Tiah ƀòn drà 6, sơnah ƀòn Quy Nhơn tŭ do geh 67 nơm ơhò ka bal mờ rlau 200 nă làng bol lơh ka sùm lòt tras kŭp ka jòng ngai tàm dà lềng. Ală ngai rềp ndo, tŭ ơhò ka rê wơl tơnơ̆ dơ̆ lòt dà lềng, mò Mai Thị Gái, Lam bòo Mpồl Lơh broă Mặt trận tiah ƀòn drà 6 geh tai măt tàm tiah kơ̆t ơhò plung nàng mblàng yal bè ngai tĕ khà. Tàm do, mò phàt pang sră pang, yal bè tŭ jiơ tĕ khà, mơkung hòi jà làng bol rơcăng lài rơndăp tăp sèng tŭ jiơ nàng lơh jăt gơnoar mờ kơnòl cau tĕ khà dê. Gơ wèt mờ ală ơhò ka gam lơh broă tàm dà lềng, mò hòi jà cau tờm ơhò hòi lùp bơh ală anih yal tơngĭt nàng yal, tơngkah làng bol lơh ka gờñ jun ơhò rê hờ ù gờl nàng lòt tĕ khà. Mò Mai Thị Gái, pà gĭt: “Pah ngai, jơnum tĕ khà sồr cau lòt tus tơn tàm hìu ală hìu làng bol dê nàng mblàng yal, hòi jà làng bol rơndăp tăp sèng tŭ jiơ lòt tĕ khà. Ală cau tơlik măt tĕ khà tàm sơnah ƀòn Quy Nhơn kung geh yal tơnggĭt nàng làng bol lơh ka gĭt jơnau yal, săc rwah ală cau dipal pồ mŭt tàm Quôk hội”.

Geh mblàng yal tơn, uă làng bol lơh ka gĭt wă loh rlau bơta kwơmàng bơh pang sră dê mờ crăp rơcăng tus bal ngai tĕ khà. Làng bol lơh ka ồng Nguyễn Văn Tuấn, tàm tiah ƀòn drà 6, sơnah ƀòn Quy Nhơn pà gĭt, oh mi tàm ơhò neh rơcăng lài rơndăp tăp sèng broă nàng thàn rê hờ àr tàm ngai tĕ khà.

 “Rơcăng tus ngai tĕ khà 15/3, añ kung lơh jăt, rơ̆p rlô dùl ngai nàng àng drim gờñ lòt tĕ khà tàm ƀòn lơgar”.

Bơdìh mờ ală broă lơh mblàng yal sền gŏ mờ măt bè pano, áp phích tàm kơnhoàl ù tiah tĕ khà mờ ală gơl gùng tờm, gơnoar ătbồ ƀòn lơgar gam lơh pràn mblàng yal tơn tàm tiah kơ̆t ơn ơhò plung, dong làng bol lơh ka gĭt wă loh rlau bơta kwơmàng bơh dơ̆ tĕ khà dê. Kơnờm bè hơ̆, uă làng bol lơh ka neh rơcăng lài rơndăp tăp sèng tŭ jiơ rê hờ àr lòt đùh sră. Ồng Nguyễn Đức Toàn, Củ tịc Anih duh broă Tĕ khà sơnah ƀòn Quy Nhơn pà gĭt, ƀòn lơgar neh lam lơh uă broă rơndăp lơh bơsong nàng kờñ làng bol lơh ka, ală cau tĕ khà sùm lòt dà lềng jòng ngai kung gam lơh jăt wil tơl gơnoar tĕ khà bơh he dê sơl.

“Uă ngan làng bol lơh ka ndrờm geh cau hìu bơnhă ơm tàm ƀòn lơgar. Ală tiah ƀòn drà mờ mpồl lơh broă tĕ khà neh yal tus tơl hìu bơnhă, pà sră cau tĕ khà, mờ is ồn là pà bồng bi ai làng bol lơh ka in nàng gờm chờ ngai tĕ khà. Ală hìu bơnhă kung neh yal di tŭ nàng làng bol lơh ka in gĭt, rơndăp tăp sèng tŭ jiơ rê hờ àr ngai 15/3 lơh jăt gơnoar tĕ khà jăt jơnau sồr”.

Jăt ồng Bùi Duy Ninh, Phó Củ tịc Anih duh broă Làng bol sơnah ƀòn Quy Nhơn Đông dê yal, broă lơh mblàng yal hòi jà làng bol lơh ka lòt tĕ khà geh ƀòn lơgar is ồn sền gròi. Sơnah ƀòn neh sồr ală tiah ƀòn drà, jơnum tĕ khà pơgồp bal mờ ală jơnum mpồl broă ka gĭt tŭ jiơ lòt dà lềng bơh làng bol lơh ka dê nàng yal dipal. Mơkung sơlơ mblàng yal tai bơh ală loa mblàng yal jơnau, ală dơ̆ pơrjum mpồl bơtiàn mờ mblàng yal tơn tàm anih ơhò ka, tiah kơ̆t ơm ơhò plung in.

“Làng bol lơh ka tàm ù tiah sơnah ƀòn geh khà uă tàm làng bol ơm kis mờ sùm lòt dà lềng jòng ngai tài bè hơ̆ broă mblàng yal mờ hòi jà làng bol lơh ka lòt tĕ khà geh ƀòn lơgar is ồn sền gròi. Mơkung hòi jà làng bol lơh ka rơndăp tăp sèng tŭ jiơ lòt dà lềng dipal nàng lòt đùh sră wil tơl”.

Mờ bơta mŭt lơh bal bơh jơh ală anih lơh broă cíñ trị dê, làng bol lơh ka tàm ală ƀòn lơgar kềng gah dà lềng càr Gia Lai dê neh gĭt loh gơnoar mờ kơnòl pal lơh he dê, rơcăng lài rơndăp tăp sèng tŭ jiơ tus bal ngai chờ jơh gùt làng bol dê. Pang sră tĕ khà bơh ală cau tĕ khà dê sùm lòt dà lềng rơ̆p pơgồp bơnah kwơmàng tàm cồng nha bơh dơ̆ tĕ khà ngai hìng dê.