng bơh yau ồng mò dê bơh phan soh, bơh hơ̆ khi geh bơta gĭt wă sền gàr gơ. Cau năc blơi phan kờñ phan soh lơi den he rơ̆p wăc mai phan hơ̆ ai năc in. Tŭ mờ năc sồr he mai bè lơi là añ rơ̆p đal gĭt geh broă koh, to. Cau năc ngài ngan añ dê là cau Việt Nam ơm tàm lơgar ndai bal mờ cau lơgar ndai. Hìu mai phan añ dê mìng tăc ală drơng broă sa priă ală cau lơi gơboh kờñ, kờñ ngan ồi yau den añ hơ̆ sồng lơh ai khi in”.

Ơm bơh ngkời cồng nha lơh geh bơh Ka Thuân dê pal yal tus bơta lòt bal ngềt ngơ̆t bơh hìu bơnhă dê. Bi K’Hùng, bơklau bi Ka Thuân dê chờ hờp dờp lơh jơh ală broă tàm hìu bơnhă nàng pơ ùr in geh tŭ jiơ lời nùs gơboh ai phan soh pa ồi yau in. Ờ mìng bè hơ̆ lơm pah dơ̆ bi Ka Thuân ai phan bơna tus bal ală dơ̆ ràng tơlik, yal tơngĭt, soh phan pa ai cau in sền tàm dơlam mờ bơdìh càr, bi K’Hùng bal tai wơl lòt bal dong pơ ùr broă kơn jơ̆, dờp lơh broă ròng sền kòn dềt nàng pơ ùr in iang nùs tàm broă lơh:

 “Añ dùl nùs bal mờ pơ ùr nàng pơ ùr in lơh broă do. Do là broă lơh ờs mờng bơh yau jơi bơtiàn he dê, nàng rơnàng tơnơ̆ do sùm gĭt tus. Añ dong pơ ùr iang nùs lơh broă, bơtàu tơngguh tai broă do yal tơngĭt yal uă ồi yau cau K’Ho geh gơrề uă ờ mìng tàm lơgar lơm mờ bơdìh lơgar kung gĭt bal sơl”.

Bơh broă tus bal ală broă lơh phan soh pa, yal uă, yal tơngĭt phan bơna phan soh pa ồi yau tàm uă internet mpồl bơtiàn, phan bơna phan soh pa ồi yau bơh Ka Thuân dê ngai sơlơ geh uă cau gĭt. Ală phan bơna phan soh pa ồi yau bơh bi Ka Thuân dê bơceh mai ờ mìng lơh cau soh in pin dờn mờ gam lơh kah wơl nùs nhơm pơniờ să. Nam 2024, jơnau kơlôi lơh sơnđờm mŭt lơh broă “Cèng ồi yau tus mờ jơh tơl nă cau in” bơh Ka Thuân dê lơh geh khà Bàr dơ̆ pơrlòng sơnđờm mŭt lơh broă tam gơl pa bơceh lơh càr Lâm Đồng dơ̆ 7. Do ờ mìng là phan jờng ai bơta bơceh lơh in lơm mờ gam là bơta cih dờp lơh ngan sền gàr mờ lơh gơrề uă bơhiàn niam chài krơi is jơi bơtiàn dê tàm rài kis pa ngai do.

Bi K’Vũ ơm tàm sàh Đinh Văn Lâm Hà, đơs là, bơh mpàng tê chài ngan bơh bi Ka Thuân dê, ală phan bơna phan soh pa ồi yau gơ gàr geh nùs nhơm, bơhiàn niam chài krơi is Tây Nguyên dê mơkung kung geh bơta bơceh lơh pa dipal mờ rài kis ngai do:

 “Ồi yau gơhòi gơ jà jơh ală măt sền tài bơh tŭ do ală phan bơna bè do dồ êt ngan. Ală broă lơh is ồn tŭ he soh phan do den gơ là guang ngan, sùm cèng ai he in bơta gơlơh là pơniờ să ngan mờ gŏ gơlơh is ồn ngan. Bi lơh gơ là jak ngan, nàng prăp gàr geh bè do kung pal là bòl glar ngan, gàr geh là kwơmàng ngan”.

Sền rơmê ngan ală phan bơna ồi yau bơh Ka Thuân dê lơh gơlik, bi Hoàng Thị Thanh Huyền, pơgru Hìu bơsram Bal Jơi bơtiàn Ơm sa bĭc tơn càr Lâm Đồng, gŏ bè do:

 “Añ gŏ gơlơh jơh ală phan bơna do gơ tơnggŏ geh nùs nhơm, bơhiàn niam chài krơi is jơi bơtiàn bơh làng bol Tây Nguyên dê, bơhiàn ờs mờng bơh yau mơya kung gam geh bơta pa ngan. Uă ngan phan bơna geh bơceh lơh pa jăt tàm bơnàng jă ờs mờng bơh yau, rài pa tŭ do mờ bơceh lơh. Să tờm añ là pơgru Hìu bơsram Jơi bơtiàn Ơm sa bĭc tơn càr Lâm Đồng dê den añ gŏ gơlơh là pơniờ să ngan bè ƀòn tờm dơ̆ bàr mờ gŏ gơlơh bơhiàn niam do kờñ pal prăp gàr mờ kờñ pal lơh gơrề uă rlau tai”.

Ngềt ngơ̆t mờ broă lơh là cau mờng mai phan ƀòn dê, pah nam, bơh jơtrơi mờ mpàng tê chài ngan bơh bi Ka Thuân dê, gĭt nđờ rơhiang blah phan soh ồi yau geh lơh gơlik, gŏ măt tàm lơh yàng lơh chờ, ngai ñô bao mờ ală dơ̆ dờng màng. Is ồn, rùp să ală ùr ƀân jơi bơtiàn K’Ho dê soh tàm să he ồi rà mai bơh ồi yau mờ rùp bơka ờs mờng bơh yau là bơta pơniờ sa dờng ngan gơ wèt mờ bi Ka Thuân.

Tàm rài kis tam gơl pah ngai bơh Tây Nguyên dê, bi Ka Thuân Minz kung gam tơryăng tơryồng ngan tềng kơƀàng mai phan, ơn pơyua nùs gơboh niam chài K’Ho dê tàm tơl gùng jing cồng jrum. Bơh ală pang ồi yau ờs mờng bơh brê bơnơm dê, Ka Thuân Minz gam tàñ gơs bơta kơ̆p kờñ phan soh pa – bơta kơ̆p kờñ bè dùl bơhiàn niam chài krơi is geh sền gàr, ròng srồm mờ gơcrà àng tàm rài kis ngai do.