Ală ngai do, gơl gùng bê –tông bơh anih tờm sàh M’ Drăk mut tàm ƀòn M’Suốt àng gơcrà ƀồng bi pơrhê sơrmañ rơmĭt, pano mblàng yal bè Pơrjum dờng dơ̆ 14 bơh Đảng dê. Tàm bơta chờ hờp kàl tơnhào tào geh cồng nha uă, đảng viên Y Liêu Niê, kòn cau Rơdê ơm tàm ƀòn M’ Suốt sàh M’Drăk pà gĭt, lơh jat srơh tàm pơrlòng gờm chờ pơrjum dờng, làng bol jơh nùs tam tào, kơphê, tiêu, sầu riêng, ròng phan poan jơng, iar ada, priă lơh geh sơlơ gơguh, kơnờm bơh hơ̆ rài kis ngai sơlơ bơtàu tơnguh. Tŭ do Ci ƀộ ờ gam geh hìu bơnhă rƀah, jơh ƀòn mìng gam 11 tàm 172 hìu bơnhă rƀah lơm.

Wèt tus Pơrjum dờng dơ̆ 14, đảng viên Y Liêu Niê pơyoa uă bơta kơ̆p kơnờm:“Làng bol kơ̆p kờñ Đảng mờ Dà lơgar pơn jat tai sền gròi, bơcri priă tai ală broă lơh bơtàu tơnguh phan bơna bơt bơtàu gùng lòt rê, dà sàng goh, ală bơtơ̆t rbòng dà, hìu bơsram, hìu sơnơm; mơkung geh uă broă lơh dong kờl oh kòn làng bol jơi bơtiàn dồ ết nă cau in geh bơsram sră tơl làm, bơsram broă lơh, geh broă lơh sùm, bơh hơ̆ pơgồp bơnah bơt bơtàu ƀòn lơgar ngai sơlơ pas gơs mờ bơtàu tơnguh”.

Cau chài Hring Mlô, 68 sơnam, kòn cau Rơđê ơm tàm ƀòn M’Găm, sàh M’Drăk pà gĭt, tơngai lơh broă pa do, kơnờm bơta sền gròi bơh Đảng mờ Dà lơgar bal mờ bơta lơh ngan bơh làng bol dê, rài kis làng bol tàm ƀòn ngai sơlơ geh bơtàu tơnguh, niam chài nùs nhơm geh sền gàr. Să tờm làng bol bal mờ ală cau dờng sơnam tàm ƀòn sùm lơh ngan prap gàr broă tàñ ồi kòn cau, bĕ tơrnờm halà ală bơta kwơ niam chài ndai...ờ gŏ di lời gơtìp roh tĕ ờ. Mơya, nàng broă prap gàr geh kơnhăp kơ̆, tơnơ̆ Pơrjum dờng mò kơ̆p kờñ ală kấp, gah broă pơn jat tai geh ală broă lơh di pal, pơgồp bal bơtàu tơnguh lòt nhơl mpồl bơtiàn mờ prap gàr mờ ngui niam bơhiàn niam chài is kòn cau Rơđê dê.

Cau chài Hring Mlô đơs jơnau đơs he dê:“Mìr hìu añ dê geh gùng lòt Đông Trường Sơn lòt gan mờ 1 lồ 4 sào ù tiah tam kơphê, tờm chi sa plai mờ geh lơh hìu rơng. Añ gĭt ƀĕ tơrnờm, tàñ ồi kòn cau mờ trŭ gơm ală phan sa kòn cau Rơđê dê. Tơnơ̆ Pơrjum dờng, kơ̆p kờñ ală kấp, gah broă dong kờl nàng hìu bơnhă bal mờ làng bol tàm ƀòn M’ Găm bơtàu tơnguh lòt nhơl mpồl bơtiàn, pơgồp bal mờ sền gàr niam chài tàñ ồi kòn cau, dròng cing mồng. Tŭ do gùng lòt neh bơtàu tơnguh, broă lơh lòt nhơl rơ̆p ƀuơn rlau mờ lài do, mơya pal geh bơta dong kờl, pơlam gùng dà bơh Đảng mờ Dà lơgar dê”.

Phó Ƀí thư Đoàn sàh M’Drăk Y Khương Mlô pà gĭt, rơnàng kơnòm să sùm geh sền là “tê đah ma bơh Đảng dê”, ngan là tàm tơngai tơnơ̆ dơ̆ tơmŭt bal. Lơh jat srơh tàm pơrlòng gờm chờ Pơrjum dờng dơ̆ 14 bơh Đảng dê, đoàn viên, ơruh pơnu sàh M’Drăk neh jơh nùs tus bal uă broă lơh geh ngan. Rlau 2 rơbô 550 nă đoàn viên tus bal pơs wàs sàng goh tiah ơm kis, yồng bồng bi, ƀăng rôn, panô mblàng yal bè Pơrjum dờng. Is ồn, bơh nhai 7 nam 2025 tus tŭ do, gĭt nđờ jơ̆t rbô dơ̆ đoàn viên neh bơto pơlam làng bol bơsong sră pơ àr gơnoar atbồ, sền gĭt VNeID, pơgồp bơnah dong kờl gơnoar atbồ ƀòn lơgar lơh broă sùm.

Wèt tus Pơrjum dờng dơ̆ 14, bi Y Khương Mlô tơngŏ bơta kơ̆p kơnờm:“Tơnơ̆ dơ̆ Pơrjum dờng dơ̆ 14 bơh Đảng dê, oh kơ̆p kờñ rơnàng kơnòm să bol oh pơn jat tai geh lùp bơsram, sơlơ geh uă tai bơta gĭt wă, geh sền gròi, dong kờl nàng gĭt mờ ală bơta gĭt wă pa, geh tai tŭ tơngai niam lơh jat niam gơnoar broă bơceh lơh rlau tai tàm tam gơl sồ; mơkung tus bal sền gàr, ngui niam bơhiàn niam chài is ờs mờng bơh yau mờ ală broă lơh lời ai đoàn viên, ơruh pơnu mờ kơnòm pa tàu in”.

M’Drăk geh rlau 22 rơbô hìu bơnhă, mờr 40% là làng bol jơi bơtiàn dồ ết nă cau; Đảng ƀộ sàh geh mờr 1 rơbô 200 nă đảng viên pơrjum tàm 56 mpồl đảng. Mờ bơta pin dờn tàm Đảng mờ Pơrjum dờng dơ̆ 14 dê, bơh đảng viên, làng bol tus đoàn viên, ơruh pơnu ndrờm lơh ngan tàm pơrlòng lơh broă, lơh sa, sền gàr bơhiàn niam chài is, pơgồp bơnah bơt bơtàu gơnoar atbồ ƀòn lơgar kơnhăp pràn, kơ̆p kơnờm dùl dơ̆ Pơrjum dờng geh cồng nha, pờ geh tŭ tơngai bơtàu tơnguh pa ai ƀòn lơgar in.