Jăt jơnau yal, càr Dăk Lăk neh lơh sir broă lơh pơrjum cribơyai ring bal dơ̆ dùl, ring bal yal tơnggĭt 28 nă cau tơlik măt tĕ khà Cau ala măt Quôk hội khoă XVI tàm ƀòn lơgar in nàng pồ rwah 15 nă cau ala măt; yal tơnggĭt 148 nă cau tơlik măt tĕ khà cau ala măt Mpồl duh broă Làng bol càr nàng pồ rwah 84 nă cau ala măt, yal tơnggĭt 4 rbô 300 nă cau nàng pồ 2 rbô 445 nă cau ala măt Mpồl duh broă Làng bol kâp sàh. Tơnơ̆ pơrjum cribơyai ring bal, càr pơn jăt tai lơh broă tam gơl rơndăp tăp sèng, bơnah mờ khà cau geh yal tơnggĭt tơlik măt tĕ khà jăt jơnau ai, pal gàr bơta ala măt, làng bol lơh tờm mờ gơnoar săc rwah làm uă bơh cau tĕ khà dê.

Nàng gàr niam lơngăp lơngai cíñ trị, rơndăp tăp sèng niam lơngăp lơngai jơh gùt mpồl bơtiàn, ală mpồl neh geh broă rơndăp lơh mờ broă rơndăp lơh loh làng, pơgồp bal niam; broă dờp sră nggal tơlik măt tĕ khà mờ ală broă lơh geh gơrềng bal, geh lơh niam lơngăp lơngai, di jơnau sồr. Mpồl jăt sền cih dờp, jờng rơ ngan bơta rơcăng rơcăng lài, kơnòl bơh Anih duh broă Tĕ khà càr Dăk Lăk dê; sồr càr pơn jăt tai tơngguh tai broă lơh sền gàr cíñ trị dơlam is, lơh sir ală broă rơndăp lơh sền gàr niam lơngăp lơngai rơndăp tăp sèng tàm ală anih đùh sră; lơh pràn mblàng yal nàng cau tĕ khà in gĭt loh jơnau yal bè ală cau tơlik măt tĕ khà, lơh jăt gơnoar săc rwah ngăc ngar tŭ đùh sră.