Mho ngai 11/02, tàm Hà Nội, Mpồl Củ tịc Anih duh broă Mặt trận Dà lơgar Việt Nam bơyai lơh Pơrjum cribơyai dơ̆ pe nàng kờñ cribơyai ring bal, lơh sră cih măt ală cau gơ wèt ală anih lơh broă, mpồl cau, mpồl lơh broă tàm Dà lơgar geh yal tơnggĭt tơlik măt tĕ khà cau ala măt Quôk hội khoă XVI jăt jơnau cih bơh Adăt Tĕ khà cau ala măt Quôk hội mờ Cau ala măt Mpồl duh broă Làng bol nam 2015 mờ bơto pơlam Mpồl duh broă Tĕ khà Dà lơgar dê. Tơnơ̆ tŭ cribơyai, ai jơnau đơs bè cồng nha pin dờn bơh cau tĕ khà dê tiah lơh broă mờ tiah ơm kis sùm, 100% cau ala măt tus bal Pơrjum neh ring bal lơh sră cih măt 217 nă cau gơ wèt ală anih lơh broă, mpồl cau, mpồl lơh broă tàm Dà lơgar tơl jơnau sồr tơlik măt tĕ khà cau ala măt Quôk hội khoă XVI jăt di jơnau cih bơh kơrnoăt boh lam dê.

Đơs tàm Pơrjum cribơyai, Củ tịc Anih duh broă Mặt trận Dà lơgar Việt Nam mò Bùi Thị Minh Hoài đơs nền, Pơrjum cribơyai dơ̆ pe neh lơh sir jơh ală tơngume, broă sồr lơh, tơnggŏ nùs nhơm kơnòl, bơta ring bal uă bơh ală anih lơh broă, mpồl cau, mpồl lơh broă tàm Dà lơgar mờ cau tĕ khà tiah ơm kis dê tàm broă yal tơnggĭt ală cau pơnrơ ngan, tơl jơnau sồr, tơl bơta tơlik măt tĕ khà cau ala măt Quôk hội khoă XVI. Cồng nha do pơn jăt tai đơs nền gơnoar broă bơh Mặt trận dà lơgar Việt Nam dê tàm đơng lam pơrjum cribơyai, gàr niam làng bol lơh tờm, song dơ pă loh làng, di jơnau cih bơh kơrnoăt boh lam dê, pơgồp bơnah tàm cồng nha lơh geh bơh dơ̆ tĕ khà dê.