Tàm dơ̆ pơrjum, ală cau ala măt tơrgùm sền swì, đơs broă lơh jăt kơnòl broă bơtàu tơngguh lơh sa – mpồl bơtiàn, sền gàr dà lơgar – lơngăp lơngai nam 2025 mờ cribơyai, lơh nền gùng dà broă lơh, jơnau kờñ, kơnòl broă nam 2026. Jăt jơnau yal bơh Anih duh broă Làng bol càr dê, tàm nam 2025, bulah tìp uă kal ke, ngan là gơrềng bơh mìu càl rbŭt dờng sồ 13 mờ ală dơ̆ mìu dà tih dà lìu dờng lơh gơbàn aniai hoàc hươr digơlan rlau 12 rbô tơmàn đong, lơh sa – mpồl bơtiàn càr dê kung gam gàr geh bơta kơ̆ kơl jăp đau.

Càr geh 12 tàm 16 broă jàu lơh sa – mpồl bơtiàn geh mờ sơrlèt broă rơndăp lơh; priă lơh geh kờp bal dùl nă cau kờp dŭ geh rlau 80 tơlak đong; kờp jơh rề dia dà lơgar geh 16 rbô 500 tơmàn đong; priă geh bơh tăc mờ lơgar ndai geh 2 tơmàn 800 tơlak dolar Mỹ, gơguh 26% pơndrờm mờ nam 2024. Ală broă niam chài – mpồl bơtiàn pơn jăt tai geh sền gròi, sền gàr lơngăp lơngai rài kis mpồl bơtiàn geh gàr niam, khà hìu rơƀah gơmù bơh 3% rlau hơđăng, is hìu rƀah tàm làng bol jơi bơtiàn dồ êt nă cau gơmù rlau 4%. Sền gàr dà lơgar – lơngăp lơngai geh gàr kơ̆.