Jăt ală kwang bàng, đảng viên mờ Làng bol tàm Tây Nguyên – Kềng gah dà lềng đah Jum tàm gùl lơgar, bơta kwơmàng ngan rlau jơh tơnơ̆ Pơrjum dờng XIV Đảng dê là broă lam lơh jăt jơnau lơh nền tàm pơrjum pal mhar, kràñ cê jơh nùs mờ rềp rài kis mùl màl. Bi Bùi Viết Tiệm ơm tàm jơnau 7, sàh Chư Sê, càr Gia Lai đơs là, ală jơnau lơh nền dờng mìng ngan ngồn lòt mŭt tàm rài kis tŭ geh lơh loh làng bơh ală broă lơh làng bol sền gŏ mờ gĭt gŏ geh: “Ală ƀộ, gah kờñ pal mhar kờp sền nền wơl, tam gơl ală jơnau cih tàm rơndăp tàm rơndồl, gơ kơryan bơtàu tơngguh; mơkung ai lơh jăt bơto pơlam loh làng nàng ƀòn lơgar lam lơh ring bal. Ală ƀòn lơgar pal lơh loh làng jơnau lơh nền tàm pơrjum bơh ală broă lơh làng bol sền gŏ, gĭt gŏ geh. Bơh lơh tam gơl pa wơl sră nggal sră pơ àr gơnoar ătbồ, tơngguh uă bơta niam drơng broă sa priă dà lơgar, tus lơh gơlik broă lơh broă sa kơnhăp jŏ, tơngguh uă priă lơh geh”.

Bơh đah sền bơh ală mpồl lơh sa kă bro dê, mò Nguyễn Thị Diễm Kiều, dùl mpồl lơh sa kă bro tàm sàh Đăk Đoa, càr Gia Lai tơlik nùs nhơm kơ̆p gơn tơnơ̆ Pơrjum dờng XIV Đảng dê, ală ƀòn lơgar rơ̆p geh ală gùng dà broă lơh dong kờl geh kwơ ngan ngồn rlau ai mpồl lơh sa kă bro in, is ồn tàm jăt ngui jak chài – măy mŏk mờ tam gơl sồ: “Añ gơn kơnờm là tơnơ̆ Pơrjum dờng den càr rơ̆p geh ală jơnau lơh nền dong kờl gùng dà broă lơh tus mờ mpồl lơh sa kă bro, is ồn là ngui jak chài măy mŏk, geh ală dong kờl bơcri priă bè măy mŏk, dong kờl bơsram tàp ai cau lơh broă in, măy mŏk sồ. Kung gơn kơnờm là dà lơgar rơ̆p dong kờl tai ai mpồl lơh sa kă bro in blơi geh ală phan kă bro phan điện tử mờ bơngă pin dờn nàng pleh ală mpồl lơh sa kă bro lơh broă jak ngan mờ gơlik wơl ờ jai tàm pơrlòng mờ ală phan ờ kas phan đòm tàm drà”.

Tàm ală ƀòn tiah sar tiah ngài, tiah làng bol jơi bơtiàn dồ êt nă cau, kơ̆p kờñ dờng ngan rlau jơh tơnơ̆ Pơrjum dờng XIV Đảng dê kung gam sơl là bơta sền gròi geh kwơ ngan ngồn, rềp mờ rài kis mùl màl rlau tai. Ồng Hmên, kòn cau Bahnar ơm tàm ƀòn Tuơh Ktu, sàh Đăk Đoa, càr Gia Lai geh jơnau đơs kơ̆p kờñ bè do: “Añ dòn kơnờm tơngai tus do Đảng, Dà lơgar pơn jăt tai sền gròi, pơn jăt tai đơng lam dà lơgar brồ guh, làng bol dồ nùs kờñ bal. Đảng geh ală jơnau lơh nền kwơmàng dipal nàng dà lơgar ngai sơlơ bơtàu tơngguh kơnhăp pràn rlau”.

Jăt mò H’Hương B.Krông, kòn cau Rơđê ơm tàm sơnah ƀòn Ea Kao, càr Dăk Lăk den Pơrjum dờng XIV Đảng dê gơ tơlik jơnau sồr mpồl kwang bàng pal mùl màl rềp làng bol, wờng làng bol, iăt kơno mờ di tŭ bơsong ală broă bơh kâp hơđơm.

“Kơ̆p gơn gơ wèt mờ tơl nă cau lơh bal tàm ală gơnoar broă đơng lam rơ̆p lơh jăt geh gơnoar broă, kơnòl he dê uă ngan rlau jơh tàm broă gĭt geh broă gơlik geh, iăt kơno mờ gàr niam ai gơnoar kwơ, jơnau kơlôi sơnơng, bơta kơ̆p kờñ dipal ngan bơh làng bol dê”.

Jăt ồng Võ Chí Vương, Kwang Lam bồ Sờh Broă dơlam is càr Khánh Hoà, nàng dipal mờ bơta wèt sền ngài, kơ̆p kờñ dờng ngan bơh Pơrjum dờng XIV Đảng dê, cồng nha mpồl kwang bàng, kông cưk kờñ pal pơn jăt tai geh tơngguh uă. Cồng nha lơh jăt kơnòl broă dà lơgar mờ khà niam nùs làng bol dê, mpồl lơh sa kă bro dê rơ̆p là broă jàu kwơmàng nàng sền swì broă lơh bơh mpồl lơh broă sră pơ àr gơnoar ătbồ dê.

“Bè broă lơh kwang bàng tàm bơta pa, ală broă lơh bơsong tờm kwơmàng, geh: pơn jăt tai tơngguh uă cồng nha mpồl kwang bàng gơ jăt bal mờ rơndăp tăp sèng, tơrmù dipal rơndăp mpồl lơh broă, gàr geh lơh gơtùi, geh cồng nha; tam gơl pràn kơldang broă lơh rwah ngui lơh broă, rơndăp ai, ngui kwang bàng di gơnoar broă broă lơh; mơkung sền gròi bơto bơtê, tề lam mpồl kwang bàng, kông cưk, lơh geh jơnau sồr kơnòl broă tàm tŭ tơngai pa”.

Bơh mùl màl tàm rài kis Tây Nguyên – Tiah kềng gah dà lềng đah Jum tàm gùl lơgar gơtùi gŏ, kơ̆p gơn dờng ngan rlau jơh tơnơ̆ Pơrjum dờng XIV Đảng dê ờ mìng là ală pơlam gùng gơcèng bơta jŏ jòng lơm mờ là ală tam gơl ngan ngồn, loh làng mờ cồng nha tàm lam lơh jăt. Tŭ broă lơh lơh broă bơh Cíñ phủ, ală ƀộ, gah mờ ƀòn lơgar dê geh lam lơh ndrờm bal, kràñ cê jơh nùs mờ ai làng bol, mpồl lơh sa kă bro lơh anih tờm, nùs nhơm Pơrjum dờng dơ̆ XIV Đảng dê rơ̆p mùl màl gơrề uă mờ lòt mŭt tàm rài kis, lơh gơlik bơta gơn kơnờm ai dà lơgar in bơtàu tơngguh mhar mờ kơnhăp jŏ tàm tŭ tơngai pa.