Lơh broă mờ Mpồl Lơh kơnòl broă sùm Tỉñ ủy càr Khánh Hoà, Kwang bàng Ƀộ Cíñ trị, Ƀí thư Đảng Dà lơgar, Cau kong kơnòl Anih duh broă Sền swì Dà lơgar ồng Trần Sỹ Thanh đơs sùm, broă lam lơh jăt Jơnau lơh nền tàm pơrjum bơh Pơrjum dờng Đảng ƀộ càr Khánh Hoà pal gơ jăt bal  nền nòn mờ Jơnau lơh nền tàm Pơrjum bơh Pơrjum dờng gùt lơgar dơ̆ XIV dê; Càr Khánh Hoà ờ mìng ơm wơl tàm lơh jăt mờ kờñ pal rơcăng lài, bơceh lơh, jòi gơlik broă lơh pa, broă lơh tơrlòng lài geh cồng nha nàng Dà lơgar tơrgùm wơl, rề ơnàng lơh uă. Broă lơh sền swì, jăt sền ờ gŏ di là nàng “kŭp tìs” mờ là nàng kờñ lòt bal, di tŭ tă bơsong kal ke, bơsong jơh ală rơndăp broă lơh lơyài tơngai lơh, anih gơkòl jŏ jòng, lơh gơlik bơta gơn kơnờm ai gơguh tai in.

Cau kong kơnòl Anih duh broă Sền swì Dà lơgar ồng Trần Sỹ Thanh tơngkah, jơnau kờñ gơguh tai 2 nơm khà ờ gŏ di mìng là jơnau đơs tềng mbùng lơm mờ pal bơh broă lơh bơsong loh làng, loh cau, loh broă, loh tơngai pơrgon lơh; sơlơ lòt sền, jăt sền gơ jăt bal sền swì gĭt nền khà cồng nha tă pơgồp tàm gơguh tai. Mơkung, lơh pràn lơh tam gơl pa wơl sră pơ àr gơnoar ătbồ ngan ngồn, lơh gơrề nùs nhơm Jơnau lơh nền tàm pơrjum tus tơl nă kwang bàng, đảng viên mờ jơh gùt mpồl bơtiàn, lơh gơlik bơta tam gơl mpờl gŏ loh tàm lơh broă. Ồng Trần Sỹ Thanh, đơs: “Tàm jơh ală tơngume jơnau yal sền swì, jăt sền pal lơh loh mờ was kờp geh khà tă pơgồp tàm gơguh tai bơh Khánh Hoà dê là nđờ bơnah rơhiang, kơ̆p kờñ geh đau bè hơ̆ là niam ngan rlau jơh. Ờ gŏ di là ai gĭt, ai gĭt kung mìng nàng lơh niam rlau. Bơh hơ̆, bal mờ gơ̆p jòi gơlik gùng lòt mờ broă bơsong ală broă gơ ai tơlik; tă pơgồp jơnau đơs broă rơndăp lơh bơsong loh làng nàng lơh geh jơnau kờñ gơguh tai 10%. Bơsong broă là nàng lơh bơta lơi? Càr lơh bơta lơi? Dà lơgar lơh bơta lơi? Cau lơi jăt sền tơngai pơrgon lơh mờ tàm tơngai ai lơh nđờ jŏ? Ờ gơtùi đơs bal bal, pal geh ngai jiơ, jàu broă loh làng”.

Ồng Nghiêm Xuân Thành, Ƀí thư Tỉñ ủy càr Khánh Hoà pà gĭt, ƀòn lơgar neh jơh nùs bơsram kơlôi sơnơng, lam lơh jăt Jơnau lơh nền tàm pơrjum bơh Pơrjum dờng XIV Đảng dê mờ ală broă lơh broă, pal ring bal, ndrờm bal bơh càr tus kâp hơđơm. Ƀòn lơgar jơh nùs lơh jăt jơnau kờñ gơguh tai bàr nơm khà, lơh jăt ngan ngồn jơnau kơ̆p kờñ ngan bơ̆t bơtàu càr gơgơs ƀòn dờng gơ wèt Dà lơgar jăt Jơnau lơh nền tàm pơrjum sồ 09 Ƀộ Cíñ trị dê.

Lơh broă mờ Mpồl Lơh kơnòl broă sùm Tỉñ ủy càr Gia Lai, Kwang bàng Ƀộ Cíñ trị, Ƀộ trưởng Ƀộ Cribơyai broă mờ lơgar ndai ồng Lê Hoài Trung đơs sùm, broă lơh sền swì, jăt sền nàng kờñ lơh bè lơi ală Jơnau lơh nền tàm pơrjum, Jơnau sồr lơh bơh Dà lơgar dê geh lam lơh niam, ndrờm bal, geh cồng nha, di pơlam gùng. Tàm bơta ală kâp ủy Đảng gam tơrgùm lơh jăt Jơnau lơh nền tàm pơrjum bơh Pơrjum dờng XIV mờ rơcăng tĕ khà, kơnòl broă do sơlơ gơcèng bơta gơlik geh pah ngai, jal mhar. Càr Gia Lai pal sền gròi sền swì broă lơh jăt jơnau kờñ gơguh tai bàr nơm khà; lam lơh jăt jơnau lơh nền bơyai lơh gơnoar ătbồ bàr kâp; bal mờ ală Jơnau lơh nền tàm pơrjum bơtàu tơngguh ală gah broă tờm kwơmàng jăt nùs nhơm sồr lơh bơh Dà lơgar dê mờ kâp ủy ƀòn lơgar dê. Lam bồ mpồl sền swì sồr càr Gia Lai jàu anih lơh broă geh gơnoar in, pơgồp bal niam mờ Mpồl; lơh sir jơnau yal song dơ pă, loh làng, đơs loh kal ke, gơkòl mờ dan broă lơh bơsong loh làng.

Lơh broă mờ Mpồl Lơh kơnòl broă sùm Tỉñ ủy càr Dăk Lăk, ồng Nguyễn Thanh Nghị, Kwang bàng Ƀộ Cíñ trị, Ƀí thư Đảng Dà lơgar, Lam bồ Mpồl Gùng dà broă lơh mờ Broă rơndăp lơh kwơmàng Dà lơgar dê, Lam bồ Mpồl pà gĭt, sền swì, jăt sền là broă lơh sùm nàng kờñ đơs di, mùl màl broă gơlik geh, đal gŏ bơta niam, broă lơh niam, bơceh lơh nàng pơn jăt tai lơh niam; ai gĭt ală bơta ờ hềt dipal, gam geh nàng di tŭ geh broă lơh bơsong, mơkung cih dờp ală kal ke, gơkòl tàm ală tŭ lam lơh jăt ală jơnau lơh nền, gùng dà bơh Đảng dê.

 “Añ sồr ală oh mi mhar sồr lơh nàng cih ală jơnau yal sền swì jăt sền jăt tơngume broă rơndăp lơh mơkung bal mờ hơ̆ là pà ală sră nggal mờ sồr ală mpồl cau nă să geh gơrềng nàng pơgồp bal niam mờ mpồl. Gơ wèt mờ jơnau yal pal đơs wil tơl, song dơ pă, ngan ngồn, geh khà sồ pơnyơu, ờ bal bal, mơkung gĭt nền loh bơta niam, bơta ờ hềt dipal, jơnau bơh tài gơbàn, kung bè là dan ală broă rơndăp lơh bơsong. Geh bơta lơi gơkòl ală oh mi kung yal mơ tơn ai mpồl in nàng mpồl tơrgùm wơl yal mờ Ƀộ Cíñ trị in nàng sền swì”.

Mpồl sền swì bàr pe tơngume tờm bè: broă bơyai lơh mờ lơh broă bơh ală anih lơh broă, mpồl lơh broă dê tàm ƀòn lơgar tơnơ̆ lam lơh broă gơnoar ătbồ ƀòn lơgar 2 kâp; ală kơnòl broă, broă rơndăp lơh bơsong nàng kờñ lơh jăt jơnau kờñ gơguh tai kờp jơh phan bơna lơh geh kờp bal tàm tơngai bơh nam 2026- 2030 bơh 10% rlau hơđăng jăt Jơnau lơh nền tàm pơrjum bơh Pơrjum dờng XIV Đảng dê; broă đơng lam, sồr lơh, lam lơh jăt Jơnau lơh nền tàm pơrjum bơh Pơrjum dờng XIV Đảng dê; broă đơng lam, sồr lơh, lam lơh jăt Jơnau lơh nền tàm pơrjum sồ 57 bơh Ƀộ Cíñ trị dê bè tam gơl pràn bơtàu tơngguh jak chài, măy mŏk, tam gơl pa bơceh lơh, tam gơl sồ dà lơgar.

Bơh sền swì, jăt sền, ală mpồl lơh broă Ƀộ Cíñ trị, Mpồl đơng lam Đảng Dà lơgar dê nàng kờñ đơs ngan ngồn broă lam lơh jăt ală Jơnau lơh nền tàm pơrjum, jơnau sồr lơh Dà lơgar dê tàm càr tàm kơnhoàl ù tiah Tây Nguyên mờ đah jum tàm gùl lơgar; di tŭ sền gŏ ală broă lơh geh cồng nha nàng rề ơnàng lơh uă, mơkung tă bơsong kal ke, gơkòl, nàng ală jơnau lơh nền dờng bơh Đảng dê geh lơh jăt ndrờm bal, kràñ cê jơh nùs, pơgồp bơnah lơh pràn bơtàu tơngguh lơh sa - mpồl bơtiàn mờ lơh sir ală jơnau kờñ gơguh tai jăt Jơnau lơh nền tàm pơrjum bơh Pơrjum dờng XIV Đảng dê.