Tàm pòt dà lềng Xuân Đài, uă rơkì măi tàm pơn jat tai lòt tus ală hìu gŭ tàm gùt pòt, cèng phan sa ai ka ti dờng in. Bi Đỗ Xuân Thạnh, Jơnum làng bol tiah drà Phú Mỹ, sơnah ƀòn Sông Cầu, là dùl tàm ală cau măi lòt tus tàm do bơh gờñ ngan. Bi Thạnh pà gĭt, tơnơ̆ dơ̆ trồ tiah lơh aniai tàm lồi nam lài, hìu bơnhă bi geh càn 1 tơmàn đong nàng bơcri priă lơh kơ̆ wơl hìu gŭ, tơngklàs ròng 13 rơbô nơm ka ti dờng sơntìl pa. Rlau 7 nhai ròng, mpồl ka ti dờng neh lơh geh bơta dờng di tơnhào tăc, năc kung neh dan blơi rau. Bi Thạnh brơn brài đơs: “Kờp bal ka ti dờng tŭ do geh pơgăp 2 lạng dùl kon, tăc geh rlau 200 rơbô đông dùl nơm, ndrờm mờ rlau 800 rơbô đông tus 900 rơbô đông dùl kĭ. Kờp jơh priă lơh geh mpồl do dê pơgăp rlau 2 tơmàn đong. Añ kờp dŭ tơm priă anih priă jền in lài dùl bơnah, priă gam wơl rơndăp tăp sèng wơl bơcri priă lơh mờ ròng uă rlau tai 2 dơ̆ khà ka ti dờng pơndrờm mờ kàl tơnhào do dê. Dilah ròng niam den pơgăp 2 nam tai rơ̆p bơtàu tơnguh wơl bè lài mờ dơ̆ dà tih dà lìu”.

Kung ơm bal tàm Jơnum làng bol tiah drà Phú Mỹ, sơnah ƀòn Sông Cầu, bi Đỗ Ngọc Quang neh hời rơ hời bơtàu tơnguh wơl broă ròng ka ti dờng tàm pòt dà lềng Xuân Đài. Dơ̆ trồ tiah lơh aniai tàm lồi nam lài lơh hìu bơnhă bi hoàc huơr rlau 2 tơmàn 500 tơlak đong, tàm tŭ kung gam bơnah priă càn anih priă jền dê. Kơnờm broă lơh dong kờl, bi geh lời wơl dồs, tơrmù ƀà priă cồng mờ càn tai 800 tơlak đong nàng bơcri priă ròng wơl. Tàm 2 mpồl ròng wơl tơnơ̆ hơ̆, 1 mpồl gam dờng pràn niam, mpồl ne neh tus tơngai ai tơnhào. "Añ lòt tơn dùh hìu gŭ ròng dùl mpồl tàm nhai 4 pơgăp 7 rơbô nơm; mpồl pơn jat tai ròng tàm nhai 5 mờ nhai 8, kờp jơh pơgăp 10 rơbô nơm ka ti dờng tai. Tŭ do tăc mpồl bơh sơn rờp rau mờ tăc mpồl pơn jat tai, geh sùm bè hơ̆ lơm”.

Trồ tiah lơh aniai tàm lồi nam 2025 lơh hoàc huơr kơn jơ̆ ai tiah tờm ròng ka ti dờng tàm pòt dà lềngXuân Đài, mờ pơgăp 1 rơbô 500 hìu bơnhă tàm sơnah ƀòn Sông Cầu mờ Xuân Đài gơtìp gơrềng, mờr 100 rơbô hìu gŭ ròng gơtìp hoàc huơr, kờp jơh priă hoàc huơr pơgăp 1 rơbô 900 tơmàn đong, tàm hơ̆ sơnah ƀòn Sông Cầu geh tus 2 bơnah 3. Ồng Huỳnh Đình Quang, Phó Chủ tịch Anih duh broă Làng bol sơnah ƀòn Sông Cầu pà gĭt, tiah do neh lơh broă mờ ală mpồl ai càn priă nàng dong kờl tơrmù priă cồng, lời ing dồs, ai tai priă càn dong kờl cau ròng in ròng wơl phan. Kơnờm bơh hơ̆, tiah ròng ka ti dờng neh bơtàu tơnguh wơl 80%. Tơngai tus, sơnah ƀòn pơlam gùng dà làng bol in tam gơl gùng dà broă lơh ròng, rcang lài ngui jak chài măi mok nàng rcang gàr lài bơta aniai, tơnguh bơta pràn drơng jai mờ trồ tiah lơh aniai, kòp aniai, wèt tus bơtàu tơnguh wơl mờ bơtàu tơnguh kơnhăp kơ̆.  “Sơnah ƀòn pơn jờng làng bol ròng di bă tiah, khà ròng mờ tiah rơndăp ù tiah; mơkung tơrgùm ngui jak chài măi mok, tam gơl bơh hìu gŭ dơm chi ờs mờng tus hìu gŭ lơh mờ phan HDPE kơ̆ mờ jŏ rlau, tơrmù ƀà hoàc huơr tŭ mìu càl rơbŭt dờng gơlik geh. Tŭ kàl mìu càl rơbŭt dờng tus, làng bol gơ jal ngan tơnhào tăc, lơh kơ̆ wơl hìu gŭ ròng phan. Gơwèt mờ ka ti ờ bơtoah gơlik geh kòp aniai, kờñ di tŭ yal mơ nàng gơnoar atbồ sơnah ƀòn mờ gah broă lơh sa suơn sre in tus dong kờl làng bol”.

 Ròng tam phan tàm dà là gah lơh sa geh bơta pràn tàm tiah đah mat tơngai lik càr Dăk Lăk dê mơya sùm gơtìp hoàc huơr tàm tơl kàl mìu càl rơbŭ dờng dà tih dà lìu, pal crăp rcang priă jền dờng nàng bơsong wơl hoàc huơr, rơndăp tăp sèng wơl bơcri priă lơh sa. Mìng is mờ ală cau càn priă ròng phan tàm dà bơh Agribank sơnĕ Phú Yên dê, dơ̆ trồ tiah lơh aniai lồi nam lài neh lơh khi in gơtìp dồs lơyài tơm priă tus 6 rơbô tơmàn đong. Lòt bal mờ cau càn priă bơsong kal ke, anih priă jền neh lời ing dồs, tơrmù ƀà priă cồng mơkung ai tai priă càn. Mìng is tiah ròng ka ti dờng tàm pòt dà lềng Xuân Đài, rlau 300 nă cau geh tơrmù ƀà priă cồng, mơkung geh ai càn pa tai rlau 240 tơmàn đong. Ồng Phan Thông Thái, Kwang lam bồ Agribank sơnĕ Phú Yên, pà gĭt: “Bol añ hơ pơr gon sùm gàr niam tơl priă càn kung bè tơngai càn priă bơcri priă lơh sa nàng dong kờl ală hìu bơnhă ròng ka ti dờng kung bè lơh gơlik phan in càn priă bơcri priă lơh sa. Broă ngui priă càn bơh làng bol dê kung geh bol añ jat sền nền nòn, nàng làng bol in bơcri priă di ngan, geh cồng nha ngan rlau jơh. Mờ khà do, gah ròng ka ti dờng rơp bơtàu tơnguh wơl mờ bơta bè ờs bơh nam do tus jơh nam tơnơ̆”.

Kàl ròng ka ti dờng sơn rờp tơnơ̆ dơ̆ trồ tiah lơh aniai gam pà gŏ ală tềl tơngŏ niam ngan gơwèt mờ cau ròng ka ti dờng tàm pòt dà lềng Xuân Đài. Bơh broă ngui niam ngan priă ai càn bơtàu tơnguh wơl lơh sa tus pơlam gùng dà bơh tiah do mờ bơta lơh ngan bơh cau ròng dê, jơh ală geh lơh ngan ngồn mờ ală hìu gŭ ròng ka ti crăp rcang tơnhào tăc, ờ mìng pà gŏ broă ròng ka ti dờng gam bơtàu tơnguh wơl lơm mờ gam pờ geh gùng lòt kơ̆ kơl jăp ai gah ròng phan krơi is do dê.