Mho ngai 12/01, Mpồl lơh broă Cíñ phủ dê bơh Phó Thủ tướng ồng Hồ Quốc Dũng lơh Lam bồ mpồl neh tus còp làng bol tiah dà tih dà lìu tàm sàh Hoà Thịnh mờ lơh broă mờ Anih duh broă Làng bol càr Dăk Lăk nàng sền swì, pơjal lam lơh “Broă lơh Quang Trung” lơh pa mờ lơh niam wơl hìu ơm ai ală hìu làng bol gơtìp hoàc hươr tơnơ̆ mìu dà tih dà lìu. Phó Thủ tướng tus còp rơ wàng, pơndờm pơnđiang bàr pe hìu bơnhă kong gơrềng kơn jơ̆ tàm dơ̆ dà tih dà lìu lồi sơnam 2025 pa do, nting bơr chờ gờm làng bol geh hìu pa tơl bơta ơm kis, gờñ bè ờs wơl rài kis.

Jăt yal, tus ngai 12/01, Dăk Lăk neh lơh niam wơl sir jơh 892 nơm hìu ờdiơng kơn jơ̆ ngan; tàm 606 nơm hìu pa lơh pa, neh lơh gơs 529 nơm, geh rlau 87%, khà gam wơl geh tơngguh pràn lơh. Phó Thủ tướng ồng Hồ Quốc Dũng sồr càr Dăk Lăk tơrgùm uă ngan rlau jơh priă jền, lơh sir 77 nơm hìu gam wơl di tơngai, mơkung lơh mhar lơh wơl phan bơna gùng lòt, lơh broă sa, kơ̆ kơl jăp broă lơh broă sa ai làng bol tiah dà tih dà lìu.