Ơ làng bol, oh mi, cau ling jơh gùt lơgar mờ làng bol he tàm lơgar ndai,

Sơnam pa Nam Ơseh neh tus, tàm tŭ jiơ tàm jàu sơnam yau mờ sơnam pa, Añ kờñ gơboh ngan pơyua tus làng bol, oh mi, cau ling jơh gùt lơgar mờ làng bol he tàm lơgar ndai jơnau nting bơr sơnam pa niam lơngăp lơngai, pràn kơldang mờ gơboh gơbài. Añ dan jơh nùs pơyua tus làng bol, gơ̆p bơyô ală lơgar ală jơnau nting bơr niam bơnĕ ngan rlau jơh, nting bơr dùl sơnam pa ring lơngai, gơboh gơbài mờ bơtàu tơngguh bal.

Nam Bơs 2025, dà lơgar he neh lòt rlau dùl gơl gùng cih tềl uă broă kwơmàng, geh kwơ is ồn mờ lơh geh uă cồng nha pal hừh nùs ngan; mơkung là dùl nam dà lơgar he pal sơrlèt gan uă kal ke, bơta lòng, bal mờ ală tam gơl mhar, ờ ƀươn soh, kal ke gĭt lài bơh bơta gơlik geh tàm dunia mờ kơnhoàl ù tiah do dê, bal mờ ală trồ tiah lơh aniai kơn jơ̆ ngan, lơh gơbàn aniai hoàc hươr kơn jơ̆ ngan, lời wơl uă jê sồt muăt jrùm, roh rui hoàc hươr ai làng bol he in.

Bơh nùs nhơm kơ̆ dơn, bồ tơngoh kơnờm tàm bơta pràn is, lơh ngan is, jơh gùt Đảng, gùt làng bol, gùt ling he neh tam klăc, tơrgùm bal pràn dồ nùs bal, ngui niam bơta pràn jơh gùt jơi bơtiàn mờ bơta dong kờl bơh gơ̆p bơyô ală lơgar dê, bol he neh lơh gơs jơh ală jơnau kờñ tờm sồr lơh, mờ uă tềl lời wơl pơnrơ ngan: Lơngăp lơngai is, gơnoar tờm, tơrgùm dùl, tơl làm ù tiah dà lơgar, tiah ơm kis ring lơngai geh gàr kơ̆; gơguh lơh sa gơ wèt mpồl lam bồ dunia, gơgơs lơgar geh priă lơh geh di mơ uă; sền gàr rài kis mpồl bơtiàn geh sền gròi trăng gàr; cíñ trị, mpồl bơtiàn kơ̆ kơl jăp; sền gàr dà lơgar, lơngăp lơngai geh gàr kơ̆ mờ tơngguh tai; lơh broă mờ lơgar ndai, mŭt gơrờm bal ală lơgar geh lơh pràn, bơngă, bơta pin dờn lơgar Việt Nam dê pơn jăt tai geh yờ tơngguh tàm muh măt ală lơgar; lơh gơlik geh bơnàng jă nàng dà lơgar mŭt tàm rài bơtàu tơngguh pa.

Mŭt tus sơnam pa nam Ơseh 2026 – Nam sơnrờp lơh jăt Jơnau lơh nền tàm pơrjum bơh Pơrjum dờng XIV Đảng dê, mờ bơhiàn gơboh lơgar uă ngan, nùs nhơm tam klăc, nùs nhơm kơ̆ dơn mờ kơ̆p kờñ ngan brồ guh pràn kơldang, ngui jơh tơl tŭ jiơ niam, jơnau bơtuah, sơrlèt jơh ală kal ke, bơta lòng, đòm jăt pràn kơldang nùs nhơm pin dờn, rơcăng lài is, kơnờm tàm bơta pràn is, lơh ngan is, pơñiờ să jơi bơtiàn, sùm tam gơl pa bơceh lơh, lơh broă kràñ cê jơh nùs nàng lơh geh ngan ngồn cồng nha jơnau kờñ bơ̆t bơtàu dà lơgar Việt Nam ring lơngai, lơngăp lơngai is, làng bol lơh tờm, pas pràn, bơtàu tơngguh, jak chài, gơboh gơbài.

Tàm bơta chờ hờp wă rò Sơnam pa, dồ dơ̆ tai, Añ nting bơr làng bol, oh mi, cau ling jơh gùt lơgar mờ làng bol he tàm lơgar ndai sơnam pa cồng nha jai pha pa, cồng nha pa; jơi bơtiàn mờ làng bol he ngai sơlơ pas sơm, geh rài kis hờm ram, khăt gơboh, gơboh gơbài!

Dan ơm ngăc mờ jơh nùs lơh geh cồng nha!