Tàm dar pơrjum, Thủ tướng sồr tơngai tus Ƀộ Lơh sa mờ măy mŏk mờ Kă bro phan lơh sir sră nggal, yal broă tơn jơh lơh broă bal bè bơcri priă bơ̆t bơtàu hìu măy đèng hạt ñân Ninh Thuận 2 mờ cau lơh broă bal lài hơ̆ mờ crăp rơcăng tàm bơyai jăt nùs nhơm “bơta kwơ bơnĕ bơnài bal, rềs àr kong bal” jăt di jơnau cih bơh Adăt Bơta kơ̆p ală lơgar dê mờ kơrnoăt boh lam gơrềng bal. Bơdìh hơ̆, rơcăng lài pơgồp bal mờ ală ƀộ, anih lơh broă jăt gơnoar broă kơnòl broă, ring bal nàng tàm lùp, tàm bơyai mờ ală cau lơh broă bal bè lơh broă bal bơcri priă bơ̆t bơtàu hìu măy đèng hạt ñân Ninh Thuận 1, di tŭ yal kâp gơnăp gơnoar in ală broă gơ wă gơkòl gơlik geh.

Thủ tướng jàu Ƀộ Priă jền in pơgồp bal mờ Anih duh broă Làng bol càr Khánh Hoà kờp sền nền wơl, dan bơtơl priă kes priă dà lơgar dê dong kờl nàng lam lơh rơndăp broă lơh ntrờn làng bol, rơndăp anih ơm pa, sờr ntrờn ù tiah ai ală hìu măy đèng hạt ñân Ninh Thuận in. Mơkung mhar pơgồp bal mờ ală ƀộ, anih lơh broă geh gơrềng bal, rơcăng lài bơyai lơh tàm bơyai bè broă ai càn priă ai rơndăp broă lơh hìu măy đèng hạt ñân Ninh Thuận 1, đèng Ninh Thuận 2 in, pal ndrờm bal mờ Jơnau hơ pơrgon lơh broă bal bơcri priă bơ̆t bơtàu hìu măy nàng sền swì ring bal tàm nhai 3 tus.