Kờp jơh khà năc kờp dŭ geh 5 tơlak 200 rbô nă, gơguh dùl dơ̆ mờ nggùl pơndrờm bal dùl tŭ mờ nam lài. Tàm hơ̆, năc ală lơgar mờr 100 rbô nă, gơguh tus 3 dơ̆. Kờp jơh priă geh bơh lòt nhơl kờp dŭ geh 3 rbô 700 tơmàn đong, gơguh 2,5 dơ̆ pơndrờm mờ nam 2024. Uă anih tus tàm ù tiah càr dê pơn jăt tai gơhòi gơ jà gal năc lòt nhơl. Pơnrơ là Tiah lòt nhơl ƀòn brê bơnơm Măng Đen, ală ƀòn lòt nhơl mpồl bơtiàn tiah đah măt tơngai Mŭt mờ ală anih lòt nhơl dà lềng, bồt bơlào đah măt tơngai Lik geh: Lý Sơn, Sa Huỳnh, Mỹ Khê.

Bơta gơguh pràn kơldang bơh lòt nhơl Quảng Ngãi dê tus bơh broă pờ ơnàng ù tiah tơnơ̆ rơndăp tăp sèng, dong tàm tơrbŏ geh cồng nha rlau đah tiah dà lềng bồt đah măt tơngai Lik mờ kơnhoà ù tiah ƀòn brê bơnơm, mpồl bơtiàn đah măt tơngai Mŭt, gơgơs ală gơl gùng, anih lòt nhơl li lă, tàm bơtơl bal gơ̆p in. Is ồn, cau làng bol neh să tờm tơn tus bal tăc drơng broă sa priă, sền gàr phan sa, lơh yàng lơh chờ mờ broă lơh ờs mờng bơh yau, pơgồp bơnah prăp gàr niam chài, tơngguh uă priă lơh geh, bơtàu tơngguh rài kis.