Thôn Hàng Làng, sàh Gung Ré, kơnhoàl Di Linh, càr Lâm Đồng geh uă ngan làng bol ơm kis là làng bol jơi bơtiàn dồ êt nă cau. Ală nam do, broă bơ̆t bơtàu mờ bơtàu tơngguh đảng viên mờ ală làng bol jak sùm geh kâp ủy, ci ƀộ is ồn sền gròi. Kra ƀòn ồng K’Neo, Ƀí thư Ci ƀộ thôn Hàng Làng pà gĭt, kơnờm sền gròi broă lơh tề lam, bơtàu tơngguh đảng viên niam ala tài khà, 100% đảng viên tàm ci ƀộ, ngan là ală đảng viên pa ndrờm jơh nùs jơh tồr, lơh jăt niam gơnoar broă lơh lài, lơh krơh tàm bơtàu tơngguh lơh sa mờ rài kis.

 “Lài do, ci ƀộ mìng geh 8 nă đảng viên, tus tŭ do neh bơtàu tơngguh tus 13 nă đảng viên, tàm hơ̆ uă ngan là đảng viên làng bol jơi bơtiàn dồ êt nă cau. Tàm nam do, ci ƀộ pơn jăt tai sền swì mờ ai 2 nă làng bol jơi bơtiàn dồ êt nă cau jak lòt bơsram ơdŭ wă wờng bè Đảng, mờ tŭ neh bơsram sir den ci ƀộ rơ̆p sền swì nàng tơmŭt. Pal đơs là, ci ƀộ sền gròi ngan tus ală làng bol jak, ală cau geh nùs nhơm jơh nùs jơh tồr, gĭt phi să, kơ̆p kờñ ngan mờ Đảng den bol hi tơmŭt tàm mpồl bơtàu tơnguh Đảng dê. Tơnơ̆ tŭ tơmŭt sir, tơl nă đảng viên ndrờm jơh nùs lơm, sùm là lam bồ lơh krơh, lơh lài tàm tơl broă, lơh krơh nàng làng bol in đòm jăt”.

Ndrờm bè hơ̆ sơl, tiah làng bol jơi bơtiàn dồ êt nă cau sàh Dà Nhim, kơnhoàl Lạc Dương, càr Lâm Đồng kung lơh niam broă lơh tề lam, ai tơl bơta ai uă làng bol jak in geh ngan ngồn ñă ntàu tàm mpồl đảng dê. Tàm rlau 120 nă đảng viên, pơrjum tàm 10 ci ƀộ gơ wèt sàh Dà Nhim den rlau nggùl khà là làng bol kòn cau K’Ho. Bi Cil Pam K’Duyên, đảng viên pa bơh Ci ƀộ thôn Dà Tro, sàh Dà Nhim dê đơs là, geh cau ngan, broă ngan den broă lơh mblàng yal, hòi jà ală jơnau lơh nền, gùng dà, broă lơh Đảng dê mờ kơrnoăt boh lam Dà lơgar dê hơ̆ sồng cèng wơl cồng nha niam, làng bol tàm ƀòn lơgar hơ̆ sồng đòm jăt lơh jăt. Den tàng bè hơ̆, nàng làng bol in dòn mờ khin cha tam gơl bơta kơlôi sơnơng tam phan, tam gơl rơndăp tăp sèng chi tam, ai ală sơntìl chi tam pa nàng tam, tơngguh uă priă lơh geh den tơl nă đảng viên sùm pal là cau lơh lài lơh krơh.

 “Tơnơ̆ tŭ añ gơgơs là đảng viên neh geh tai tŭ niam nàng gĭt wă loh rlau bè ală jơnau sồr, gùng dà Đảng dê, broă dong kờl, kơrnoăt boh lam Dà lơgar dê. Bơh hơ̆, añ hơ̆ sồng gơtùi lơh niam geh broă, kơnòl broă geh ci ƀộ jàu. Añ neh dong kờl làng bol ƀòn añ geh uă rlau, mùl màl là hòi jà làng bol tam gơl chi tam, lơh ngan tam tai tờm chi tam lơyah ngai nàng tơngguh tai priă lơh geh, bơtàu tơngguh lơh sa hìu bơnhă. Tŭ do, rài kis làng bol jơi bơtiàn dồ êt nă cau tiah do dê neh ờ huan kal ke uă ngan pơndrờm mờ lài”.

Jăt ồng Cil Ha Poh, Ƀí thư Đảng ủy sàh Dà Long, kơnhoàl Dam Rong, càr Lâm Đồng den nàng kờñ lơh niam broă lơh bơtàu tơngguh đảng viên, ngan là ală đảng viên pa tàm tiah làng bol jơi bơtiàn dồ êt nă cau, broă jòi rơcăng cau, tề lam ală làng bol tàm ală mpồl cíñ trị mpồl bơtiàn, ƀòn lơgar tàm kâp hơđơm sùm là kơnòl broă tờm kwơmàng ngan. Jăt tàm bơta hơ̆, bơh bồ tơngai lơh broă tus tŭ do, sàh Dà Long neh bơtàu tơngguh geh đảng viên, tàm hơ̆ geh 11 nă đảng geh sră cơng tàng jơh bơsram đại họk mờ 5 nă đảng viên jơh bơsram trung kâp. Do là ală đảng viên pa gam kơnòm, làng bol jơi bơtiàn ơm kis bơh jŏ tàm ƀòn lơgar geh sền là mpồl cau tàm pơn jăt tàm pơdờn tàm bơ̆t bơtàu mờ bơtàu tơngguh đảng tàm tơngai lơh broă tus. Ồng Cil Ha Poh, pà gĭt: “Jăt tàm jơnau sồr lơh bơh kâp hơđang dê den Đảng ủy sàh neh kràñ cê jơh nùs tàm broă jòi rơcăng cau, jàu broă cau tàm đảng ủy in drơng kơnòl ală ci ƀộ, bal mờ ală ci ủy ci ƀộ jăt sền, tề lam, bơsram tàp mờ lơh niam broă lơh bồ tơngoh. Sền gròi ală làng bol jak là ơruh pơnu neh lòt ling, ơruh pơnu jơh nùs tàm lơh sa bơtàu tơngguh lơh sa, ơruh pơnu jơh nùs tus bal ală srơh tàm pơrlòng gơboh lơgar…Bơh hơ̆ geh cau mờ ai tơl bơta lòt bơsram ơdŭ wă wờng bè đảng. Tơnơ̆ tŭ jơh bơsram wă wờng bè Đảng, ală đảng viên tàm ci ƀộ pơn jăt tai dong kờl, bơsram tàp nàng geh tai gĭt wă di, bơta kơ̆p kờñ di tŭ ñă ntàu tàm mpồl Đảng dê”.

Ală đảng viên pa gam kơnòm, jak tàm tiah làng bol jơi bơtiàn dồ êt nă cau càr Lâm Đồng dê gam đơs nền gơnoar broă lơh lài, lơh krơh, rơcăng lài brồ guh tàm lơh sa mờ rài kis. Bơta do đơs nền gùng lòt di ngan, kơ̆ kơl jăp tàm broă lơh bơ̆t bơtàu Đảng gơ jăt bal mờ bơtàu tơngguh tiah làng bol jơi bơtiàn dồ êt nă cau tàm tơngai tŭ do. Do geh sền là kơnòl broă cíñ trị kwơmàng, là broă lơh bơsong nàng Lâm Đồng lơh pràn kơldang ală anih lơh broă cíñ trị tàm kâp hơđơm, pơgồp bơnah ai tơl bơta bơtàu tơngguh lơh sa- mpồl bơtiàn, sền gàr lơngăp lơngai rơndăp tăp sèng mờ tơnguh tai mpồl tam klăc dờng jơh gùt jơi bơtiàn tàm ƀòn lơgar.