Tàm anih ơhò ka ơm Đông Tác gơ wèt sơnah ƀòn Phú Yên, càr Dăk Lăk, 22 nơm ơhò ka lòt tras kŭp ka ngài àr tus ơm hờ anih ơhò ka ơm, cèng jăt bal gĭt nđờ jơ̆t tấn ka ngừ dà lềng dờng nàng tăc mờ ală mpồl lơh sa kă bro phan tàm dà ròng. Kờp bal tơl nơm ơhò lơh geh bơh 50 tus 70 nơm ka ngừ dà lềng dờng, ndrờm mờ bơh 2 tấn mờ nggùl tus 3 tấn ka. Is ồn bè ơhò ồng Phùng Hồng Ánh dê cèng rê 90 nơm ka ngừ. Ơhò ồng Bùi Văn Xông tras kŭp geh rlau 70 nơm. Giă ka ngừ nđar rơmĭt bồ nam geh ală mpồl lơh sa kă bro blơi rlau 100 rbô đong dồ kĭ, ndrờm mờ ală nam lài. Khà ka tras geh uă, giă tăc ka gơ ơm sùm, làng bol lơh ka geh priă lơh geh uă. Ồng Bùi Văn Xông, sơnah ƀòn Phú Yên, càr Dăk Lăk chờ hờp pà gĭt: “Nam do bồ nam bơta tras kŭp ka ƀươn ƀoài ai làng bol in, gŏ kung chờ hờp sơl, pa mŭt mờ dùl nơm poh phàm jơ̆t nơm ka den tềng đăp măt là ưn ngài trồ tiah rao den. Khà ka lơh geh den là niam rao. Giă ka den kung gơ ơm sùm sơl”.

Cau tờm ơhò geh cồng, bơyô ơhò kung geh priă lơh geh uă sơl, geh dơ̆ ngui tàm dơ̆ sa tềp nam Ơseh. Làng bol lơh ka ồng Phạm Đắc Dũng ơm tàm tiah drà 4, sơnah ƀòn Phú Yên, chờ hờp: “Nam do trồ tiah ƀươn ƀoài, càl niam, ka gơlòt. Añ lòt bàr jơ̆t nđờ ngai mŭt geh bàr tấn nđờ, tam pà dùl nă cau pơgăp bơh 15 tus 16 tơlak đong. Oh mi lơh sa geh, oh mi geh priă uă”.

Bè ờs, bơh bồ nhai 12 nam lài tus nhai 1 nam tơnơ̆ jăt nam he là tơngai ka ngừ dà lềng dờng geh uă. Tơnơ̆ ală dơ̆ mìu càl rbŭt dờng geh sùm, dà lềng gơ ring drik wơl, ka ngừ geh uă neh dong làng bol lơh ka lơh geh khà ka uă, kơnờm bè hơ̆ làng bol geh gơn kơnờm nàng lòt lơh ka tàm dà lềng tàm ală ngai sa tềp tơn mờ wă rò mang tàm jàu sơnam tàm dà lềng. Dồ nă làng bol lơh ka pà gĭt: “Tơnơ̆ tŭ kơng tăc ka sir jơh, làng bol lơh ka sùm ơm rlô ing gời pơgăp 1 poh hơ̆ sồng làng bol pơn jăt tai lòt lơh ka, sa tềp tàm dà lềng, tài bơh tàm dùl nam mìng bàr pe nhai là geh tơnhàu uă ngan rlau jơh”.

Làng bol kung kơ̆p kờñ tàm nam pa 2026 gah broă lơh sa sươn sre càr Dăk Lăk ai tơl bơta sơrbì jơnau sồr jơnau cih yal mờ ala mờ jăt sền gùng lòt nàng ƀươn ƀoài ai làng bol in tàm sră nggal dong kờl xăng zờu Cíñ phủ dê. Ồng Đặng Cu Em, lam bồ ơhò ka PY91008TS geh jơnau đơs: “Bơta măy cih jơnau yal rlau jơ̆t nam tŭ do neh klàr jơh, cih ờ tơl jơnau. Den tàng kơ̆p kờñ gah lơh broă geh gơnoar ai sơrbì broă cih yal jơnau, ngui mờ jăt sền gùng lòt làng bol dê”.

Ală ngai sa tềp nam Ơseh mờr tus rềp kung là tŭ ală anih ơhò ka ơm, anih ơn ka ur ar hô hơng ơhò lik mŭt. Làng bol kơ̆p kờñ sơnam pa trồ niam dà lềng ring drik, ka kơn jơ̆ jàl bềng, sră rơmĭt câu Âu geh tă sơrbì nàng giă ka ngừ tăc mờ lơgar ndai geh gơguh đau dồ êt, dong làng bol lơh broă tras kŭp ka dà lềng tơrmù ƀà kal ke tơnơ̆ dùl nam pa do uă trồ tiah lơh aniai, mìu càl rbŭt dờng. Sơnam pa jơh ală sơm băt tê bal ai broă lơh ka bơh càr Dăk Lăk dê bơtàu tơngguh kơnhăp jŏ.