Khà priă rài lơh sa lơgar he gơguh pràn, gơguh 510 tơmàn dolar Mỹ. Priă lơh geh kờp bal dùl nă cau nam 2025 geh pơgăp 5 rbô dolar Mỹ, gơguh tus dùl dơ̆ mờ nggùl pơndrờm mờ nam 2020, mŭt tàm mpồl ală lơgar priă lơh geh di mơ uă. Ală cồng nha tơl làm hơ̆ pơgồp bơnah lơh gơlik geh bơnàng jă kơ̆ kơnhăp lam dà lơgar he mŭt tàm rài pa, nàng lơh jăt jơnau kờñ gơguh 2 nơm khà tàm tơngai bơh nam 2026- 2030 mờ gơgơs lơgar bơtàu tơngguh geh priă lơh geh uă tàm nam 2045.

Ring bal mờ jơnau đơs nền bè broă lơh sa dờng mờ cồng nha lơh jăt jơnau kờñ Broă rơndăp lơh cih tàm Jơnau rơcăng cih Sră nggal, Phó Pơgru dờng – Tiến sìh Trần Hoàng Ngân, cau ala măt Quôk hội khoă XV, đơs là: sơñio khà dồs dà lơgar lơgar he dê nam 2025 mìng gam 36% (pơndrờm mờ khà yal tơngkah lài là 60%), là tềl sơñio niam, tơnggŏ pràn jak ătbồ cồng nha, dong lơh geh wơl bơta pin dờn bơh cau bơcri priă mờ ală mpồl ală lơgar dê tàm rài priă jền lơgar Việt Nam. Mờ ală tàm pơnring dờng tàm rề - tă kes priă, là jơnau kwơmàng ngan nàng tàm pơnring bơta pràn ai bơcri priă bơtàu tơngguh in. Ồng Trần Hoàng Ngân, mblàng sền: “Mờ broă rơndăp lơh bơcri priă bơtàu tơngguh mìng 2,8 tơlak tơmàn đong den lồi tơngai lơh kơnòl broă do bol he neh lơh geh 3,4 tơlak tơmàn đong ai bơcri priă rơndăp tăp sèng phan bơna lơh sa – mpồl bơtiàn. Do là bơta añ đơs là cồng nha ngan. Kơnờm bè hơ̆, bol he neh bơcri priă geh gùng rơndeh lòt mhar, gùng kềng dà lềng, ală anih ơhò dà lềng ơm, ƀlàng rơndeh par, gùng kềng 4 Hà Nội, gùng kềng 3 ƀòn dờng Hồ Chí Minh mờ uă broă bơ̆t bơtàu, lơh sơnơm neh geh bơcri priă lơh”.

Bè gơguh GDP, dilah ờ kờp nam 2021, là nam gơrềng tài kòp bơtờp Kovid- 19, den gơguh lơh sa lơgar he dê geh 7,2% tàm 4 nam sùm. Nam 2025, priă geh bơh tăc mờ blơi phan mờ lơgar ndai bơh Việt Nam dê yal lài sơrlèt khà 900 tơmàn dolar Mỹ. Do là dùl khà priă uă ngan pa. Bơh dùl rài lơh sa rƀah lơ ời ngan, tus tŭ do lơgar he neh gơgơs dùl rài lơh sa ơm tàm Mpồl 20 dà lơgar geh priă kă bro phan dờng tàm dunia.

Mờ nùs nhơm sùm sùm là bơtàu tơngguh mhar mờ kơnhăp jŏ, ală cồng nha lơh geh bè bơtàu tơngguh lơh sa lơgar he dê neh geh yal wơl bơh bơta bơtàu tơngguh bè đah mpồl bơtiàn mờ gơguh jak bè kòn bơnus. Sơñio khà bơtàu tơngguh kòn bơnus Việt Nam dê geh gơguh loh làng ngan, gơguh 37 khà, gơguh tus anih dơ̆ 46 tàm ƀàng săp sèng sơñio khà gơboh gơbài gùt plai ù nam 2025, jơnhoa rlau uă pơndrờm mờ ală lơgar geh bal priă lơh geh. Tiến sìh Lơh sa ồng Lê Duy Bình, sền đơs: "Broă lơh tơrlòng lài gơguh bol he dê ờ mìng ƀươn soh là gơguh bè đah lơh sa lơm mờ là gơ jăt bal mờ hơ̆ là bơta bơtàu tơngguh bè kòn bơnus, ai kòn bơnus lơh anih tờm, ai tiah ơm kis lơh anih tờm, ai rơnàng tơnơ̆ do lơh jơnau kờñ nàng pơnđơl nàng bol he geh dùl broă lơh tơrlòng lài gơguh kơnhăp jŏ, lời wơl dùl tiah ơm kis niam ai oh kòn kòn sau bol he dê in tơnơ̆ do”.

Bal mờ ală broă lơh sa ndai, broă lơh jak chài măy mŏk, tam gơl pa bơceh lơh mờ tam gơl sồ lơgar he dê kun g geh ală broă gơguh mhar ngan. Sơñio khà tam gơl pa bơceh lơh gùt plai ù nam 2025 lơgar Việt Nam dê săp ơm tàm khà 44 tàm 139 dà lơgar, kơnhoàl ù tiah dà lơgar. Phan bơna sồ bơtàu tơngguh pràn kơldăng, uă làm bă tiah; khà gơguh internet ntrờn làm bă tiah gơ wèt mpồl 20 dunia. Kă bro phan điện tử bơtàu tơngguh mhar, gơguh kờp bal 20% dùl nam. Bơh mùl màl lơh broă mpồl lơh sa kă bro dê, ồng Nguyễn Hữu Sơn, Củ tịc Tập đoàn ATS đơs: “Bol he sền gŏ bơta pơnđơl pràn, lơh ngan dờng ngan bơh Cíñ phủ dê, ai tơl bơta ai mpồl lơh sa kă bro in. Hơ̆ là bơta niam ngan. Lơh broă tàm broă măy mŏk priă jền, añ gŏ broă do Việt Nam gam geh uă bơta pràn mờ khà gơguh mhar ngan, gam gơmŭt bal tàm gùng lòt bal mờ gùng dà bơtàu tơngguh măy mŏk sồ, priă jền sồ”.

Kờñ ngan bè jơnau bơsram mờng chài geh đơs tàm Jơnau rơcăng cih Sră nggal: “Jơh ală gùng dà, broă lơh ai geh bơh jơnau kơ̆p kờñ ngan, bơta kwơ dipal ngan mờ gơboh gơbài Làng bol dê, pal loh làng, song dơ pă. Ai bơta niam nùs, pin dờn bơh làng bol, mpồl lơh sa kă bro dê lơh gai was sền swì kwang bàng mờ cồng nha broă lơh. Lơh gơlik nùs nhơm tă pơgồp dà kơlhề tài dà lơgar, lơh jăt nùs nhơm kơnờm tàm bơta pràn is, pơnđơl pràn is, khin kơlôi, khin lơh, khin tam gơl pa, bơceh lơh, kràñ cê jơh nùs lơh broă mờ kong kơnòl tài bơta kwơ bal”, mò Lưư Thị Thanh Mẫu, Phó Củ tịc Mpồl cau kă bro kơnòm să Việt Nam kơ̆p gơn ngan: “Bal mờ broă lơh broă bơh Cíñ phủ điện tử dê, pơgồp mờ lơh sồ mờ tơngguh uă pràn ak bơh kâp ƀòn lơgar dê den añ kơlôi là kâp ƀộ mờ Cíñ phủ rơ̆p lam lơh mhar geh Jơnau lơh nền tàm pơrjum 66 mờ Jơnau lơh nền tàm pơrjum 68 bơh Ƀộ Cíñ trị dê. Bè hơ̆, jơnau đah gùng dà broă lơh mờ lơh jăt tus mùl màl rơ̆p dong kờl rài lơh sa lơgar he dê bơtàu tơngguh bè Tổng Ƀí thư neh đơs sùm do là tơngai brô să bơh jơi bơtiàn dê. Bol he rơ̆p lòt bal mờ gơ̆p nàng bơceh mòn geh dùl rài lơh sa duh hồl, ai Việt Nam bơtàu tơngguh gơgơs rài lơh sa khà dùl dunia dê”.

Tàm ală tŭ bơtàu tơngguh lơh sa dà lơgar dê 05 nam do, kung gam sơl ală bơta ờ hềt dipal kờñ pal lơh bơsong, mờ jơnau bơsram mờng chài geh đơs loh tàm Jơnau rơcăng cih sră nggal Đảng dê. Bulah bè hơ̆, mờ ală cồng nha lơh geh dờng ngan tàm bơtàu tơngguh lơh sa mờ lơgar he neh lơh geh tàm 05 nam do, mờ nùs nhơm tam gơl pa, mờ bơta pràn tam klăc dờng mờ kơ̆p gơn ngan bơtàu tơngguh, jơi bơtiàn Việt Nam gam kơnhăp cơnđoà jơng lòt tus rài pa – rài bơtàu tơngguh pas sơm, gơboh gơbài, mŭt gơrờm bal mờ rơcăng lài is.