Kòn cau M’nông ơm tàm sàh Quảng Trực, càr Lâm Đồng pơn yờ să ƀòn lơgar là tiah pôs đồng kăc màng. Sền gròi tus tiah nhàr lơgar do, ală nam pa do, Broă lơh jơnau kờñ dà lơgar bè tơrmù rƀah kơnhăp kơ̆ neh bơcri lơh sir ală gùng lòt tê, bơtơ̆t rơbòng dà; broă lơh tơn jơh bal hìu ơm ing, hìu ồm sèt ñhăt dà mìu, dong làng iang nùs lơh broă sa. Mò Thị Brao, cau geh bơngă pin dờn ơm tàm ƀòn Bu Prăng 1, sàh Quảng Trực pà gĭt, làng bol kòn cau M’nông sùm lơh jat niam bơhiàn kăc màng, tam klăc bal bơt bơtàu ƀòn lơgar ngai sơlơ pas niam:“Di dơ̆ nam pa tus, añ kơ̆p kờñ làng bol sùm pràn kơl dang, tam klăc bal, kờñ gơboh, jơm glòm bal mờ gơ̆p, ờ gŏ di ờ rờm bal halà tàm cah is ờ, bal mờ gơ̆p lơh ngan bơtàu tơnguh lơh sa mờ sền gàr bơhiàn niam chài is ƀòn lơgar dê. Ƀòn Bu Prăng 1 bol añ là tiah pôs đồng kăc màng, bơh gĭt nđờ rài do kung gam sền gàr mờ lơh jat niam ală bơta kwơ bơh yau niam chài niam bơnĕ dê. Rài kis làng bol ngai sơlơ kơ̆ kơl jăp, làng bol sùm sền gròi, hòi jà oh kòn sền gròi broă bơsram sră, lùp bơsram jak chài măi mok, ngui tàm broă lơh sa nàng tơnguh uă cồng nha tờm kao su, kơphê. Bơh hơ̆, pơgồp bơnah bơt bơtàu rài kis ngai sơlơ hờm ram, gơboh gơbài”.

 Làng bol kòn cau Bahnar ơm tàm sàh Ia Băng càr Gia lai, wă rò sơnam pa nam Ơseh mờ bơta chờ hờp bơh bơta tam gơl tơl làm. Bơh tiah mìng gĭt lơh kòi, tŭ do làng bol neh lùp bơsram, ngui ală bơta gơguh jak chài măi mok tàm ròng phan, tam phan jŏ nam... geh priă lơh geh uă. Gùng che ồs đèng, gùng lòt, hìu bơsram, hìu sơnơm geh bơcri priă lơh bơt bơtàu dờng niam, sàng goh niam, uă hìu bơnhă neh blơi geh rơndeh ô tô, măi mok drơng broă lơh sa mờ ală phan ngui ƀuơn ngan tàm rài kis... Rài kis bơtàu tơnguh, bơta pin dờn tàm Đảng, Dà lơgar sơlơ kơnhăp kơ̆. Sền gŏ bơta tam gơl do, ồng Đư̆nh, làng bol ƀòn Biă Tih, sàh Iă Băng, pà gĭt:“Tŭ do, kơnờm tam kơphê, giă kơphê  gơguh uă, uă ngan làng bol tàm ală ƀòn lơgar, cau den blơi rơndeh ôtô, cau den blơi rơndeh kông nông, mìng is rơndeh măi den jơh ală hìu bơnhă ndrờm geh lơm, hìu geh nđờ nă cau den geh nđờ nơm rơndeh tơn. Rài kis tŭ do lơngăp lơngai ngan, bơta do là kơnờm lùp bơsram bơh cau Yoan dê den tàng rài kis wil tơl bè tŭ do”.

Tàm sàh Ngọk Tụ (càr Quảng Ngãi), bi A Xương, kòn cau Sơdàng, là đảng viên kơnòm să, Lam bồ Mpồl lơh broă Mặt trận mơkung là Lam bồ Mpồl Lơngăp lơngai thôn Đăk Pung. Bi pà gĭt, thôn, ƀòn bơtàu tơnguh kơnhăp kơ̆ kơnờm hời rơ hời tam gơl bồ tơngoh kơlôi sơnơngm mờ broă lơh; lơh jat niam gùng dà broă lơh bơh Đảng, adat boh lam bơh Dà lơgar dê; tam klăc bal, dong kờl bal tàm rài kis. Bi A Xương, pà gĭt:“Tŭ do, làng bol tàm ù tiah do kung neh geh gĭt mờ uă jơnau yal pa, tam gơl sồ... Tŭ geh gùng dà broă lơh bơh Dà lơgar dê bol añ yal tơngĭt, mblàng yal làng bol bơsram, gĭt wă bè măi mok sồ, broă pơnđàng, ai ală jơnau bè làng bol ơm kis, bơto pơlam làng bol in gĭt wă mờ ngui măi mok, ai app VNeID, bơto pơlam làng bol in ƀuơn ngan tàm broă gĭt mờ ală broă lơh dong kờl bơh Dà lơgar dê bè jơnau yal tơngĭt, ală sră pơ àr să tờm, hìu bơnhă dê... Añ kung chờ hờp ngan tŭ do ală hìu bơnhă tàm thôn ƀòn neh gĭt “tam gơl bồ tơngoh kơlôi sơnơng mờ broă lơh”, khin cha tam gơl phan tam ờ geh cồng nha tơnhào tàm bă ù mìr nàng tam tờm chi jŏ nam geh priă lơh geh uă rlau, bè kao su, kơphê mờ bàr pe phan tam ndai. Làng bol dùl nùs bal, tơrgùm lơh sa, brồ guh lơh pas”.

Chờ hờp mờ rài kis ngai sơlơ tam gơl, mò Nay H’Thu, Phó Ƀí thư Ci ƀộ ƀòn Tong Sê, sàh Ia Pa, càr Gia Lai, chờ hờp pà gĭt, đảng viên kờñ pal lam lài lơh krơh niam tàm ală broă lơh nàng ƀòn lơgar in sơlơ hờm ram: “Nam yau neh jơh, sơnam pa tus, bơta kơ̆p kờñ bơh añ dê là hìu bơnhă sùm pràn kơl dang, lơngăp lơgai. Añ kơ̆p kờñ ală sau gơ lòng sồr, tơryang tơryồng bơsram sră nàng tơnơ̆ do gơ gơs ală cau geh kwơ ai mpồl bơtiàn in. Să tờm añ kung sùm tơngkah is să tờm pal kis jơh nùs, wèt tus đah đăp, lơh krơh ai làng bol tàm ƀòn in lơh jat bal, bal mờ gơ̆p bơtàu tơnguh lơh sa, bơt bơtàu rài kis niam bơnĕ rlau”.

Yal jơnau sa tềp, ồng Y Tloi Niê, Lam bồ ƀòn Čư̆ Păm, sàh Dăng Kang, càr Dăk Lăk pà gĭt, nam pa do làng bol tàm ƀòn tìp uă ngan kal ke tài bơh trồ tiah lơh aniai. Geh bơta sền gròi dong kờl bơh Dà lơgar dê làng bol neh bè ờs wơl rài kis wă rò sơnam pa. Ồng kơ̆p kờñ nam pa rài kis làng bol tàm ală tiah gơtìp trồ tiah lơh aniai rơ̆p iang nùs chờ hờp rlau:“Añ pin dờn tàm nam pa, Dà lơgar pơn jat tai sền gròi, dong kờl nàng làng bol in wèt tus bơta hờm ram. Bơdìh hơ̆, añ kung kơ̆p kờñ geh tai ală broă lơh dong kờl ai ală cau chài dròng cing mồng in, dong khi in geh tai bơta gơn kơnờm  sền gàr mờ ngui niam bơhiàn niam chài is jơi bơtiàn dê”.

Nam 2025, Đoàn Ơruh pơnu sàh Hòa Ninh, càr Lâm Đồng neh lam lơh uă broă lơh geh kwơ ngan ngồn tàm rài kis. Đoàn sàh pơgồp bal mờ Hìu bơsram Đại họk Dà Làc lơh 2 broă lơh bơt bơtàu “Sòl àng ƀòn lơgar” tàm thôn 5a mờ 10a; mơkung, jàu pà gĭt nđờ rơhiang bơnah phan pà geh bal sră măi, sră cih, phan ngui bơsram sră ai kơnòm bơsram rƀah sơrlèt gan kal ke in; Bơyai lơh mblàng yal bè rcang lài kơryan ma túy, lơh pờng tàm hìu bơsram gơwèt mờ ơruh pơnu kơnòm pa tàu mờ kơnòm dềt. Đoàn Ơruh pơnu sàh tus bal atbồ geh cồng nha priă càn dờp gơnoar bơh Anih priă jền Cíñ sác Xàh hội mờ dồs jơng kah mờr 30 tơmàn đong dong gĭt nđờ rơhiang nă ơruh pơpnu geh tiah kơnờm kơnhăp kơ̆ nàng bơtàu tơnguh lơh sa, kă bro. Bi Ka Sôi – Ƀí thư Đoàn Ơruh pơnu sàh Hoà Ninh, càr Lâm Đồng pà gĭt:“Nàng tam gơl rài kis làng bol tiah kơh bơnơm in, añ kơ̆p kờñ Dà lơgar pơn jat tai geh ală broă lơh dong kờl sơlơ tơnguh tai niam chài mờ bơto bơtê kwang bàng là làng bol jơi bơtiàn dồ ết nă cau tàm ală tiah dê. Mờ mpồl ơruh pơnu, añ sùm tơngkah ală bơyô cih kah sùm jơnau bơto sồr bơh Wa Hồ dê bơto bè bơta pràn bơh mpồl tam klăc dờng. Tơl nă ơruh pơnu pal là dùl krơh niam tơryang tơryồng lơh sa, tă pơgồp dà kơl hề bơta pràn dềt rơ hền nàng bơt bơtàu ƀòn lơgar. Mìng geh tam klăc ring bal dùl nùs, bol he hơ̆ sồng sền gàr geh bơhiàn niam chài mờ lam ƀòn lơgar lòt guh”.

 Tơmŭt bal bơh ală sàh Gia Bắc, Sơn Điền (lài do), sàh Sơn Điền pa gơwèt tiah kal ke uă ngan bơh càr Lâm Đồng dê, mờ uă jơi bơtiàn dồ ết nă cau. Tàm tiah sar lơgar ngài, ơruh pơnu tàm sàh gam ngui niam bơta pràn rơnàng kơnòm să nàng bơt bơtàu ƀòn lơgar. Bi Ka Hành- Ƀí thư Đoàn Ơruh pơnu sàh Sơn Điền, pà gĭt, kah jơnau nting tơngkah bơh Wa Hồ dê “Dùl nam sơnđờm bơh sơnam pa, dùl rài sơnđờm bơh rơnàng kơnòm să. Rơnàng kơnòm să là sơnam bơh mpồl bơtiàn dê”... mpồl ơruh pơnu lam lài tàm ală srơh tàm pơrlòng: “Tàm nam pa 2026, añ kơ̆p kờñ lơh geh uă bơta pa. Hơ̆ là hòi jà geh ală bơta pràn nàng dong kờl ai ală kơnòm bơsram gam kal ke, bơyai lơh ală broă lơh niam chài, tàp pràn să jan, kung bè kờp dŭ tơnggơs mpồl dròng cing jañ mồng ai ală kơnòm dềt tàm tiah do in. Ală broă ndai bol añ kờp dŭ dờp lơh uă broă lơh bơt bơtàu ơruh pơnu: gùng ƀồng bi “àng- tơlir- sàng goh- niam”, tam bơkào tàm Rùp kah ưn ngài ală Cau ling khin cha jak chài cau ling chơ̆t màng sàh Sơn Điền; bơyai lơh rcang lài kơryan bŭ dà ai ală kơnòm dềt in... Añ kơ̆p kờñ ơruh pơnu, kơnòm pa tàu mờ kơnòm dềt bol he pơnđơl pràn lơh ngan bơsram sră tus gùng tus dà nàng gĭt uă tai ală jơnau, gĭt broă lơh sa, bơtàu tơnguh ai hìu bơnhă mờ ƀòn lơgar he dê in...”.

Bi H’Vinh, ơruh pơnu sàh Đức An, càr Lâm Đồng là dùl tàm ală cau krơh niam kơnòm să pơn rơ ngan, jơh nùs tus bal ală srơh tàm pơrlòng tàm tiah do dê. Lơh jat nùs nhơm lam lài bơh rơnàng kơnòm să dê tàm lơh jat Jơnau lơh nền tàm pơrjum bơh Pơrjum dờng Đảng ală kấp, bi H’Vinh bal mờ uă đoàn viên, ơruh pơnu tàm ƀòn lơgar lòt lài tàm lơh broă, lơh sa, bơt bơtàu rài kis niam chài, pơgồp bơnah bơt bơtàu ƀòn lơgar ngai sơlơ tam gơl pa, bơtàu tơnguh kơnhăp kơ̆. Bi H’ Vinh pà gĭt:“Nam 2025 là dùl nam geh cồng nha ngan bơh dà lơgar he dê, lơh tềl cồng nha bơh Pơrjum dờng Đảng. Bơh ală gùng dà pơlam di pal ngan bơh Pơrjum dờng dê bal mờ bơta đơng lam, sồr lơh nền nòn bơh Đảng ủy kấp sàh, tiah do neh sền gròi tơl làm tus bơtàu tơnguh lơh sa, niam chài, rài kis làng bol, bơh hơ̆ lơh geh ală bơta tam gơl niam ngan, bơtàu tơnguh loh làng tàm rài kis làng bol dê. Là ơruh pơnu, să tờm añ rơ̆p sùm lơh ngan bơsram, bơsram tàp, jơh nùs tus bal broă lơh Đoàn tàm tiah do dê, lơh jat niam nùs nhơm lam lài bơh rơnàng kơnòm să dê, pơgồp bơnah dềt rơ hền bơh he dê tàm bơta bơtàu tơnguh bơh ƀòn lơgar”.